The Phnom Penh Post Search

Search form

Logo of Phnom Penh Post newspaper Phnom Penh Post - ស្លាប់​ ១៦ ​នាក់​របួស​ ២៣ ​នាក់​ក្នុង​គ្រោះថ្នាក់​ចរាចរណ៍​ក្រឡាប់​ពី​លើ​ភ្នំ

ស្លាប់​ ១៦ ​នាក់​របួស​ ២៣ ​នាក់​ក្នុង​គ្រោះថ្នាក់​ចរាចរណ៍​ក្រឡាប់​ពី​លើ​ភ្នំ

សមត្ថកិច្ច​ជួយ​សង្គ្រោះ​អ្នក​រងរបួស​ពី​ការ​ក្រឡាប់​ឡាន​នៅ​ឧត្តរមានជ័យ​កាលពី​ម្សិលមិញ​ដែល​ធ្វើឲ្យ​មនុស្ស​ស្លាប់ ១៦ នាក់។
សមត្ថកិច្ច​ជួយ​សង្គ្រោះ​អ្នក​រងរបួស​ពី​ការ​ក្រឡាប់​ឡាន​នៅ​ឧត្តរមានជ័យ​កាលពី​ម្សិលមិញ​ដែល​ធ្វើឲ្យ​មនុស្ស​ស្លាប់ ១៦ នាក់។ រូបថត នគរបាលជាតិ

ស្លាប់​ ១៦ ​នាក់​របួស​ ២៣ ​នាក់​ក្នុង​គ្រោះថ្នាក់​ចរាចរណ៍​ក្រឡាប់​ពី​លើ​ភ្នំ

ឧត្តរមានជ័យៈ យ៉ាង​ហោច​ណាស់​​ក៏​មាន​មនុស្ស​ប្រុស ស្រី​ចំនួន ១៦ នាក់​បាន​ស្លាប់​និង ២៣ នាក់​បាន​រងរបួស​ធ្ងន់​ស្រាល​នៅក្នុង​គ្រោះថ្នាក់​ចរាចរណ៍​ដោយសា​រថយន្ត​ក្រឡាប់​ធ្លាក់​​ពី​លើ​ភ្នំ​ដងរែក​នៅពេល​ធ្វើ​ដំណើរ​ចុះ​ពី​លើ​ភ្នំ​ស្ថិត​នៅក្នុង​ភូមិ​ជើងភ្នំ ឃុំ​ត្រពាំងប្រីយ៍ ស្រុក​អន្លង់វែង​កាលពី​ថ្ងៃ​ម្សិលមិញ។

លោក ហ៊ឺង ថឹង នាយ​នគរបាល​ប៉ុស្តិ៍​ត្រពាំងប្រីយ៍​បាន​ឲ្យ​ដឹង​ថា​នៅ​វេលា​ម៉ោង ១១:២០ នាទី​ថ្ងៃ​ទី ១៣ ខែ​សីហា ឆ្នាំ ២០១៥ មាន​ករណី​គ្រោះថ្នាក់​ចរាចរណ៍​មួយ​បាន​កើតឡើង​ដោយសារ​រថយន្ត​ទេសចរណ៍ ៣៥ កៅអី​មួយ​គ្រឿង​ដឹក​អ្នក​ដំណើរ ៣៩ នាក់​បាន​ក្រឡាប់​ធ្លាក់​ពី​លើ​ភ្នំ​ដងរែក​នៅលើ​កំណាត់​ផ្លូវជាតិ​លេខ ៦៧ ចំណុច​ចំរាក់​ទី ១ ផ្លូវ​ឡើង​ភ្នំ​សិ្ថត​នៅ​ច្រក​ជាំស្រងុំា​ក្នុង​ភូមិ​ជើងភ្នំ ឃុំ​ត្រពាំងប្រីយ៍ ស្រុក​​អន្លង់វែង។

អ្នក​ស្លាប់​នៅ​កន្លែង​កើត​ហេតុ​មាន​ចំនួន ១២ នាក់​ហើយ​ស្លាប់ ៤ នាក់​បន្ថែម​ទៀត​នៅឯ​មន្ទីរពេទ្យ​អ្នក​ស្លាប់​ប្រុស​ម្នាក់។ អ្នក​ដែល​រងរបួស​ចំនួន ២៣ នាក់​ក្នុង​នោះ​ប្រុស​ ២ ​​នាក់​ដែល​ម្នាក់​ជា​កូនក្មេង។

