.jpg)
សមត្ថកិច្ចពេលរើដើមឈើដែលរលំលើផ្ធះពលរដ្ឋនៅខេត្តព្រះសីហនុពីថ្ងៃ ២ សីហា។ រូប ប៉ូលិស
ព្រះសីហនុៈ យុវជនម្នាក់បានស្លាប់ និងស្ត្រី ២ នាក់ រួមទាំងកុមារីម្នាក់ផង បានរងរបួសធ្ងន់ និងស្រាល ដោយសារភ្លៀងលាយឡំខ្យល់កន្ត្រាក់ និងខ្យល់សមុទ្របក់បោកខ្លាំងនៅខេត្តព្រះសីហនុកាលពីរសៀលថ្ងៃអាទិត្យនិងពេលទៀបភ្លឺឈានចូលថ្ងៃចន្ទទី ៣ ខែសីហា ស្របពេលដែលមន្ត្រីជំនាញអំពាវនាវឲ្យពលរដ្ឋបន្តប្រុងប្រយ័ត្ន ខណៈកម្ពុជារងឥទ្ធិពលព្យុះSINLAKU។
លោក វិត សុភ័ក្ដិ នាយនគរបាលប៉ុស្តិ៍សង្កាត់កោះរ៉ុងសន្លឹម បានប្រាប់ភ្នំពេញប៉ុស្តិ៍កាលពីថ្ងៃចន្ទថា យុវជនម្នាក់ឈ្មោះ សាំង ឈឿន អាយុ ១៩ ឆ្នាំ មានលំនៅភូមិ-សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ និងជាបុគ្គលិកបម្រើការនៅរីស្សតមូនឡាយត្រូវបានគេប្រទះឃើញស្លាប់អណ្ដែតទឹកនៅចម្ងាយប្រមាណ ២០០ ម៉ែត្រ ពីឆ្នេរសមុទ្រនៃក្រុងកោះរ៉ុង។
លោកថ្លែងថា បើតាមការបំភ្លឺរបស់អ្នកគ្រប់គ្រងរីស្សតមូនឡាយ កាលពីល្ងាចថ្ងៃអាទិត្យ ជនរងគ្រោះបានជិះកាយ៉ាក់លេងតាមបណ្ដោយឆ្នេរ ហើយក៏ត្រូវរលកសមុទ្របោកពន្លិច និងបាត់ខ្លួនជនរងគ្រោះតែម្ដង។ លុះដល់ព្រឹកថ្ងៃចន្ទ បន្ទាប់ពីស្ងប់ខ្យល់ និងរលក ពលរដ្ឋនៅភូមិកោះរ៉ុងសន្លឹមក៏បានប្រទះឃើញសពជនរងគ្រោះអណ្ដែតទឹក នៅចំណុចកើតហេតុខាងលើនេះ ហើយរាយការណ៍ដល់សមត្ថកិច្ចចុះទៅពិនិត្យកោសល្យវិច្ច័យ ។
លោកបានបញ្ជាក់ថា៖ «ករណីនេះសមត្ថកិច្ចនគរបាលជំនាញបានសន្និដ្ឋានថា ជាករណីលង់ទឹក ព្រោះរកពុំឃើញមានស្លាកស្នាមគួរឲ្យសង្ស័យណាមួយនៅលើសាកសពជនរងគ្រោះឡើយ»។
ចំណែកនៅសង្កាត់លេខ ៣ ក្រុងព្រះសីហនុ ស្ត្រីនិងកុមារីសរុបចំនួន៣នាក់បានរងរបួសធ្ងន់ និងស្រាល ដោយសារការដួលរលំដើមឈើសង្កត់លើផ្ទះរបស់ពួកគេ បន្ទាប់ពីមានភ្លៀងខ្យល់បក់បោកខ្លាំង កាលពីល្ងាចថ្ងៃអាទិត្យ។
