The Phnom Penh Post Search

Search form




Logo of Phnom Penh Post newspaper Phnom Penh Post - ស្លាប់​ដោយ​សារ​គ្រុនចាញ់​ធ្លាក់​ចុះ ៧៨%

ស្លាប់​ដោយ​សារ​គ្រុនចាញ់​ធ្លាក់​ចុះ ៧៨%

ស្លាប់​ដោយ​សារ​គ្រុនចាញ់​ធ្លាក់​ចុះ ៧៨%

131125_05
រូបគំនូរអប់រំកុំឲ្យប្រជាពលរដ្ឋជឿទៅលើជំនឿក្នុងការព្យាបាលជំងឺគ្រុនចាញ់ ហេង ជីវ័ន

ភ្នំពេញៈ ករណី​ស្លាប់​ដោយ​សារ​ជំងឺ​គ្រុនចាញ់​បាន​ធ្លាក់​ចុះ​ចំនួន ៧៨ ភាគរយ​បើ​ធៀប​នឹង​ឆ្នាំ​មុន។ នេះ​បើ​យោង​តាម​របាយ​ការណ៍​រយៈ​ពេល ១០ ខែ​របស់​ក្រសួង សុខាភិបាល។

បើ​តាម​របាយ​ការណ៍​នេះ ដែល​រៀបចំ​ឡើង​ដោយ​មជ្ឈមណ្ឌល​ជាតិ​ប្រយុទ្ធ​នឹង​ជំងឺ​គ្រុនចាញ់ ប៉ារ៉ាស៊ីតសាស្រ្ត បាណកសាស្រ្ត​នៃ​ក្រសួង សុខាភិបាល បាន​ឲ្យ​ដឹង​ថា មាន​ករណី​ជំងឺ​គ្រុនចាញ់​ចំនួន ៣៣ ៧៦៩ រហូត​មក​ដល់​ខែ តុលា បើ​ប្រៀប​ធៀប​នឹង​ឆ្នាំ​មុន​គឺ​មាន​ចំនួន ៥៩ ៦៦៨ ក្នុង​រយៈ​ពេល​ដូច​គ្នា។ អ្នក​ជំងឺ​សរុប​មាន​ចំនួន ៨ នាក់​បាន​ស្លាប់​ពី​ការ​ឆ្លង​ជំងឺ​គ្រុនចាញ់​ឆ្នាំ​នេះ​ដែល​នេះ​ជា​ការ​ធ្លាក់​ចុះ​ពី​ឆ្នាំ​មុន​ដែល​មាន​ករណី​ស្លាប់​ចំនួន ៣៧។

មន្រ្តី​សុខាភិបាល​និយាយ​ថា​ការ​ធ្លាក់​ចុះ​នេះ​គឺ​ដោយសារ​មក​ពី​យុទ្ធនាការ​អប់រំ​និង​ការ​ចែក​មុង​ហើយ​មុង​ចំនួន​ជាង ២,២ លាន​ត្រូវ​បាន​ចែកចាយ​កាល​ឆ្នាំ​មុន​។ នេះ​បើ​តាម​មជ្ឈមណ្ឌល​ជាតិ​ប្រយុទ្ធ​នឹង​ជំងឺ​គ្រុនចាញ់។

លោក សូនី គ្រីសនាន មន្រ្តី​ផ្នែក​ទំនាក់​ទំនង​នៅ​អង្គការ​សុខភាព​ពិភពលោក​ប្រចាំ​នៅ​កម្ពុជា បាន​ថ្លែង​ថា៖ «កម្ពុជា​ឥឡូវ​នេះ​ស្ថិត​នៅ​ដំណាក់កាល​មុន​លុប​បំបាត់​ជំងឺ​គ្រុនចាញ់ ហើយ​អង្គការ​សុខភាព​ពិភពលោក​ជឿ​ជាក់​ថា កម្ពុជា​នឹង​អាច​មាន​ករណី​គ្រុនចាញ់​កម្រិត​សូន្យ​នៅ​ត្រឹម​ឆ្នាំ ២០១៥ ខាង​មុខ។ គោលដៅ​របស់​រដ្ឋាភិបាល​គឺ​ដើម្បី​លុប​បំបាត់​ជំងឺ​គ្រុន​ចាញ់​ទូទាំង​ប្រទេស​នៅ​ត្រឹម​ឆ្នាំ ២០១៥»។

ជំងឺ​គ្រុនចាញ់​គឺជា​ជំងឺ​ឆ្លង​ដែល​បណ្តាល​មក​ពី​មូស​ដែល​មាន​មេរោគ​ប៉ារ៉ាស៊ីត។ អង្គការ​សុខភាព​ពិភពលោក​ប៉ាន់​ស្មាន​ថា​ជំងឺ​នេះ​បាន​សម្លាប់​មនុស្ស​ចំនួន ៦៦០ ០០០ នាក់ ក្នុង​មួយ​ឆ្នាំៗ។

នៅ​ក្នុង​ប្រទេស​កម្ពុជា​សមរភូមិ​លុប​បំបាត់​ជំងឺ​គ្រុនចាញ់​ប្រឈម​មុខ នឹង​ភាព​ស្មុគស្មាញ​ក្នុង​ទម្រង់​នៃ​ភាព​រ៉េស៊ីស្តង់​ទៅ​នឹង​ថ្នាំ​នៅ​តាម​ព្រំដែន​កម្ពុជា​ថៃ​ជិត​ខេត្ត ប៉ៃលិន។

លោក សូនី គ្រីសនាន បាន​ថ្លែង​ឲ្យ​ដឹង​ទៀត​ថា៖ «Artemisinin Combination Therapies (ACTs) គឺជា​ខ្សែ​ការពារ​ចុង​ក្រោយ​ប្រឆាំង​នឹង​ទម្រង់​ធ្ងន់​ធ្ងរ​បំផុត​នៃ​ជំងឺ​គ្រុនចាញ់ falciparum malaria ដែល​បណ្តាល​ឲ្យ​ស្លាប់។ ប្រសិន​បើ​យើង​ចាញ់​លើ​សមរភូមិ​ប្រឆាំង​នឹង​រ៉េស៊ីស្តង់ ថ្នាំ Artemisinin យើង​នឹង​ចាញ់​សង្គ្រាម​ប្រឆាំង​ជំងឺ​គ្រុនចាញ់»៕ PS

អត្ថបទគួរចាប់អារម្មណ៍