សមត្ថកិច្ច​ជួយ​សង្គ្រោះ​ពលរដ្ឋ​ក្នុង​គ្រោះថ្នាក់​ចរាចរណ៍​នៅ​ខេត្ត​ឧត្តរមានជ័យ​កាលពី​ថ្ងៃ​ម្សិលមិញ​។
សមត្ថកិច្ច​ជួយ​សង្គ្រោះ​ពលរដ្ឋ​ក្នុង​គ្រោះថ្នាក់​ចរាចរណ៍​នៅ​ខេត្ត​ឧត្តរមានជ័យ​កាលពី​ថ្ងៃ​ម្សិលមិញ​។ រូបថត នគរបាលជាតិ

លោក​មាន​ប្រសាសន៍​ថា​៖ ​«តៃកុង​ឡាន​ដែល​រងរបួស​បាក់​​ភ្លៅ​បាន​ឲ្យ​ដឹង​ថា​មូលហេតុ​ដែល​បណ្តាល​ឲ្យ​ក្រឡាប់​នោះ​គឺ​ដោយសារ​តែ​រថយន្ត​ចុះ​ពី​លើ​ភ្នំ​ដាក់​លេខ​មិន​ចូល​ហើយ​​ហ្វ្រាំង​មិន​ស៊ី​ស្ថិត​ក្នុង​ល្បឿន​លឿន​ក៏​បណ្តាល​ឲ្យ​ក្រឡាប់​តែ​ម្តង»​។

លោក​បាន​ថ្លែង​ឲ្យ​ដឹង​ទៀត​ថា​រថយន្ត​ទេសចរណ៍​ខាងលើ​ម៉ាក​ហ៊ីយ៉ាន់ដាយ ពណ៌​លឿង ពាក់​ស្លាក​លេខ ភ្នំពេញ 3C.៤៦១៣ បាន​ដឹក​អ្នក​ដំណើរ​មកពី​សង្កាត់​ព្រៃស ខណ្ឌ​ដង្កោ រាជធានី​ភ្នំពេញ បំណង​ហែ​ទៀន​វស្សា​ទៅ​កាន់​វត្ត​ប្រាសាទ​តាមាន់​នៅ​ថ្ងៃ​ទី ១៤ ខែ​សីហា ឆ្នាំ​ ២០១៥។

លោក​បាន​ថ្លែង​បន្ថែម​ទៀត​ថា៖ «ពួកគាត់​ទៅ​លេង​នៅ​ច្រក​ជាំស្រង៉ាំ​គឺ​ទៅ​ទិញ​ទំនិញ​នៅ​ផ្សារ​ថៃ​ហើយ​ពេល​ធ្វើ​ដំណើរ​ត្រឡប់​មក​វិញ​ក្នុង​បំណង​ហែ​ទៀន​វស្សា​ទៅ​កាន់​វត្ត​នៅ​ប្រាសាទ​តាមាន់​ក៏​បាន​ក្រឡាប់​ធ្លាក់​ពី​លើ​ភ្នំ​»។

ពលរដ្ឋ​ចោមរោម​មើល​នៅ​ឯ​កន្លែង​កើត​ហេតុ​។
ពលរដ្ឋ​ចោមរោម​មើល​នៅ​ឯ​កន្លែង​កើត​ហេតុ​។ រូបថត នគរបាលជាតិ

លោក​ ស៊ឹម វណ្ណៈ អធិការ​ស្រុក​អន្លង់វែង​បាន​ឲ្យ​ដឹង​ថា​អ្នក​ដែល​ស្លាប់​បាន​យក​ទៅ​តម្កល់​នៅក្នុង​វត្ត​ទឹកជុំ​ហៅ​វត្ត​អន្លង់វែង​ដើម្បី​រក្សា​ទុក​ឲ្យ​ក្រុម​គ្រួសារ​យក​ទៅ​ធ្វើ​បុណ្យ​តាម​ប្រពៃណី​ចំណែក​អ្នក​រងរបួស​ត្រូវ​បញ្ជូន​ទៅ​ព្យាបាល​នៅ​មន្ទីរពេទ្យ​បង្អែក​អន្លង់វែង និង​អ្នក​របួស​ធ្ងន់​បន្ត​បញ្ជូន​ទៅ​ព្យាបាល​នៅ​មន្ទីរពេទ្យ​ខេត្ត​សៀមរាប។

