ភ្នំពេញ៖ មនុស្សបីនាក់បានស្លាប់ និង មនុស្សម្នាក់ទៀតបានរងរបួស បន្ទាប់ពីមានករណីផ្ទុះនៅហាងលក់ហ្គាសមួយកន្លែង ស្ថិតនៅតាមបណ្ដោយផ្លូវត្រសក់ផ្អែម សង្កាត់បឹងរាំង ខណ្ឌដូនពេញ រាជធានីភ្នំពេញនៅរសៀលថ្ងៃសៅរ៍ទី ១៨ ខែ កក្កដា។ នេះបើតាមព័ត៌មានបឋមដែល ភ្នំពេញប៉ុស្ដិ៍ ទទួលបានពីលោក នេត វត្ថា ប្រធាននាយកដ្ឋាននគរបាលបង្ការពន្លត់អគ្គិភ័យ និង សង្គ្រោះនៃក្រសួងមហាផ្ទៃនៅមុននេះបន្តិច។
លោកបានបញ្ជាក់ថា៖ «កំពុងពន្លត់ភ្លើងនេះនៅឡើយទេ ហើយសាកសពចំនួនពីរនាក់បានយកចេញ និង ម្នាក់ទៀតកំពុងស្ថិតនៅក្នុងភ្លក់ភ្លើងនៅឡើយ។ មានអ្នករងរបួសម្នាក់យើងបានបញ្ជូនទៅសង្គ្រោះហើយ។ ឥឡូវនេះ យើងមិនទាន់បានដឹងអំពីមូលហេតុបង្កឱ្យមានភ្លើងឆេះនៅឡើយទេ ហើយកំពុងប្រតិបត្តិការនៅឡើយ»។
លោកបន្តថា នៅក្នុងប្រតិបត្តិការពន្លត់អគ្គិភ័យនេះ គឺបានប្រើរថយន្តពន្លត់អគ្គិភ័យជិត ៤០ គ្រឿង និង មន្រ្តីពន្លត់អគ្គិភ័យជិត ១០០ នាក់។
លោក ឃួង ស្រេង អភិបាលរាជធានីភ្នំពេញបានបញ្ជាក់ថា លោកបានចុះទៅដឹកនាំមន្ត្រីពន្លត់អគ្គិភ័យនេះ ហើយមិនទាន់ដឹងថា មានអ្នកស្លាប់ប៉ុន្មាននាក់ឡើយ។
លោកបានថ្លែងថា៖ «យើងមិនទាន់កំណត់បានអំពីជនរងគ្រោះនៅឡើយទេ។ ខ្ញុំកំពុងតែធ្វើការងារហ្នឹង»៕