ភ្នំពេញៈ ចៅក្រមស៊ើបសួរសាលាដំបូងរាជធានីកាលពីម្សិលមិញបានបន្តសួរចម្លើយសកម្មជនដីធ្លីដ៏លេចធ្លោនៅតំបន់បឹងកក់អ្នកស្រី ទេព វន្នី ពាក់ព័ន្ធនឹងបទចោទករណីហិង្សានៅក្បែរផ្ទះលោកនាយករដ្ឋមន្ត្រីកាលពីឆ្នាំ ២០១៣ ខណៈអ្នកឃ្លាំមើលថាចំណាត់ការនេះគឺគ្រាន់តែធ្វើឡើងដើម្បីបំបិទសិទ្ធិសេរីភាពបញ្ចេញមតិប៉ុណ្ណោះ។
ការសួរចម្លើយអ្នកស្រី ទេព វន្នី បានបញ្ចប់នៅម៉ោងប្រមាណ ១១ ព្រឹកហើយបានបញ្ជូនទៅឃុំខ្លួននៅពន្ធនាគារព្រៃស ម២ វិញ។
អ្នកនាំពាក្យសាលាដំបូងរាជធានី លី សុផាណា ថ្លែងថា៖ «លោក នូ វាសនា ចៅក្រមស៊ើបសួរបានសាកសួរបន្ថែមទៅលើជនត្រូវចោទឈ្មោះ ទេព វន្នី ពីបទហិង្សាដោយចេតនាមានស្ថានទម្ងន់ទោសប្រព្រឹត្តនៅក្បែរវិមានឯករាជ្យសង្កាត់ទន្លេបាសាក់ ខណ្ឌដូនពេញកាលពីថ្ងៃទី ១៣ ខែមីនា ឆ្នាំ ២០១៣ តាមមាត្រា ២១៨ នៃក្រមព្រហ្មទណ្ឌ»។
យ៉ាងណាក៏ដោយអ្នកស្រី ទេព វន្នី បានថ្លែងនៅក្រៅបន្ទប់សវនាការថាអ្នកស្រីមិនបានប្រព្រឹត្តដូចការចោទប្រកាន់នោះទេ និងបានហៅចំណាត់ការរបស់តុលាការថាជាការគាបសង្កត់អ្នកស្រីដែលសកម្មក្នុងការតវ៉ាប្រឆាំងនឹងអំពើអយុត្តិធម៌ក្នុងសង្គម។
អ្នកស្រីថា៖ «បើខ្ញុំបានប្រព្រឹត្តអំពើហិង្សានៅមុខផ្ទះសម្តេចកាលពីឆ្នាំ ២០១៣ មែននោះប្រហែលខ្ញុំគ្មានជីវិតទេគឺបាត់បង់ជីវិតតាំងពីពេលនោះមកម្ល៉េះជាពិសេសគឺត្រូវជាប់គុកពេលហ្នុងបាត់ហើយ»។
បើតាមអ្នកស្រី ទេព វន្នី «មិញហ្នឹងព្រះរាជអាជ្ញាចូលទៅគេស្នើសុំចៅក្រមឱ្យឃុំខ្លួននាងខ្ញុំតែប៉ុណ្ណឹងហើយគាត់ទៅវិញហើយខ្ញុំមិនដឹងថាឃុំខ្លួនរឿងអីទេសូម្បីមេធាវីក៏ភ្ញាក់ផ្អើលដែរថាជាករណីអីឱ្យច្បាស់ពិតប្រាកដគឺគាត់អត់និយាយទេ»។
អ្នកស្រីបន្ថែមថា៖ «ខ្ញុំមិនតក់ស្លុត និងមិនចម្លែករឿងគេព្យាយាមលាបពណ៌ម្តងហើយម្តងទៀតទេព្រោះនេះគ្រាន់តែជាយុទ្ធសាស្ត្រដើម្បីបំបិទសិទ្ធិសេរីភាពក្នុងការបញ្ចេញមតិ និងការទាមទារយុត្តិធម៌ដីធ្លីនៅតំបន់បឹងកក់តែប៉ុណ្ណោះហើយអ្នកដែលត្រូវទទួលខុសត្រូវរឿងនេះគឺធនាគារពិភពលោកដែលធ្វើឱ្យមានកំហុសធំបំផុតសម្រាប់អ្នកបឹងកក់ជិត ១០ ឆ្នាំមកនេះ»។ «ហើយថ្មីៗនេះធនាគារពិភពលោកបំពានកិច្ចសន្យាខ្លួនឯងដែលថាលុះត្រាតែបឹងកក់ទទួលបានដំណោះស្រាយចប់សព្វគ្រប់បានគាត់ទម្លាក់លុយឱ្យរដ្ឋាភិបាលកម្ពុជាប៉ុន្តែប៉ុន្មានខែមុននេះធនាគារបានបំពានកិច្ចសន្យាខ្លួនឯង និងផ្តល់លុយឱ្យរដ្ឋាភិបាលខណៈសកម្មជនដីធី្លប្រឈមការចាប់ខ្លួនជាបន្តបន្ទាប់»។
