.jpg)
ស្ត្រីជាប់ចោទ ដែលកាប់សម្លាប់មិត្តភក្តិ នៅពេលត្រូវសមត្ថកិច្ចនាំខ្លួនទៅតុលាការ។ រូបថត FN
ភ្នំពេញ៖ សាលាដំបូងរាជធានីភ្នំពេញ កាលពីម្សិលមិញបានប្រកាសសាលក្រម ដោយផ្តន្ទាទោសស្រ្តីម្នាក់ដាក់ពន្ធនាគារអស់ ១ ជីវិត បន្ទាប់ពីជំនុំជម្រះកាលពីថ្ងៃទី ២៥ ធ្នូ ពាក់ព័ន្ធនឹងករណីសម្លាប់ស្រ្តីជាមិត្តភក្ដិដោយអារសាច់ជាកង់ៗដាក់ក្នុងទូទឹកកក ប្រព្រឹត្តកាលពីខែមិថុនា ឆ្នាំ ២០១៩ នៅសង្កាត់ជ័យជម្នះ ខណ្ឌដូនពេញ រាជធានីភ្នំពេញ។
លោកចៅក្រម ឌុច សុខសារិន បានអានសាលក្រមនៅចំពោះមុខស្រ្តីជាប់ចោទថា សំណុំរឿងនេះ មានជនជាប់ចោទឈ្មោះ ស៊ិន សុផល ហៅ ដា អាយុ ៣៥ ឆ្នាំ។ ក្រោយពីបើកសវនាការមក ក្រុមប្រឹក្សាជំនុំជម្រះសម្រេចផ្តន្ទាទោសលើជនជាប់ចោទរូបនេះឲ្យជាប់ពន្ធនាគារអស់ ១ ជីវិត និងឲ្យសងជំងឺចិត្តទៅគ្រួសារស្រ្តីរងគ្រោះចំនួន ១២០ លានរៀល។
លោកចៅក្រមបានថ្លែងថា៖ «តុលាការបានសម្រេចផ្តន្ទាទោសតាមបញ្ញត្តិមាត្រា ២០០ នៃក្រមព្រហ្មទណ្ឌ ហើយបើមិនសុខចិត្តនឹងសាលក្រមនេះ ជនជាប់ចោទមានសិទ្ធិប្តឹងទាស់ទៅសាលាឧទ្ធរណ៍បាន»។
ពាក់ព័ន្ធនឹងការផ្តន្ទាទោសនេះ លោកស្រី មួង ធនលាភី មេធាវីការពារសិទ្ធិឲ្យក្រុមគ្រួសារស្រ្តីរងគ្រោះឈ្មោះ គឹម យ៉ាទៀង អាយុ ៤០ ឆ្នាំ បានប្រាប់ក្រោយពីប្រកាសសាលក្រមថា ការផ្តន្ទាទោសអស់ ១ ជីវិតនេះ គឺតុលាការបានផ្តល់យុត្តិធម៌ដល់កូនក្តីរបស់លោកស្រីដែលជាជនរងគ្រោះហើយ។
លោកស្រីមេធាវីថ្លែងថា៖ «ក្រៅពីនេះ តុលាការបានបង្គាប់ឲ្យស្រ្តីជាប់ចោទសង ១២០ លានរៀលផង»។
ដោយឡែក លោក គង់ ហេង ជាមេធាវីការពារសិទ្ធិឲ្យស្រ្តីជាប់ចោទ បានប្រាប់តាមទូរស័ព្ទពីម្សិលមិញដែរថា ការផ្តន្ទាទោសកូនក្តីរបស់លោកឲ្យជាប់ពន្ធនាគារអស់ ១ ជីវិតនេះ គឺលោកមិនមានយោបល់អ្វីទេ ព្រោះនេះជាឆន្ទានុសិទ្ធិរបស់ចៅក្រម។
លោកថា៖ «ចំពោះការប្តឹងទាស់ទៅសាលាឧទ្ធរណ៍យ៉ាងណានោះ ខ្ញុំមិនទាន់ដឹងទេតែចាំខ្ញុំពិភាក្សាជាមួយកូនក្តីខ្ញុំសិនថា តើត្រូវប្តឹងទៅឧទ្ធរណ៍បន្តទៀត ឬយ៉ាងណា?»។
