.jpg)
សមត្ថកិច្ចពេលជួយអ្នករបួសទៅកាន់មន្ទីរពេទ្យនៅយប់ថ្ងៃទី ៣១ ធ្នូ។ រូបថត ប៉ូលីស
កំពង់ស្ពឺ៖ យ៉ាងហោចណាស់មានមនុស្ស ៨ នាក់ ក្នុងនោះមានទាំងស្ត្រីមានផ្ទៃពោះ និងកុមារីអាយុ ៤ ឆ្នាំផង បានស្លាប់ភ្លាមៗនៅកន្លែងកើតហេតុ ខណៈ ៩ នាក់ផ្សេងទៀតបានរងរបួស ដោយសារគ្រោះថ្នាក់ចរាចរណ៍រថយន្តដឹកស៊ីម៉ងត៍បុកគ្នាជាមួយរថយន្តដឹកអ្នកដំណើរនៅលើកំណាត់ផ្លូវជាតិលេខ ៤១ ក្នុងភូមិអណ្ដូងច្រុះ ឃុំស្នំក្រពើ ស្រុកគងពិសី ខេត្តកំពង់ស្ពឺ។
លោក ទូច ភារិទ្ធ អធិការរងស្រុកគងពិសីទទួលបន្ទុកផ្នែកចរាចរណ៍បានប្រាប់ភ្នំពេញប៉ុស្តិ៍ថា ហេតុការណ៍នេះបានកើតឡើងនៅម៉ោង ២៣:៤២ នាទី យប់ថ្ងៃ ៣១ ធ្នូ ឆ្នាំ ២០១៩ ជិតឆ្លងចូលឆ្នាំ ២០២០ បណ្ដាលមនុស្ស ៨ នាក់ស្លាប់ ក្នុងនោះរួមមានឈ្មោះ ហួន វណ្ណី អាយុ ៣៩ ឆ្នាំ ជាអ្នកបើកបររថយន្តដឹកអ្នកដំណើរ, ផាន រ័ត្ន ភេទប្រុស អាយុ ៤១ ឆ្នាំ, ប្រាក់ សុមន ភេទស្រី អាយុ ២៦ ឆ្នាំ, កែម ហៀង ភេទស្រី អាយុ ៦៤ ឆ្នាំ, សៀង អឿន ភេទស្រី អាយុ ២៧ ឆ្នាំ (មានផ្ទៃពោះ ៤ ខែ) និងកូនស្រីគាត់អាយុ ៤ ឆ្នាំ ឈ្មោះ ស្រី និច (អ្នកទាំង ៦ មានលំនៅក្នុងស្រុកបសេដ្ឋ ខេត្តកំពង់ស្ពឺ)។ ចំណែកអ្នកស្លាប់ ២ នាក់ទៀត ឈ្មោះ ស៊ឹម សុភ័ណ្ឌ ភេទស្រី អាយុ ២៥ ឆ្នាំ និងឈ្មោះ គឹមហុង ភេទប្រុស អាយុ ២៥ ឆ្នាំ មានលំនៅក្នុងភូមិតាប្រឹម ឃុំសំបូរ ស្រុកទ្រាំង ខេត្តតាកែវ។ រីឯ ៩ នាក់ផ្សេងទៀតបានរងរបួសធ្ងន់ ក្នុងនោះមានស្រីមា្នក់ផងដែរ។
លោកបានបញ្ជាក់ថា៖ «ឆ្លងតាមការត្រួតពិនិត្យ វាស់វែង និងសាក្សីនៅកន្លែងកើតហេតុ គ្រោះថ្នាក់ចរាចរណ៍គួរឲ្យរន្ធត់ខាងលើនេះ គឺបណ្ដាលមកពីភាពធ្វេសប្រហែស របស់អ្នកបើកបររថយន្តដឹកអ្នកដំណើរដែលបើករំលោភចូលទៅក្នុងគន្លងផ្លូវរបស់រថយន្តដឹកស៊ីម៉ងត៍ ដែលបើកបញ្ច្រាសទិសគ្នា»។