លោកស្រី សាម សុគន្ធា មេធាវីការពារក្តីអ្នកស្រី វន្នី បដិសេធធ្វើអត្ថាធិប្បាយ។
អ្នកស្រី ទេព វន្នី ត្រូវបានអាជ្ញាធរខណ្ឌដូនពេញចាប់ឃុំខ្លួនជាមួយអ្នកស្រី បូវ សោភា កាលពីល្ងាចថ្ងៃចន្ទ ទី ១៥ ខែសីហានៅពេលកំពុងធ្វើយុទ្ធនាការថ្ងៃចន្ទពណ៌ខ្មៅនៅក្នុងសហគមន៍បឹងកក់របស់ខ្លួន។ តែអ្នកស្រី បូវ សោភា ត្រូវបានដោះលែងកាលពីថ្ងៃទី ២២ ខែសីហាខណៈអ្នកស្រី ទេព វន្នី ត្រូវបានតុលាការចោទប្រកាន់ករណីផ្សេងទៀតពាក់ព័ន្ធនឹងការតវ៉ាមួយកាលពីឆ្នាំ ២០១៣។
អំឡុងពេលសាកសួរមានសកម្មជនដីធ្លីជាង ២០ នាក់បានលើកបដា និងស្រែកតវ៉ានៅមុខសាលាដំបូងរាជធានីទាមទារឱ្យដោះលែងតំណាងរបស់ខ្លួន។
ប្រធានបចេ្ចកទេសស៊ើបអង្កេតនៃអង្គការសិទ្ធិមនុស្សលីកាដូលោក អំ សំអាត មើលឃើញថា៖ «យើងមើលទៅនៅថ្ងៃដែលគាត់ធ្វើពិធីបន់ស្រន់មានទីងមោង (ថ្ងៃចន្ទពណ៌ខ្មៅ) ប្រហែលជាគ្មានបទល្មើសណាសម្រាប់ដាក់ឃុំក្នុងពន្ធនាគារបានហើយគាត់ជាតំណាងយ៉ាងសកម្មផងចឹងបានគេសើរើរករឿងចាស់មកដើម្បីហៅមកសួរនឹងឃុំខ្លួនតែម្តងអ៊ីចឹងជារឿងមួយដើម្បីចង់គំរាមកំហែងបំបាក់ស្មារតីលើសហគមន៍»។
កញ្ញា សុង ស្រីលៀប ជាសកម្មជនដីធ្លីបឹងកក់ដែលបានឈរកាន់បដាតវ៉ានៅមុខតុលាការថ្លែងថាក្នុងអំឡុងឆ្នាំ ២០១៣ មានតែអាជ្ញាធរទេដែលប្រើអំពើហិង្សាមកលើក្រុមសកម្មជនដីធ្លីនៅតំបន់បឹងកក់ដែលព្យាយាមសុំអន្តរាគមន៍ពីលោកនាយករដ្ឋមន្ត្រីរឿងដីធ្លី។
កញ្ញាថា៖ «ពេលនោះគាត់ (សមត្ថកិច្ច) ប្រើអំពើហិង្សាផងចោទប្រកាន់ និងវៃយើងបែកក្បាល បាក់ដៃ និងមានអ្នករបួសជាបន្តបន្ទាប់បែរជាកាឡៃពីរឿងនេះមកលើប្រជាពលរដ្ឋដែលជាស្រី្តទន់ខ្សោយប្រើអំពើហិង្សានៅមុខផ្ទះសម្តេចចឹងកន្លែងនេះហើយដែលធ្វើឱ្យពួកយើងឈឺចាប់»។
យ៉ាងណាក្តីក៏អ្នកស្រីសង្ឃឹមថាលោកនាយករដ្ឋមន្រ្តី ហ៊ុន សែន នឹងបើកកាមេរ៉ាមើលវីដេអូកាលពីឆ្នាំ ២០១៣ និងជួយអន្តរាគមន៍ក្រុមស្រី្តពួកអ្នកស្រីដែលជាជនរងគ្រោះពិតប្រាកដ៕