លោក​ថា៖ «សព​ជនរងគ្រោះ​ត្រូវ​បាន​ដឹក​ដោយ​រថយន្ត​របស់​កងទ័ព​យក​មក​ភ្នំពេញ​»។

លោក រ៉ុន រ័ត្នវាសនា ប្រធាន​នាយកដ្ឋាន​សណ្តាប់ធ្នាប់​នៃ​ក្រសួង​មហាផ្ទៃ​បាន​បញ្ជាក់​ទៀត​ថា​កត្តា​ដែល​បណ្តាល​ឲ្យ​មាន​គ្រោះថ្នាក់​ចរាចរណ៍​នៅ​ខេត្ត​ឧត្តរមានជ័យ​នោះ​គឺ​បណ្តាល​មក​អ្នក​បើកបរ​ធ្វេស​ប្រហែស​មិន​បាន​ប្រុងប្រយ័ត្ន​ហើយ​បញ្ហា​ដែល​កើតឡើង​ដោយ​អ្នក​បើកបរ​រថយន្ត​ក្រុង​នោះ​គឺ​មាន​ច្រើន​ជាង​គេ។

លោក​ថា៖ «ខ្ញុំ​តែងតែ​ប្រាប់​ថា​ត្រូវ​គិត​ពី​ជីវិត​អ្នក​ដែល​ធ្វើ​ដំណើរ​ជាមួយ​ពីព្រោះ​ជីវិត​មនុស្ស​មួយ​រថយន្ត​គឺ​ពឹង​លើ​យើង​អ្នក​បើកបរ»​។

អ្នក​រងរបួស​ត្រូវ​បាន​ជួយ​សង្គ្រោះ​នៅ​មន្ទីរពេទ្យ​នៅ​អន្លង់វែង​។
អ្នក​រងរបួស​ត្រូវ​បាន​ជួយ​សង្គ្រោះ​នៅ​មន្ទីរពេទ្យ​នៅ​អន្លង់វែង​។ នគរបាល

លោក​បាន​ថ្លែង​ឲ្យ​ដឹង​ទៀត​ថា​អ្នក​បើកបរ​មួយ​ចំនួន​ទៀត​ក៏​ពុំ​មាន​ប័ណ្ណ​បើកបរ​ហើយ​កន្លងមក​អ្នក​បើក​រថយន្ត​ក្រុង​ទោះបី​ជា​ផ្លូវ​ចង្អៀត​ក៏​នៅ​តែ​បើក​វ៉ា​នេះ​ហើយ​ជា​កក្តា​ដែល​បណ្តាល​ឲ្យ​គ្រោះថ្នាក់​កើតឡើង។ លោក​បាន​ថ្លែង​ឲ្យ​ដឹង​ទៀត​ថា៖ «កត្តា​ចម្បង​ដែល​នៅ​តែ​នាំ​ឲ្យ​មាន​គ្រោះថ្នាក់​គឺ​បណ្តាល​មកពី​កត្តា​មនុស្ស​មាន ៩១ ភាគរយ»។

បើ​យោង​តាម​របាយការណ៍​របស់​នាយកដ្ឋាន​សណ្តាប់ធ្នាប់​នៃ​ក្រសួង​មហាផ្ទៃ​បាន​ឲ្យ​ដឹង​ថា​ក្នុង​ឆមាស​ទី ១ ឆ្នាំ ២០១៥ នេះ​មាន​ករណី​គ្រោះថ្នាក់​ចរាចរណ៍​ចំនួន ២៥១៤ ករណី​ដែល​ក្នុង​នោះ​មាន​អ្នក​ស្លាប់​ដោយ​គ្រោះថ្នាក់​ចរាចរណ៍​ចំនួន ១២២៩ នាក់​ខណៈ​ពេល​ដែល​មាន​អ្នក​រងរបួស​ចំនួន ៤០៩០ នាក់​ក្នុង​នោះ​មាន ២៣៥៩ នាក់​បាន​រងរបួស​ធ្ងន់ និង ១៧៣១ នាក់​រងរបួស​ស្រាល។ ចំពោះ​យានយន្ត​ដែល​​បាន​ខូចខាត​នៅក្នុង​គ្រោះថ្នាក់​ចរាចរណ៍​​មាន​ចំនួន ៤១៤៨ គ្រឿង​៕

រាយការណ៍​បន្ថែមៈ ឃុត សុភចរិយា

អត្ថបទគួរចាប់អារម្មណ៍