បើតាមលោក ភារិទ្ធ នៅមុនកើតហេតុគេបានឃើញរថយន្តដឹកអ្នកដំណើរ (Van) ពាក់ស្លាកលេខភ្នំពេញ 2AF-2506 បើកបរពីទិសខាងជើងទៅត្បូងក្នុងល្បឿនលឿន។ លុះដល់ចំណុចចន្លោះបង្គោលគីឡូម៉ែត្រលេខ ២៧-២៨ ក្នុងភូមិអណ្ដូងច្រុះ ឃុំស្នំក្រពើ ស្រុកគងពិសី ខេត្តកំពង់ស្ពឺ រថយន្តនេះ បានបើកជែងរថយន្តដឹកទំនិញ ១ គ្រឿងទៀត ដែលធ្វើដំណើរក្នុងទិសដៅស្របគ្នា។
ប៉ុន្តែដោយខ្វះការប្រុងប្រយ័ត្ន រថយន្តដឹកអ្នកដំណើរនោះបានរេចង្កូតទៅចូលក្នុងគន្លងផ្លូវម្ខាងទៀត ដែលនៅខាងឆ្វេងនៃគំនូសពណ៌សពុះចែកទ្រូងផ្លូវ ខណៈរថយន្តដឹកស៊ីម៉ងត៍ម៉ាក HINO ពាក់ស្លាកលេខ ភ្នំពេញ 3A-5849 បើកបរពីត្បូងទៅជើងក្នុងល្បឿនលឿនដែរនោះ បានមកដល់ ហើយក៏បានបុកជាមួយរថយន្តដឹកអ្នកដំណើរនោះពេញមួយទំហឹងតែម្ដង។
លោក ភារិទ្ធ បានបន្តថា ក្រោយហេតុការណ៍គ្រោះថ្នាក់ អ្នកបើកបររថយន្តដឹកស៊ីម៉ងត៍បានរត់គេចខ្លួនពីកន្លែងកើតហេតុ។ ប៉ុន្តែលោកថា ពេលនោះកម្លាំងសមត្ថកិច្ចនគរបាលមូលដ្ឋានបានចុះអន្តរាគមន៍ដោយដឹកអ្នករបួសទៅកាន់មន្ទីរពេទ្យខេត្តកំពង់ស្ពឺ និងមន្ទីរពេទ្យក្នុងរាជធានីភ្នំពេញ ដើម្បីពិនិត្យព្យាបាលរបួស និងបានជួយទាក់ទងរកក្រុមគ្រួសារជនរងគ្រោះដែលស្លាប់ ដើម្បីមកទទួលយកសាកសពទៅធ្វើបុណ្យតាមប្រពៃណី។ដោយឡែក រថយន្តបង្កគ្រោះថ្នាក់ចរាចរណ៍ទាំង ២ ត្រូវបានកម្លាំងនគរបាលជំនាញនាំយកទៅរក្សាទុកនៅអធិការដ្ឋាននគរបាលស្រុកគងពិសី ដើម្បីមានចំណាត់ការបន្តទៅតាមនីតិវិធីច្បាប់។
តាមការបញ្ជាក់ពីលោក ភារិទ្ធ នៅពេលនេះក្រុមមន្ត្រីជំនាញកំពុងស្រាវជ្រាវរកអត្តសញ្ញាណ អ្នកបើកបររថយន្តដឹកស៊ីម៉ងត៍ ដើម្បីកោះអញ្ជើញមកឆ្លើយបំភ្លឺជុំវិញករណីកើតមានគ្រោះថ្នាក់ចរាចរណ៍នេះ៕
សមត្ថកិច្ចពេលជួយអ្នករបួសទៅកាន់មន្ទីរពេទ្យនៅយប់ថ្ងៃទី ៣១ ធ្នូ។ រូបថត ប៉ូលិស
