.jpg)
មន្ទីរសាធារណការ និងដឹកជញ្ជូន ខេត្តស្វាយរៀង កាត់កម្ទេចស្លាកលេខយានយន្តចាស់ៗចំនួន ១ ៣៥៨ គូ គិតត្រឹមថ្ងៃទី ៨ ខែមករា។ រូបថត MPWT
ស្វាយរៀងៈ មន្ទីរសាធារណការ និងដឹកជញ្ជូន ខេត្តស្វាយរៀងបានកាត់កម្ទេចស្លាកលេខយានយន្តចាស់ៗចំនួន ១ ៣៥៨ គូ គិតត្រឹមថ្ងៃទី ៨ ខែមករា ឆ្នាំ ២០២១ ដែលបន្សល់ពីការសុំប្តូររបស់ប្រជាពលរដ្ឋ ដោយស្លាកលេខទាំងនោះបានធ្វើការផ្ទេរកម្មសិទ្ធិតាមបែបបទច្បាប់ត្រឹមត្រូវ និងរួចរាល់ជាស្ថាពរ។
ក្រសួងសាធារណការ និងដឹកជញ្ជូនបង្ហាញរបាយការណ៍ពីម្សិលមិញថា ចំនួននេះត្រូវបានប្រមូលពីម្ចាស់យានយន្តគ្រប់ប្រភេទចាប់តាំងពីទទួលបានសេចក្តីណែនាំរបស់ក្រសួងរួចមកស្តីពីការផ្ទេរកម្មសិទ្ធិយានយន្តដែលរកម្ចាស់ដើមមិនឃើញដែលបានចេញសេចក្តីប្រកាសនាថ្ងៃទី ១២ ខែមីនា ឆ្នាំ ២០២០។
លោក ហ៊ាង សុទ្ធាយុតិ្ត អ្នកនាំពាក្យក្រសួងសាធារណការ និងដឹកជញ្ជូន ប្រាប់ ភ្នំពេញ ប៉ុស្តិ៍ ពីម្សិលមិញថា ការកម្ទេចស្លាកលេខម៉ូតូ និងរថយន្តគ្រប់ប្រភេទដែលផុតសុពលភាព ខូច ឬក៏រហែក គឺជាលទ្ធផលនៃការស្នើប្តូរស្លាកចាស់ ស្លាកខូច ផ្ទេរកម្មសិទ្ធិយានយន្ត ជាដើម។ ការកម្ទេចចោលនេះ គឺដើម្បីធានាថា ស្លាកលេខទាំងនោះនឹងមិនត្រូវបានយកទៅប្រើប្រាស់ឡើងវិញដែលខុសនឹងច្បាប់ដោយប្រការណាមួយ។
លោកបន្តថា តាមរយៈមន្ទីរសាធារណការ និងដឹកជញ្ជូនក្រសួងតែងតែកម្ទេច នូវប្រភេទស្លាកលេខទាំងនេះតែរហូតមក បន្ទាប់ពីត្រូវអស់សុពលភាពពីការស្នើសុំផ្លាស់ប្តូរ តាមលក្ខខណ្ឌខាងលើ។
មន្ត្រីនាំពាក្យរូបនេះថ្លែងថា៖ «អ៊ីចឹងទេ វាជារឿងធម្មតាដែលជាទូទៅ គឺគេធ្វើមិនមែនប្លែកទេ។ ប៉ុន្តែយើងមិនបានធ្វើការផ្សព្វផ្សាយនូវសកម្មភាពនេះជាសាធារណៈនាពេលកន្លងមក។ អ្វីដែលក្រសួងប្រកាសជាសាធារណៈនេះ គឺដើម្បីឱ្យសាធារណជនដឹងថារាល់លេខ ដែលខូច ឬ ផុតសុពលភាព យើងត្រូវតែកិនកម្ទេចចោល»។
ទោះជាយ៉ាងណាលោក ហ៊ាង សុទ្ធាយុត្តិ មិនបានបញ្ជាក់ពីតួលេខនៃចំនួនស្លាកលេខដែលត្រូវបានកម្ទេចចាប់តាំងពីមានការអនុញ្ញាតឱ្យកម្ទេច រហូតដល់បច្ចុប្បន្ននេះទេ។ ប៉ុន្តែលោកថា ចំនួននេះអាចនឹងប្រហាក់ប្រហែលទៅនឹងចំនួននៃការចុះបញ្ជីយានយន្តនៅកម្ពុជា។
បើតាមលោក ហ៊ាង សុទ្ធាយុត្តិ គិតមកទល់បច្ចុប្បន្នមានយានយន្តចុះបញ្ជី សរុបប្រមាណ ៥ ៦៨០ ០០០ គ្រឿងក្នុងនោះរថយន្តមានប្រមាណ ៩៣៦ ០០០ គ្រឿង។
លោក ចាន់ សំបូរ ប្រធានមន្ទីរសាធារណការ និងដឹកជញ្ជូន ខេត្តបាត់ដំបង ឱ្យដឹងថាខេត្តបាត់ដំបង បន្ទាប់ពីទទួលបានស្លាកលេខ គឺមានការកាត់កម្ទេចចោល ព្រោះមិនបានទុកឱ្យនៅគរច្រើននោះទេ ដោយសារវាអាចនឹងបណ្តាលឱ្យមានការលំបាកក្នុងការគ្រប់គ្រង។
លោក សំបូរ បន្តថា សម្រាប់នៅខេត្តបាត់ដំបងមិនមានស្លាកលេខដែលអស់សុពលភាព ឬក៏ខូចច្រើនដូចនៅរាជធានីភ្នំពេញ និងបណ្តាខេត្តមួយចំនួននោះទេដែលនៅក្នុងការកម្ទេចម្តងៗគឺមានចំនួនប្រមាណ ៥ ទៅ ១០ ស្លាកលេខប៉ុណ្ណោះ។ ប៉ុន្តែក្នុងរយៈពេលថ្មីៗនេះមានការកម្ទេចស្លាកលេខច្រើនដែរ ដោយសារតែយានយន្តមានការកើនឡើង។
លោកថ្លែងថា៖ «មន្ទីរមិនអាចទុកច្រើនទេ ព្រោះពិបាកគ្រប់គ្រង និងខ្លាចមានជនខិលខូចលួចយកទៅប្រើប្រាស់ ដែលនាំឱ្យមានការខុសនឹងច្បាប់»៕
