ត្បូងឃ្មុំ: យ៉ាងហោចណាស់មានមនុស្សប្រុស-ស្រីចំនួន ៣ នាក់ បានស្លាប់ភ្លាមៗនៅកន្លែងកើតហេតុក្នុងគ្រោះថ្នាក់ចរាចរណ៍រវាងរថយន្តបែនដឹកខ្សាច់បុកជាមួយម៉ូតូ ១ គ្រឿងពីម្សិលមិញនៅលើកំណាត់ផ្លូវជាតិលេខ ៧ ក្នុងភូមិទន្លេបិទលើ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ ប៉ុន្ដែអ្នកបើកបររថយន្តបានរត់គេចខ្លួនបាត់។
លោក តេន សារុំ នាយផ្នែកសេនាធិការនៃអធិការដ្ឋាននគរបាលស្រុកត្បូងឃ្មុំ បានថ្លែងពីម្សិលមិញថា គ្រោះថ្នាក់ចរាចរណ៍នេះគឺក្រុមជនរងគ្រោះបានជិះម៉ូតូម៉ាកហុងដាឌ្រីម ១ គ្រឿងឌុបគ្នា បើកបរដោយឈ្មោះ អោក សៅ ហៅ (ម៉ាប់) ភេទប្រុស អាយុ ៣៣ ឆ្នាំនៅភូមិខ្នប់ដំរីត្បូង ឃុំដំរិល ស្រុកអូររាំងឪ ខេត្តត្បូងឃ្មុំ ដោយឌុបស្ត្រី ២ នាក់។ ក្នុងនោះស្ត្រីម្នាក់ ឈ្មោះ សន សុខខឿន អាយុ ៣៤ ឆ្នាំជាប្រពន្ធគាត់ និងស្ត្រីម្នាក់ទៀតឈ្មោះ ស៊ិន សុខខេន អាយុ ២៧ ឆ្នាំរស់នៅភូមិឃុំជាមួយគ្នា។
លោក តេន សារុំ ថា៖ «ឡាន និងម៉ូតូហ្នឹងគាត់ជិះបញ្ច្រាសទិសគ្នា ហើយអ្នកបើកបរម៉ូតូបានប្រឹងវ៉ាជែងរថយន្តតូច ១ គ្រឿង តែវ៉ាជែងមិនផុត ស្រាប់តែមានរថយន្តដឹកខ្សាច់មកពីមុខក៏បុកគ្នាពេញទំហឹងតែម្ដង។ ក្រោយកើតហេតុគឺអ្នកបើកឡានបានរត់គេចខ្លួនបាត់តែយើងបានយកឡាន និងម៉ូតូមករក្សាទុកហើយរង់ចាំការដោះស្រាយនាពេលក្រោយ»។
លោកបន្ថែមថា ក្រោយកើតហេតុនគរបាលចរាចរណ៍ស្រុកត្បូងឃ្មុំបានចុះវាស់វែង ហើយបានយករថយន្ត និងម៉ូតូជនរងគ្រោះទៅរក្សាទុកនៅអធិការដ្ឋាននគរបាលស្រុកដើម្បីដោះស្រាយទៅតាមនីតិវិធីច្បាប់។ ចំណែកសាកសពជនរងគ្រោះទាំង ៣ នាក់ត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី។
លោក កេង ប៊ុនណា អភិបាលស្រុកត្បូងឃ្មុំ បានថ្លែងថា លោកមិនទាន់បានទទួលព័ត៌មាននេះទេ ដោយចាំមើលសមត្ថកិច្ចរាយការណ៍មកសិន។
លោក ឯក សារិន នាយប៉ុស្ដិ៍នគរបាលរដ្ឋបាលឃុំទន្លេបិទបានថ្លែងពីម្សិលមិញដែរថា លោកបានទទួលព័ត៌មាននេះ ប៉ុន្ដែមិនបានដឹងពីដើមហេតុលម្អិតទេ ព្រោះលោកជាប់រវល់ប្រជុំនៅស្នងការដ្ឋាននគរបាលខេត្តត្បូងឃ្មុំ។ «ខ្ញុំបានទទួលព័ត៌មាននេះពីមន្ត្រីជំនាញខ្ញុំដែរ តែដឹងអត់ច្បាស់ទេ ព្រោះខ្ញុំមើលរបាយការណ៍គេផ្ញើមកដែរ»។
ពលរដ្ឋជាសាក្សីនៅកន្លែងកើតហេតុម្នាក់សុំមិនបញ្ចេញឈ្មោះបានថ្លែងពីម្សិលមិញថាមុនពេលកើតហេតុ លោកបានឃើញជនរងគ្រោះជិះម៉ូតូពណ៌ខ្មៅឌុបស្ត្រី ២ នាក់ធ្វើដំណើរបញ្ច្រាសទិសគ្នាជាមួយរថយន្តក្នុងទិសដៅពីត្បូងទៅជើង។
លុះពេលជិះវ៉ាជែងរថយន្តធុនតូចក៏ជ្រុលទៅបុករថយន្តបែនដឹកខ្សាច់ពណ៌ស ស្លាប់ទាំង ៣ នាក់ភ្លាមៗតែម្ដង។
លោកបន្តថា ក្រោយពេលកើតហេតុ ស្រាប់តែអ្នកបើកបររថយន្តបែនដឹកខ្សាច់បានប្រញាប់ចតរថយន្តចោលរួចរត់គេចខ្លួនបាត់។
លោកថា៖ «ខ្ញុំបានឃើញគាត់ជិះដូចជាមិនលឿនប៉ុន្មានទេ តែគាត់ជិះវ៉ាជែងឡានតូចហើយពេលវ៉ាជែងហ្នឹង គាត់ជិះលឿន ស្រាប់តែមានឡានដឹកខ្យាច់មកពីមុខគាត់ហ្នឹង ក៏បុកគ្នាពេញទំហឹងតែម្ដង»។
តាមទិន្នន័យគ្រោះថ្នាក់ចរាចរណ៍ទូទាំងប្រទេសរបស់នាយកដ្ឋាននគរបាលចរាចរណ៍ និងសណ្តាប់សាធារណៈនៃអគ្គស្នងការដ្ឋាននគរបាលជាតិឲ្យដឹងថា គ្រាន់តែនៅថ្ងៃទី ២៧ កក្កដាគឺមានមនុស្សស្លាប់ ៧ នាក់របួសធ្ងន់ ៨ នាក់ (ស្រី ៣ នាក់) និងរបួសស្រាល ៧ នាក់ (ស្រី ៥ នាក់) ដោយសារគ្រោះថ្នាក់ចរាចរណ៍ចំនួន ១២ លើក៕