ភ្នំពេញៈ ប៉ូលិសបានឲ្យដឹងថា អ្នកបើករថយន្តដឹកកម្មករម្នាក់បានបាត់បង់ជីវិត និងកម្មករជាង៥០នាក់បានរងរបួសស្រាល និងធ្ងន់នៅក្នុងឧបទ្ទវហេតុគ្រោះថ្នាក់ចរាចរណ៍ដ៏រន្ធត់មួយ រវាងឡានដឹកកម្មករនិងរថយន្តដឹកដី ស្ថិតក្នុងចំណុចភូមិទឹកថ្លា សង្កាត់ក្រាំងពង្រ ខណ្ឌ ដង្កោ រាជធានីភ្នំពេញកាលពីព្រឹកម្សិលមិញ។
លោក មុំ សុវត្ថិ អធិការប៉ូលិសខណ្ឌដង្កោបាននិយាយថា វេលាម៉ោងប្រហែល៦ព្រឹក ឡានដឹកដីមួយគ្រឿងបានបើកបុកពេញទំហឹងចំក្បាលរថយន្តដឹកកម្មករ នៅតាមបណ្តោយផ្លូវជាតិលេខ៣បណ្តាលឲ្យតៃកុងស្លាប់ និងកម្មករ កម្មការិនីចំនួន ៥៤ នាក់បានរងរបួសទាំងអស់។ លោកថា៖ «តៃកុងឡានរបស់កម្មករបានស្លាប់បន្ទាប់ពីបញ្ជូនទៅសង្គ្រោះនៅ មន្ទីរពេទ្យ តែមិនទាន់មានរបាយការណ៍ណាមួយថាកម្មករណាម្នាក់រងគ្រោះបាត់បង់ ជីវិតនោះទេ។ កម្មកររងគ្រោះទាំងអស់នោះត្រូវបានបញ្ជូនទៅសង្គ្រោះនៅមន្ទីរ ពេទ្យផ្សេងៗគ្នា»។
លោកសុវត្ថិបន្ថែមថា ឡានដឹកកម្មករមិនខុសទេ ព្រោះអ្នកបើកបរឡានដឹកកម្មករបើកត្រូវទិសដៅ ប៉ុន្តែឡានបង្កហេតុបានបើករំលោភលើផ្លូវឡានរបស់កម្មករដល់ពីរ ម៉ែត្រ រេមកបុកចំពីមុខពេញទំហឹងតែម្តង។
កម្មករម្នាក់ឈ្មោះ អោ ស្រីណែត អាយុ៣៩ឆ្នាំ ដែលកំពុងសម្រាកព្យាបាលនៅមន្ទីរពេទ្យបង្អែកពោធិចិនតុងបាននិយាយ កាលពីម្សិលមិញថា គាត់បានសន្លប់ក្នុងឧបទ្ទវហេតុគ្រោះថ្នាក់ចរាចរណ៍នោះ ហើយគាត់ភ័យរន្ធត់យ៉ាងខ្លាំងពេលដឹងខ្លួនឡើង។
នាងនិយាយ ថា៖ «ខ្ញុំអត់ដឹងថាមានអ្វីកើតឡើងចំពោះខ្ញុំទេ។ ពេលខ្ញុំបើកភ្នែកឡើង ខ្ញុំឃើញកម្មករដេកពេញដីប្រឡូកប្រឡាក់ទៅដោយឈាម ហើយអ្នកខ្លះត្រូវបានដាក់បញ្ចូលក្នុងរថយន្តសង្គ្រោះបន្ទាន់»។
នាង និយាយទៀតថា នាងរងរបួសជង្គង់ខាងស្តាំ ក្បាល និងឈឺមួយចំហៀងខ្លួន។ នាងថា៖ «ខ្ញុំគិតថា ជីវិតខ្ញុំថ្លៃ ខ្ញុំភ័យតក់ស្លុតខ្លាំងណាស់ចំពោះគ្រោះថ្នាក់នេះ ព្រោះនេះជាលើកដំបូងហើយសម្រាប់ខ្ញុំ។ មន្ត្រីខាងរោងចក្របានមកមើលខ្ញុំ ហើយពួកគាត់នឹងចំណាយលើថ្លៃព្យាបាលនេះទាំងអស់»។
ចំណែកលោក សួន ផល្លី មន្ត្រីសហជីពសេរីកម្មករ កម្ពុជាដែលបានចុះទៅជួបនឹងកម្មកររងគ្រោះផ្ទាល់បាននិយាយកាល ពីម្សិលមិញថា គ្មានកម្មករណាម្នាក់រងគ្រោះបាត់បង់ជីវិតនោះទេ គឺមានតែអ្នកបើកបរឡានដឹកកម្មករម្នាក់គត់ដែលបាត់បង់ជីវិត។ លោកបន្តថា៖ «កម្មករដែលរបួសស្រាលបានទៅផ្ទះវិញហើយ។ យើងសោកស្តាយណាស់ចំពោះឧបទ្ទវហេតុនេះ»។
យោងតាមរបាយការណ៍របស់សហជីពសេរីកម្មករកម្ពុជាដែលនិយាយពីស្ថានភាពកម្មករនៅ ឆ្នាំ២០១២បានបង្ហាញថា គ្រោះថ្នាក់ចរាចរណ៍បានកើតមានឡើងចំនួន១១ករណីដែលបណ្តាលឲ្យ កម្មករ៣៥៤នាក់រងរបួស និងបាត់បង់ជីវិត៤នាក់។
ទាក់ទិន ទៅនឹងគ្រោះថ្នាក់ចរាចរណ៍នេះដែរកាលពីថ្ងៃទី១១ ខែកុម្ភៈ ក៏មានមនុស្ស៦នាក់ បានស្លាប់នៅក្នុងគ្រោះថ្នាក់ចរាចរណ៍មួយរវាងរថយន្តកាមារីឆ្លាមបុកជាមួយនឹងរថយន្តធុនធំដឹកប្រេងសាំ ងរបស់ក្រុមហ៊ុនសូគីម៉ិច ស្ថិតក្នុងស្រុក ព្រៃនប់ ខេត្តព្រះសីហនុ តាមបណ្តោយផ្លូវជាតិលេខ៤ ម្តុំចំការដូងប្រេង។ រីឯរបាយការណ៍របស់អគ្គស្នងការនគរបាលជាតិបានឲ្យដឹងថា ក្នុងរយៈពេលចូលឆ្នាំចិនចាប់ពីថ្ងៃទី៩ កុម្ភៈ ដល់ថ្ងៃទី១២ ខែកុម្ភៈ ឆ្នាំ២០១៣ មានគ្រោះថ្នាក់ចរាចរណ៍សរុប ៩៣ ករណី បណ្តាលឲ្យមានមនុស្សស្លាប់ ៤៣ នាក់ របួសធ្ងន់ ៩៧ នាក់ និងរបួសស្រាល ៦៨ នាក់។ មន្ត្រីនគរបាលចរាចរថ្លែងថា មូលហេតុចម្បង គឺអ្នកបើកបរស្រវឹង បើកបរលឿន និងជ្រែគ្នាក្នុងស្ថានភាពគ្រោះថ្នាក់៕ CC
