.jpg)
ជនរងគ្រោះដោយសាររន្ទះបាញ់នៅខេត្តស្វាយរៀងកាលពីថ្ងៃ ៨ មេសា។ រូបថត ហ្វេសប៊ុក
ស្វាយរៀងៈ មានមនុស្សយ៉ាងហោចណាស់ ២ នាក់បានស្លាប់ និង ២ នាក់ទៀត បានរងរបួសធ្ងន់ ដោយសារបាតុភូតរន្ទះបាញ់ និងខ្យល់កន្ត្រាក់ដែលបានកើតឡើងនៅខេត្តសា្វយរៀងកាលពីថ្ងៃល្ងាចថ្ងៃពុធ។ នេះបើតាមការអះអាងរបស់មន្ត្រីនគរបាលមូលដ្ឋានកាលពីម្សិលមិញ។
លោក អែម សុវណ្ណារិទ្ធ អធិការក្រុងបាវិតបានប្រាប់ភ្នំពេញ-ប៉ុស្តិ៍ពីម្សិលមិញថា កាលពីវេលាម៉ោង ៥:៣០ នាទីល្ងាចថ្ងៃពុធ ខណៈមេឃកំពុងភ្លៀង និងខ្យល់បក់បោកខ្លាំង ស្រាប់តែមានករណីរន្ទះបាញ់កើតឡើងបណ្ដាលឲ្យស្លាប់មនុស្ស ២ នាក់នៅក្នុងសង្កាត់ប្រាសាទ និងងាប់គោចំនួន ២ ក្បាលនៅសង្កាត់បាវិត។
លោកបានបន្តថា ជនរងគ្រោះដែលបានស្លាប់នៅក្នុងហេតុការណ៍រន្ទះបាញ់នោះរួមមានឈ្មោះ ខាន់ ណាក់ អាយុ ៤៥ ឆ្នាំមានលំនៅក្នុងភូមិ-សង្កាត់ប្រាសាទ ក្រុងបាវិត ខេត្តស្វាយរៀង និងប្រពន្ធរបស់គាត់ឈ្មោះ ព្រាប សាត អាយុ ៣៨ ឆ្នាំ។
លោក អែម សុវណ្ណារិទ្ធ បានបញ្ជាក់ថា៖ «ពួកគាត់ត្រូវបានរន្ទះបាញ់ស្លាប់ ខណៈពេលកំពុងជិះម៉ូតូឌុបគ្នា ត្រឡប់ពីធ្វើការមកផ្ទះវិញក្នុងគ្រាមេឃកំពុងភ្លៀងនិយាយរួមពួកគាត់ត្រូវរន្ទះបាញ់នៅពេលដែលពួកគាត់កំពុងជិះម៉ូតូឌុបគ្នាមកដល់មុខច្រកទ្វាររបងចូលផ្ទះរបស់ពួកគាត់»។
លោកបានបន្ថែមថា ករណីរន្ទះបាញ់នេះក៏បានបង្កឲ្យងាប់សត្វគោចំនួន ២ ក្បាលរបស់ប្រជាកសិករនៅភូមិកណ្ដាល សង្កាត់បាវិតផងដែរកាលពីល្ងាចថ្ងៃពុធ។
ចំណែកលោក កែវ សុភ័ណ្ឌ អធិការស្រុកស្វាយទាបបានប្រាប់ភ្នំពេញប៉ុស្តិ៍កាលពីម្សិលមិញដែរថាកាលពីល្ងាចថ្ងៃទី ៨ ខែមេសា ឆ្នាំ ២០២០ មានករណីភ្លៀងលាយឡំខ្យល់កន្ត្រាក់កើតឡើងនៅចំណុចភូមិព្រៃទទឹង ឃុំសំបួរ ដោយបានបង្កឲ្យស្ត្រីឈ្មោះ សុខ ឌឿក អាយុ ៤២ ឆ្នាំ និងកូនប្រុសរបស់គាត់ឈ្មោះ សាំង ចន្ថា អាយុ ៤ ឆ្នាំរងរបួសធ្ងន់ និងដួលរលំខូចខាតផ្ទះពលរដ្ឋចំនួន ៣ ខ្នងផងដែរ។
លោក សុភ័ណ្ឌ បានថ្លែងថា៖ «នៅក្នុងហេតុការណ៍នោះស្ត្រីជាម្ដាយត្រូវបានផ្ទះរលំបាក់សង្កត់លើបណ្ដាលឲ្យរបួសក្បាលធ្ងន់ធ្ងរ និងបាក់ឆ្អឹងកំភួនដៃខាងស្ដាំ។ ចំណែកកូនប្រុសរបស់គាត់បានរងរបួសនៅត្រង់ក្បាល ដោយមុតរយះដេរចំនួន ៣ ថ្នេរ។ នៅពេលនេះម្ដាយ និងកូនតូចដែលរងគ្រោះនោះកំពុងសម្រាកព្យាបាលនៅមន្ទីរពេទ្យខេត្តស្វាយរៀង»។
ករណីស្លាប់ និងរបួសដោយគ្រោះធម្មជាតិខ្យល់ និងរន្ទះបាញ់នៅខេត្តស្វាយរៀងកាលពីថ្ងៃពុធនេះបានធ្វើឲ្យចំនួនជនរងគ្រោះដោយសារបាតុភូតធម្មជាតិកើនដល់ ១៣ នាក់ក្នុងនោះមាន ៦ នាក់បានស្លាប់ និង ៧ នាក់ទៀតរងរបួស។
លោក ឃុន សុខា អ្នកនាំពាក្យរបស់គណៈកម្មាធិការជាតិគ្រប់គ្រងគ្រោះមហន្តរាយបានប្រាប់ភ្នំពេញប៉ុស្ដិ៍កាលពីម្សិលមិញថា យោងតាមរបាយការណ៍ដែលប្រមូលបានពីអាជ្ញាធរមូលដ្ឋាន និងប្រព័ន្ធផ្សព្វផ្សាយ ករណីរន្ទះបាញ់នៅក្នុងឆ្នាំ ២០២០ នេះបានសម្លាប់មនុស្ស ៤ នាក់នៅក្នុងខេត្តចំនួន ៣ រួមមាន ខេត្តតាកែវម្នាក់,ខេត្តប៉ៃលិនម្នាក់ និងខេត្តស្វាយរៀង ២ នាក់។ ចំណែកករណីខ្យល់កន្ត្រាក់វិញបានសម្លាប់មនុស្សចំនួន ២ នាក់នៅក្នុងខេត្តព្រះសីហនុ និងបង្ករបួសមនុស្ស ៧ នាក់ដែលក្នុងនោះនៅខេត្តកំពង់ចាម ២ នាក់ ខេត្តពោធិ៍សាត់ ៣ នាក់ និងខេត្តស្វាយរៀង ២ នាក់៕