បើតាមលោក ផែន ភីរ៉ូន ជាប្អូនបង្កើតរបស់ស្រ្តីរងគ្រោះបានប្រាប់ថា បងស្រីរបស់គាត់ជាជាងអ៊ុតសក់ ហើយបានរាប់អានគ្នាជាមួយស្រ្តីជាប់ចោទរហូតក្លាយជាមិត្តភក្ដិនឹងគ្នាដែលពួកគេបានស្គាល់គ្នារយៈពេលជាង ១ ឆ្នាំ មុនមានអំពើឃាតកម្មនេះ។ រយៈពេលនៃការរាប់អានគ្នានោះ ស្រ្តីរងគ្រោះតែងតែខ្ចីលុយពីបងស្រីរបស់ខ្លួន តែលោកមិនដឹងថាចំនួនប៉ុន្មានទេ។
លោកបានបន្តថា៖ «ប៉ុន្តែបើតាមការឆ្លើយបំភ្លឺនៅតុលាការកាលពីថ្ងៃជំនុំជម្រះស្រ្តីជាប់ចោទថា គាត់ជំពាក់លុយបងស្រីខ្ញុំតែ ៧០០ ដុល្លារទេ» ។
កាលពីថ្ងៃជំនុំជម្រះនៅសាលាដំបូងរាជធានីភ្នំពេញ ស្រ្តីជាប់ចោទបានប្រាប់ចៅក្រមថា គាត់គ្មានបំណងសម្លាប់ស្រ្តីរងគ្រោះទេ ប៉ុន្តែស្រ្តីរងគ្រោះចេះតែទៅផ្ទះរបស់គាត់ និងគំរាមប្រាប់ប្តីរបស់គាត់ ប្រសិនបើគាត់មិនសងលុយទេនោះ។
ស្រ្តីជាប់ចោទថា គាត់ជំពាក់លុយស្រ្តីរងគ្រោះ ៧០០ ដុល្លារ ប៉ុន្តែគាត់សុំសងត្រឹម ៣៥០ ដុល្លារសិន តែស្រ្តីរងគ្រោះមិនព្រម។ មិនតែប៉ុណ្ណោះ ស្រ្តីរងគ្រោះបានគំរាមគាត់ថា នាង (ស្រ្តីរងគ្រោះ) នឹងប្រាប់ដល់អ្នកដែលគាត់ខ្ចីលុយផ្សេងៗទៀតឲ្យពួកគេស្គាល់ផ្ទះរបស់គាត់ ទើបគាត់ខឹងហើយរៀបចំគម្រោងសម្លាប់ស្រ្តីរងគ្រោះទៅ។
បើតាមស្ត្រីជាប់ចោទ ដំបូងស្រ្តីរងគ្រោះបានទៅលេងផ្ទះរបស់ខ្លួន ហើយបានចូលក្នុងបន្ទប់ទឹក។ ពេលនោះគាត់បានលបចូលតាមក្រោយ ហើយច្របាច់កតែម្ដង។ បន្ទាប់មកបានយកក្រមា ខ្ទប់មាត់ និងយកខ្សែចងដៃ ចងជើង ទុកក្នុងបន្ទប់ដេករហូតដាច់ខ្យល់ស្លាប់ ហើយយកសពដាក់ចូលក្នុងទូក្លាស្សេឲ្យកក។
ស្ត្រីជាប់ចោទបន្តថា លុះបាន ២ ទៅ ៣ ថ្ងៃ គាត់បានកាត់ដៃកាត់ជើង កាត់ក្បាល វះពោះ ពុះឆ្អឹងជំនីរ ពន្លះយកសាច់ ច្រកស្បោងខ្មៅម្តងបន្តិចៗយកទៅបោះចោលនៅច្រាំងទន្លេ ហើយក្រោយមក ត្រូវបានកងរាជអាវុធហត្ថរាជធានីភ្នំពេញចាប់ខ្លួនកាលពីថ្ងៃទី ១១ ខែ មិថុនា ឆ្នាំ ២០១៩៕
