កំពង់ធំ/កំពត: យ៉ាងហោចណាស់មានស្ត្រី ៥ នាក់បានស្លាប់ភ្លាមៗនៅកន្លែងកើតហេតុ និងកម្មករ កម្មការិនី ២៣ នាក់ផ្សេងទៀតបានរងរបួសធ្ងន់ ស្រាលក្នុងគ្រោះថ្នាក់ចរាចរណ៍ក្រឡាប់រថយន្ត ២ ករណីផ្សេងគ្នាកាលពីម្សិលមិញនៅក្រុងស្ទឹងសែនខេត្តកំពង់ធំ និងនៅស្រុកជុំគិរី ខេត្តកំពត ខណៈគ្រាន់តែក្នុងខែកញ្ញាកន្លងមកមានអ្នកស្លាប់ដោយសារគ្រោះថ្នាក់ចរាចរណ៍រហូតដល់ ១៧៧ នាក់ និងរបួសសរុប ៤៧០ នាក់។
លោក ញ៉ែម ឈុនលី អធិការក្រុងស្ទឹងសែនប្រាប់ភ្នំពេញប៉ុស្ដិ៍ពីម្សិលមិញថា ស្ត្រី ៥ នាក់ បានស្លាប់នៅក្នុងហេតុការណ៍គ្រោះថ្នាក់ចរាចរណ៍មួយនៅភូមិព្រៃតាហ៊ូ សង្កាត់ព្រៃតាហ៊ូ ក្រុងស្ទឹងសែនដោយសារអ្នកបើកបររថយន្តបើកក្នុងល្បឿនលឿនត្រង់ចំណុចផ្លូវកោងហើយបានរេចង្កូតក្រឡាប់ធ្លាក់ពីផ្លូវជាតិលេខ ៦ ជាច្រើនត្រឡប់។ អ្នកបើកបររថយន្តម៉ាកបាឡែន ឈ្មោះ ឌុក វល្ល័ក្ខ ភេទស្រី ជាមន្ដ្រីនគរបាលនៅនាយកដ្ឋានមួយក្នុងក្រសួងមហាផ្ទៃ។
លោកបន្តថាអ្នកបើកបររថយន្តនេះបានបើកក្នុងល្បឿនលឿនលុះមកដល់កន្លែងកើតហេតុដែលជាភូមិសាស្ត្រផ្លូវកោងបានរេចង្កូតធ្លាក់ពីផ្លូវជាតិលេខ ៦ ចូលមកនៅលើផ្លូវលំក្បែរប្រឡាយទឹក។ ចំណែកឯមនុស្សត្រូវជាមិត្តភក្ដិនឹងគ្នានៅក្នុងរថយន្តទាំង ៥ នាក់បានស្លាប់នៅនឹងកន្លែងទាំងអស់។
លោក ឈុនលី បញ្ជាក់ថា៖ «ពួកគាត់ទាំង ៥ នាក់នេះ គឺប្រហែលត្រូវជាមិត្តភក្ដិនឹងគ្នាដោយពួកគាត់ទំនងធ្វើដំណើរពីភ្នំពេញឆ្ពោះទៅខេត្តសៀមរាប តែដល់កន្លែងហ្នឹងក៏មានគ្រោះថ្នាក់។ ចំណែកសាកសពពួកគាត់ខ្ញុំបានឲ្យគេដឹកទៅកម្កល់ទុកនៅមន្ទីរពេទ្យខេត្តកំពង់ធំ ដើម្បីស្រាវជ្រាវរកសាច់ញាតិមកទទួល»។
បើតាមរបាយការណ៍របស់អគ្គស្នងការនគរបាលជាតិ រថយន្ដដែលជួបគ្រោះថ្នាក់ក្រឡាប់នោះ ម៉ាកបាឡែនពណ៌សពាក់ស្លាកលេខភ្នំពេញ 2AS-6715 ដោយមានជនរងគ្រោះស្លាប់ទាំង ៥ នាក់ រួមមាន ទី១- អ្នកបើកបររថយន្តឈ្មោះ ឌុក វល្ល័ក្ខ ភេទស្រី ជាមន្ដ្រីនគរបាលនៅនាយកដ្ឋានមួយក្នុងក្រសួងមហាផ្ទៃ។ ទី២- ឈ្មោះ អួន ចាន់ធារី ភេទស្រី អាយុ ៣៤ ឆ្នាំ រស់នៅភូមិទី ៤ ឃុំស្វាយលួង ស្រុកកណ្តៀង ខេត្តពោធិ៍សាត់។ ទី៣- ឈ្មោះ ឡាច ស្រីម៉ុម ភេទស្រី អាយុ ២៦ ឆ្នាំ រស់នៅភូមិជំរៅ ឃុំពារាម ស្រុកបាទី ខេត្តតាកែវ ទី៤- ឈ្មោះ ដុក ចាន់ វលក្ខ័ណ៍ ភេទស្រី អាយុ ២៦ ឆ្នាំ នៅបឹងកេងកងទី ៣ ខណ្ឌចំការមន ភ្នំពេញ និងទី៥- មិនស្គាល់អត្តសញ្ញាណ។
គ្រោះថ្នាក់ចរាចរណ៍ដាច់ដោយឡែកមួយទៀតបានកើតឡើងនៅលើផ្លូវជាតិលេខ ៤១ ក្នុងភូមិស្រែចែង ឃុំស្រែចែង ស្រុកជុំគិរី ខេត្តកំពត ដោយរថយន្តបែកកង់មុខហើយបានក្រឡាប់ធ្វើឲ្យកម្មករ-កម្មការិនីចំនួន ២៣ នាក់ (ប្រុស ៣ នាក់) បានរងរបួសធ្ងន់-ស្រាល ហើយត្រូវបានសមត្ថកិច្ចដឹកទៅសង្គ្រោះនៅមន្ទីរពេទ្យខេត្តតាកែវចំនួន ១៦ នាក់ និងសង្គ្រោះនៅមន្ទីរពេទ្យស្រុកជុំគិរីចំនួន ៧ នាក់។
លោក ម៉ៅ ច័ន្ទមធុរិទ្ធ ស្នងការខេត្តកំពតបានឲ្យដឹងថា រថយន្តបង្កគ្រោះថ្នាក់ខាងលើម៉ាកសាំងយ៉ុង ពណ៌លឿង ជារថយន្តដឹកកម្មករ កម្មការិនីរោងចក្រកាត់ដេរនៅរោងចក្របឹងត្រកួនក្នុងស្រុកគងពិសី ខេត្តកំពង់ស្ពឺ។ រថយន្តបើកបរក្នុងល្បឿនលឿន ទិសដៅពីត្បូងទៅជើងលុះដល់ចំណុចខាងលើរថយន្តបានបែកកង់មុខ ខាងស្ដាំបណ្តាលឲ្យក្រឡាប់ ២-៣ ត្រឡប់។
លោកបន្តថា ក្រោយហេតុការណ៍នេះ នគរបាលស្រុកជុំគិរី និងនគរបាលមូលដ្ឋានបានទៅដល់កន្លែងកើតហេតុភ្លាមៗ ដើម្បីជួយដឹកជនរងគ្រោះទៅសង្គ្រោះនៅមន្ទីរពេទ្យស្រុកឈូក និងមន្ទីរពេទ្យខេត្តតាកែវ។ «ឥឡូវនេះ យើងបានជួយសង្គ្រោះពួកគាត់ដល់មន្ទីរពេទ្យរួចរាល់ដោយមានថ្នាក់ដឹកនាំយើងចុះទៅសួរសុខទុក្ខដែរ ប៉ុន្ដែមិនមានអ្នកបាត់បង់ជីវិតទេ»។
លោក ច័ន្ទមធុរិទ្ធ បន្ថែមថា ហេតុការណ៍គ្រោះថ្នាក់នេះមានអ្នករបួសធ្ងន់ចំនួន ៩ នាក់ ដោយបានបញ្ជូនមកព្យាបាលនៅទីក្រុងភ្នំពេញ ហើយក្រៅពីនេះបាននិងកំពុងសម្រាកព្យាបាលនៅមន្ទីរពេទ្យខេត្តតាកែវ និងមន្ទីរពេទ្យស្រុកជុំគិរី។ ចំណែកអ្នកបើកបររថយន្តដឹកកម្មករនេះបានរត់គេចខ្លួនបាត់ ដោយសមត្ថកិច្ចបានយករថយន្តជាវត្ថុតាងមករក្សាទុកនៅអធិការដ្ឋាននគរបាលស្រុកជុំគិរីបណ្ដោះអាសន្ន និងរង់ចាំដោះស្រាយជាផ្លូវការ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបានថ្លែងថា បញ្ហាគ្រោះថ្នាក់ចរាចរណ៍ដែលបានកើតឡើងជាបន្តបន្ទាប់មកលើកម្មកររោងចក្រនៅតែជាប្រធានបទក្ដៅនៅឡើយ ដោយមិនទាន់អាចដោះស្រាយឲ្យបានសមរម្យនៅឡើយទេ។ កម្មករភាគច្រើនបានធ្វើដំណើរដោយមធ្យោបាយផ្ទាល់ខ្លួន និងមួយចំនួនជិះរថយន្តដឹកជញ្ជូនមិនសមរម្យដែលជាហេតុធ្វើឲ្យជីវិតកម្មករប្រឈមនឹងហានិភ័យខ្ពស់នៅលើដងផ្លូវ។
លោកបន្តថា បញ្ហាគ្រោះថ្នាក់ចរាចរណ៍សព្វថ្ងៃនេះ រដ្ឋាភិបាលគួរដាក់ចេញវិធានការបន្ទាន់ដើម្បីកាត់បន្ថយស្ថានភាពគ្រោះថ្នាក់មកលើកម្មករក៏ដូចជាគ្រោះថ្នាក់ពលរដ្ឋទូទៅដែលកំពុងធ្វើដំណើរលើដងផ្លូវ។ លោកជំរុញឲ្យថៅកែរោងចក្រគួរធានាទៅលើមធ្យោបាយដឹកជញ្ជូនកម្មករដោយប្រើប្រាស់រថយន្ត Bus សម្រាប់ដឹកកម្មករវិញ ដើម្បីធានាសុវត្ថិភាពជូនពួកគាត់។
លោកបញ្ជាក់ថា៖ «រដ្ឋាភិបាលគួរយកគំរូតាមរោងចក្រនៅខេត្តកោះកុង ព្រោះពួកគាត់បានធានារ៉ាប់រងលើមធ្យោបាយធ្វើដំណើរឲ្យកម្មករខ្លួន គឺគាត់មាន ឡាន Bus ឲ្យកម្មករជិះ។ អ៊ីចឹងបញ្ហានេះអត់សូវកើតមានមកលើកម្មករទេហើយរដ្ឋាភិបាល គួរអនុវត្តគម្រោងនេះនៅទូទាំងប្រទេសដែរ អ៊ីចឹងវាអាចធានាសុវត្ថិភាពជូនពួកគាត់បានហើយ»។
តាមរបាយការណ៍របស់អគ្គស្នងការនគរបាលជាតិបានឲ្យដឹងថា ចាប់គិតពីថ្ងៃទី ១ ដល់ថ្ងៃទី ៣០ ខែ កញ្ញា ហេតុការណ៍គ្រោះថ្នាក់ចរាចរណ៍កើតឡើង ៣៣៨ លើកបណ្ដាលឲ្យមនុស្សស្លាប់ចំនួន ១៧៧ នាក់ របួសសរុបចំនួន ៤៧០ នាក់ ក្នុងនោះរបួសធ្ងន់ ៣០៤ នាក់ និងស្រាល ១៦៦ នាក់ ដោយខូចខាតម៉ូតូចំនួន ១៥៣ គ្រឿង រថយន្តតូច ៨ គ្រឿង។ មូលហេតុចម្បងដែលបណ្ដាលឲ្យកើតមានគ្រោះថ្នាក់ចរាចរណ៍គឺបណ្ដាលមកពីអ្នកបើកបរលើសល្បឿនកំណត់ និងមិនគោរពសិទ្ធិ មិនប្រកាន់ស្ដាំ បើកបរប្រជែងបត់ក្នុងស្ថានភាពគ្រោះថ្នាក់ និងបើកបរទាំងមានផ្ទុកសារធាតុស្រវឹងជាដើម៕