លោក កាន់ ឡឹង ចៅសង្កាត់លេខ ៣ បានប្រាប់ភ្នំពេញ ប៉ុស្តិ៍ កាលពីថ្ងៃចន្ទថា កុមារីឈ្មោះ ឆាំ ចាន់រ៉ា អាយុ ១២ ឆ្នាំ មានលំនៅក្រុម ១ ភូមិ ១ សង្កាត់លេខ ៣ ក្រុង-ខេត្តព្រះសីហនុ និងស្ត្រី ២ នាក់ទៀត ដែលជាអ្នកជិតខាងរួមមាន ឈ្មោះ អោម វន្នី អាយុ ៣៤ ឆ្នាំនិងឈ្មោះ ហេង ស្រីភា អាយុ ៣៦ ឆ្នាំ បានរងរបួសធ្ងន់-ស្រាល និងកំពុងសម្រាកព្យាបាលនៅមន្ទីរពេទ្យចម្ការចេកក្រុងព្រះសីហនុ ។
លោក ឡឹង បានបញ្ជាក់ថា៖ «ពួកគេរងរបួសផ្នែកក្បាល ដោយសារដើមឈើដួលរលំសង្កត់ផ្ទះរបស់ពួកគេ បន្ទាប់ពីមានភ្លៀងខ្យល់កន្ត្រាក់ កាលពីល្ងាចថ្ងៃអាទិត្យ។ ក្នុងហេតុការណ៍នោះផ្ទះអ្នកភូមិ ៨ ខ្នង បានរងការខូចខាតផងដែរ»។
ជុំវិញករណីនេះ លោក កែវ វី ទីប្រឹក្សាជាន់ខ្ពស់នៃគណៈកម្មាធិការជាតិគ្រប់គ្រងគ្រោះមហន្តរាយបានប្រាប់ភ្នំពេញ ប៉ុស្តិ៍ថា ករណីភ្លៀងលាយឡំខ្យល់កន្ត្រាក់កាលពីថ្ងៃអាទិត្យនោះ បានបណ្ដាលឲ្យខូចខាតផ្ទះពលរដ្ឋ រោងសិប្បកម្ម និងសាលារៀនសរុប ៤១ ខ្នង ក្នុងខេត្តចំនួន ៣ រួមមាន ខេត្តព្រះសីហនុ កោះកុង និងកំពត ។
លោកបានឲ្យដឹងថា ករណីស្លាប់និងរបួសពលរដ្ឋនៅខេត្តព្រះសីហនុកាលពីថ្ងៃអាទិតនោះ បានធ្វើឲ្យកំណើនជនរងគ្រោះ ដែលស្លាប់ដោយសារខ្យល់កន្ត្រាក់កើនដល់ ៥ នាក់ ខណៈអ្នករងរបួស កើនដល់ ៥៤ នាក់។ នេះបើគិតពីដើមខែមករា ឆ្នាំ ២០២០ រហូតមកទល់ពេលនេះ។
លោក កែវ វី បានបញ្ជាក់ថា៖ «តាមរបាយការណ៍បូកសរុបរយៈពេល ៧ ខែ ឆ្នាំ ២០២០ របស់គណៈកម្មាធិការជាតិគ្រប់គ្រងគ្រោះមហន្តរាយ បាតុភូតភ្លៀងលាយឡំខ្យល់កន្ត្រាក់ បានបណ្ដាលឲ្យមនុស្សស្លាប់ ៤ នាក់ និងរបួស ៥១ នាក់។ ខូចខាតផ្ទះពលរដ្ឋទាំងស្រុងអស់ ៨០០ ខ្នង និង ៤ ៨៨៦ ខ្នង ផ្ទះទៀតខូចខាតមធ្យម ព្រមទាំងខូចខាតដំបូលសាលារៀន និងអគាររដ្ឋបាលសាធារណៈសរុប ៥៥ ខ្នង។ ដោយឡែកបាតុភូតរន្ទះបាញ់បានបណ្ដាលឲ្យមនុស្ស ៤៧ នាក់ស្លាប់ និង ៣៤ នាក់ទៀតរងរបួស ព្រមទាំងងាប់គោក្របីសរុប ៥៩ ក្បាល»។
ជាមួយគ្នានេះ លោក កែវ វី បានអំពាវនាវដល់ពលរដ្ឋឲ្យបង្កើនការប្រុងប្រយ័ត្នចំពោះគ្រោះជំនន់ទឹកភ្លៀងដែលអាចនឹងកើតមានក្នុងតំបន់មួយចំនួនជាប់ជួរភ្នំដងរែក ខ្ពង់រាបឦសាន និងវាលទំនាបជាប់ប្រព័ន្ធផ្លូវទឹក ព្រោះក្នុងអំឡុងពេលនេះ កម្ពុជាកំពុងទទួលឥទ្ធិពលនៃព្យុះ SINLAKU៕
