បន្ទាយមានជ័យៈ ស្រូវប្រាំងជាង ១ ០០០ ហិកតា របស់ប្រជាកសិករ ក្នុងខេត្តបន្ទាយមានជ័យកំពុងរងផលប៉ះពាល់យ៉ាងធ្ងន់ធ្ងរ ដោយសារកង្វះទឹកស្រោចស្រព ខណៈដែលកម្ពុជា នឹងទទួលរងឥទ្ធិពលនៃបាតុភូត El Nino ដែលធ្វើឲ្យបរិយាកាសឡើងកម្តៅខ្លាំង និងធ្វើឲ្យរដូវប្រាំងអូសបន្លាយវែង។
លោក ស៊ាង វ៉ាន់សេដ្ឋ ប្រធានមន្ទីរកសិកម្ម ខេត្តបន្ទាយមានជ័យ បានប្រាប់ភ្នំពេញប៉ុស្តិ៍កាលពីថ្ងៃអាទិត្យថា រដូវប្រាំងឆ្នាំនេះ ប្រជាកសិករក្នុងខេត្តបន្ទាយមានជ័យ បាននាំគ្នាសម្រុកធ្វើស្រូវប្រាំង លើផ្ទៃដី ៤៥ ០០០ ហិកតា គឺលើសពីផែនការ ដែលបានគ្រោងទុក ចំនួន ២១៦ ភាគរយ។
ទោះបែបណា បញ្ហាគ្រោះរាំងស្ងួត ដែលបានចាប់ផ្ដើមអូសបន្លាយតាំងពីចុងខែធ្នូកន្លងមកបានធ្វើឲ្យស្រូវសន្ទូងរបស់ពួកគេ ដែលកំពុងចាប់ផ្ដើមបែកគុម្ពនោះជួបប្រឈមនឹងកង្វះទឹកស្រោចស្រព។
លោកបន្តថា៖ «មកទល់ពេលនេះដំណាំស្រូវប្រាំងប្រមាណជាង ១ ០០០ ហិកតា ដែលភាគច្រើនជារបស់ប្រជាកសិករនៅស្រុកព្រះនេត្រព្រះ និងស្រុកភ្នំស្រុក កំពុងរងការខូចខាត ដោយគ្មានប្រភពទឹកណាមួយដែលអាចនាំទៅដល់ ដើម្បីជួយសង្គ្រោះស្រូវរបស់ពួកគេបាន»។
បើតាមលោក វ៉ាន់សេដ្ឋ ស្រូវប្រាំងរបស់ប្រជាកសិករ នៅស្រុកទាំង ២ ខាងលើ កន្លងមកត្រូវបានអាជ្ញាធរអនុញ្ញាតឲ្យទាញយកប្រភពទឹកពីអាងត្រពាំងថ្ម មកស្រោចស្រព។ ប៉ុន្តែបន្ទាប់ពីក្រសួងធនធានទឹក និងឧតុនិយម បានសិក្សាតាមដាន អំពីបញ្ហាប្រែប្រួលនៃអាកាសធាតុ ពិសេសការកើនឡើងកម្តៅក្នុងបរិយាកាសដែលបង្កឡើងដោយបាតុភូត El Nino ហើយបានពិនិត្យឃើញថា វានឹងមានភាពរាំងស្ងួតអូសបន្លាយក្នុងរយ:ពេលវែងនោះ ប្រមុខរដ្ឋាភិបាលបានចេញសារាចរណែនាំមួយ កាលពីពាក់កណ្ដាលខែមករាដោយបានអំពាវនាវដល់ប្រជាកសិករ ឲ្យសន្សំសំចៃទឹក និង កាត់បន្ថយការបង្កបង្កើនផលស្រូវប្រាំង។ ទន្ទឹមនឹងនេះ ប្រភពទឹកសំខាន់មួយចំនួនត្រូវបានហាមឃាត់ការបូមយកទៅដាក់ស្រូវប្រាំង។
លោក ភោគ ជិត មេឃុំទានកាំ ស្រុកព្រះនេត្រព្រះ ឲ្យដឹងថា គិតត្រឹមថ្ងៃទី ១៧ ខែកុម្ភៈ ស្រូវប្រាំងកសិករ ដែលកំពុងរងការខូចខាតនៅឃុំរបស់លោកមានជាង ៨០០ ហិកតា។ ស្រូវទាំងនោះខ្លះបានក្រៀមស្វិតជាបណ្ដើរៗ ហើយខ្លះទៀតមានជំងឺ រាតត្បាត ព្រោះគ្មានទឹកស្រោច ស្រព។ «ស្រូវទាំងនោះ អាចនឹងខូចខាតទាំងស្រុងបើគ្មានភ្លៀងកក់ខែ ឬគ្មានប្រភពទឹកពី ណាមកជួយសង្គ្រោះក្នុងរយៈពេល ១ សប្ដាហ៍ទៀត»៕