ព្រះសីហនុៈ យ៉ាងហោចណាស់មានបុរសជាកម្មករម្នាក់បានស្លាប់ភ្លាមៗនៅនឹងកន្លែង និងជិត ៣០ នាក់ផ្សេងទៀតរងរបួសធ្ងន់-ស្រាល ដោយសារគ្រោះថ្នាក់ចរាចរណ៍នៅតាមបណ្តោយផ្លូវជាតិលេខ ៤ ក្នុងស្រុកព្រៃនប់ ខេត្តព្រះសីហនុ ដែលករណីនេះបណ្តាលមកពីរថយន្តដាច់ហ្វ្រាំង។
លោក អ៊ី សុខា ស្នងការរងខេត្តព្រះសីហនុបានប្រាប់កាសែតភ្នំពេញប៉ុស្តិ៍កាលពីម្សិលមិញថា គ្រោះថ្នាក់ចរាចរណ៍នេះបានកើតឡើងនៅម៉ោងប្រមាណជាជិត ៧ យប់ ទី ១១ ខែសីហា នៅពេលក្រុមកម្មករកំពុងចេញពីរោងចក្រដោយធ្វើដំណើរតាមរថយន្តត្រឡប់ទៅលំនៅឋានរបស់ពួកគេវិញ។
លោកបានថ្លែងថា៖ «អ្នកដែលស្លាប់ និងរងរបួសទាំងអស់ គឺជាកម្មកររោងចក្រដែលពួកគេទើបតែចេញពីកន្លែងការងារត្រឡប់ទៅផ្ទះវិញ»។
លោក អ៊ី សុខា បានបន្ថែមថាអ្នករងរបួសក្នុងគ្រោះថ្នាក់ចរាចរណ៍នេះមាន ២៩ នាក់ ក្នុងនោះស្រី ២២ នាក់ រីឯអ្នករបួសធ្ងន់មាន ៨ នាក់ (ស្រី ៦ នាក់)។
ពួកគេមានស្រុកកំណើតក្នុងស្រុកព្រៃនប់ ខេត្តព្រះសីហនុ។ ប៉ុន្តែសមត្ថកិច្ចនគរបាលខេត្តបានជួយសង្គ្រោះជនរងគ្រោះទាំងនោះដោយបញ្ជូនទៅព្យាបាលនៅមន្ទីរពេទ្យបង្អែកខេត្ត និងគ្លីនិកឯកជន។
យោងតាមរបាយការណ៍របស់ស្នងការដ្ឋាននគរបាលខេត្តព្រះសីហនុបានឱ្យដឹងថា ករណីគ្រោះថ្នាក់ចរាចរណ៍នេះកើតឡើងនៅផ្លូវជាតិលេខ ៤ ចន្លោះគីឡូម៉ែត្រ ២១១-២១២ នៅភូមិចំណោតរាម ឃុំបិតត្រាង ស្រុកព្រៃនប់ ដែលបង្កឡើងដោយរថយន្ត ១ គ្រឿងម៉ាក FUSO បើកបរក្នុងទិសដៅពីខេត្តព្រះសីហនុឆ្ពោះទៅរាជធានីភ្នំពេញ។
ប៉ុន្តែរថយន្តបង្កនេះបានដាច់ហ្វ្រាំងនៅពេលចុះផ្លូវចំណោត ធ្វើឱ្យជ្រុលទៅបុករថយន្តចំនួន ៣ គ្រឿងផ្សេងទៀត ក្នុងនោះមានរថយន្ត ២ គ្រឿង បានដឹកកម្មកររោងចក្រកាត់ដេរដែលកំពុងបើកបរក្នុងទិសដៅស្របគ្នា។
របាយការណ៍ដដែលបន្តថា ខណៈដែលពលរដ្ឋ និងអ្នកធ្វើដំណើរនៅជិតកន្លែងកើតហេតុឈប់ម៉ូតូមើលគ្រោះថ្នាក់ចរាចរណ៍នេះ ស្រាប់តែមានរថយន្តដឹកកុងតឺន័រ ១ គ្រឿងទៀត បានបើកមកបុករះម៉ូតូចំនួន ៤ គ្រឿង ដែលឈប់ចតមើលករណីគ្រោះថ្នាក់ចរាចរណ៍ខាងលើនេះផងដែរ។
បើតាមរបាយការណ៍ ករណីនេះសមត្ថកិច្ចបានឃាត់ខ្លួនអ្នកបើកបររថយន្តបង្កហេតុនៅនឹងកន្លែង និងបាននាំមកសួរនៅអធិការដ្ឋាននគរបាលស្រុកព្រៃនប់។ រីឯវត្ថុតាងមានរថយន្ត ៥ គ្រឿង និងម៉ូតូ ៤ គ្រឿង ដែលខូចខាតធ្ងន់ ត្រូវបានយកមករក្សាទុកនៅអធិការដ្ឋាននគរបាលស្រុកព្រៃនប់ដើម្បីដោះស្រាយតាមនីតិវិធីច្បាប់។
យោងតាមរបាយការណ៍របស់ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត (ស.ផ.ក) បានឱ្យដឹងថា នៅក្នុងឆមាសទី ១ ឆ្នាំ ២០២០ នេះករណីគ្រោះថ្នាក់ចរាចរណ៍មកលើរថយន្តដឹកកម្មករបានកើតឡើងចំនួន ៨ ករណី ដោយបង្កឲ្យមានជនរងគ្រោះចំនួន ២២៣ នាក់ ក្នុងនោះមានអ្នកស្លាប់ ២ នាក់ អ្នករបួសធ្ងន់ ៣២ នាក់ និងអ្នករបួសស្រាល ១៨៩ នាក់៕