.jpg)
ផ្ទះដែលបាក់រលំស្លាប់មនុស្សនៅខេត្តពោធិ៍សាត់។ រូបថត ហ្វេសប៊ុក
ពោធិ៍សាត់/សៀមរាបៈ យ៉ាងហោចណាស់មានស្ត្រីចំណាស់ម្នាក់បានស្លាប់ និងបុរសម្នាក់ទៀតបានរងរបួស បន្ទាប់ពីមានភ្លៀង និងខ្យល់កន្ត្រាក់បក់បោកដួលរលំផ្ទះរាប់សិបខ្នងក្នុងខេត្តពោធិ៍សាត់ សៀមរាប និងខេត្តឧត្តរមានជ័យកាលពីថ្ងៃចន្ទ។ នេះបើតាមការឲ្យដឹងពីមន្ត្រីអាជ្ញាធរមូលដ្ឋានកាលពីម្សិលមិញ។
លោក សូ សាហុង អភិបាលស្រុកភ្នំក្រវាញ ខេត្តពោធិ៍សាត់បានប្រាប់ភ្នំពេញប៉ុស្តិ៍ពីម្សិលមិញថាបាតុភូតភ្លៀងលាយឡំនឹងខ្យល់កន្ត្រាក់កាលពីរសៀលថ្ងៃចន្ទបណ្ដាលឲ្យស្លាប់ស្ត្រីវ័យ ៧៨ ឆ្នាំម្នាក់ឈ្មោះ វិត ភ័ណ្ឌ មានលំនៅក្នុងភូមិអង្គ្រង ឃុំសំរោង ស្រុកភ្នំក្រវាញ និងបានបង្កការខូចខាតផ្ទះពលរដ្ឋចំនួន ៥ ខ្នង។
លោក សាហុង បានថ្លែងថា៖ «ក្នុងអំឡុងពេលមេឃកំពុងធ្លាក់ភ្លៀង និងខ្យល់បក់បោកខ្លាំងនោះផ្ទះរបស់ជនរងគ្រោះត្រូវខ្យល់បក់កួចឡើងផុតពីជើងកំណល់សសរថ្ម ហើយកាច់ផ្ដួលរំលំបោកមកលើដីពេញមួយទំហឹងបណ្ដាលឲ្យបាក់សង្កត់លើជនរងគ្រោះស្លាប់នៅនឹងកន្លែង»។
ចំណែកលោក ឡាំយ៉ាង អាយុ ២២ ឆ្នាំរស់នៅភូមិ-ឃុំ-ស្រុកជីក្រែង ខេត្តសៀមរាបក៏ត្រូវផ្ទះដួលរលំបាក់សង្កត់លើបណ្ដាលឲ្យរបួសធ្ងន់ផងដែរបន្ទាប់ពីមានភ្លៀងខ្យល់បក់បោកខ្លាំងកាលពីល្ងាចថ្ងៃចន្ទ។ នេះបើយោងតាមលោក សុខ សុទ្ធាវុធ អធិការស្រុកជីក្រែងកាលពីម្សិលមិញ។
លោក សុទ្ធាវុធ បានថ្លែងថា៖ «ជនរងគ្រោះបានបាក់ដៃ និងរបួសក្បាលដោយសារបាក់ឈើផ្ទោងផ្ទះ និងធ្លាក់ក្បឿងសង្កត់លើ។ បច្ចុប្បន្នជនរងគ្រោះកំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប»។
បើតាមលោក សុទ្ធាវុធក្រៅពីបង្ករបួសដល់អ្នកភូមិបាតុភូតភ្លៀងលាយឡំខ្យល់កន្ត្រាក់នោះបានបំផ្លាញលំនៅឋានពលរដ្ឋសរុបចំនួន ១០ ខ្នងដែលក្នុងនោះផ្ទះជនរងគ្រោះខាងលើនេះទំហំ ៧ ម៉ែត្រ×១១ ម៉ែត្រធ្វើពីឈើប្រក់ក្បឿង បានខូចខាតស្ទើរទាំងស្រុងដោយសារការបាក់រលំរាបដល់ដី។ ចំណែកផ្ទះអ្នកភូមិផ្សេងទៀតដែលធ្វើពីឈើប្រក់ស័ង្កសីបានប៉ើងរបើកដំបូល ហោជាង និងជញ្ជាំងមួយចំនួនប៉ុណ្ណោះ។
ដោយឡែកលោក ជា ពិសិដ្ឋ ប្រធានគណៈកម្មការគ្រប់គ្រងគ្រោះមហន្តរាយខេត្តឧត្តរមានជ័យបានប្រាប់ភ្នំពេញប៉ុស្តិ៍ដែរថា ភ្លៀងលាយឡំខ្យល់កន្ត្រាក់ក្នុងរយៈពេល ៣ ថ្ងៃជាប់គ្នានេះ (ពីថ្ងៃទី ១៦ ដល់ ១៨ ខែឧសភា) បានបង្កការខូចខាតផ្ទះពលរដ្ឋ កុដិលោក និងសាលាឆាន់សរុប ២៨ ខ្នងនៅក្នុងឃុំលំទង និងឃុំអន្លង់វែង ស្រុកអន្លង់វែង។
លោកបានបន្តថា៖ «ក្នុងពេលមានភ្លៀងលាយឡំខ្យល់កន្ត្រាក់នោះក៏មានករណីរន្ទះបាញ់ងាប់គោ ១ ក្បាលផងដែរកាលពីល្ងាចថ្ងៃទី ១៧ ខែឧសភា កន្លងទៅនេះ ប៉ុន្តែមិនបង្ករបួស ឬគ្រោះថ្នាក់ដល់អាយុជីវិតមនុស្សនោះទេ»។
ជុំវិញករណីនេះ ក្រសួងធនធានទឹក និងឧតុនិយមកាលពីព្រឹកថ្ងៃម្សិលមិញ បានព្រមានជាថ្មីម្ដងទៀតថា ក្នុងអំឡុងពេលនៃការផ្លាស់ប្ដូររដូវកាលពីប្រាំងមកវស្សានេះ បាតុភូតភ្លៀងលាយឡំខ្យល់កន្ត្រាក់ និងរន្ទះបាញ់នឹងបន្តកើតមានកាន់តែច្រើនថែមទៀត ដែលទាមទារឲ្យពលរដ្ឋមានការប្រុងប្រយ័ត្នខ្ពស់។
យោងតាមលិខិតជូនដំណឹងចុះថ្ងៃទី ១៩ ខែ ឧសភា ឆ្នាំ ២០២០ ក្រសួងធនធានទឹកបានគូសបញ្ជាក់ថាចាប់ពីថ្ងៃទី ២០-២៦ ខែឧសភាខាងមុខនេះ នឹងមានភ្លៀងធ្លាក់ក្នុងកម្រិតពីតិចទៅច្រើនក្នុងក្របខ័ណ្ឌទូទាំងប្រទេស និងក្នុងអំឡុងពេលមានភ្លៀងធ្លាក់នឹងអាចកើតមានបាតុភូតផ្គររន្ទះ និងខ្យល់កន្ត្រាក់ផងដែរ ជាពិសេសខេត្តនៅជាប់តំបន់ជួរភ្នំដងរែក និងតំបន់វាលទំនាបកណ្តាលដែលគប្បីបង្កើនការប្រុងប្រយ័ត្ន ចៀសវាងគ្រោះថ្នាក់កើតឡើងជាយថាហេតុ៕
