.jpg)
សត្វស្វា នៅតំបន់ឆ្នេរឯករាជ្យ ខេត្តព្រះសីហនុ កាលពីមិនទាន់ចាប់យកចេញ។ សហការី
ព្រះសីហនុៈ នៅតំបន់ឆ្នេរសមុទ្រខេត្តព្រះសីហនុ ពិសេសឆ្នេរឯករាជ្យ គេកត់សម្គាល់ឃើញមានដើមឈើចម្រុះប្រភេទ ដុះនៅប្របតាមបណ្ដោយឆ្នេរខ្សាច់ពណ៌មាស ជាមួយនឹងហ្វូងស្វារាប់សិបក្បាលដែលបានរស់នៅលើដើមឈើទាំងនោះ ដោយលោតតោងពីមែកឈើម្ខាងទៅមែកឈើម្ខាងយ៉ាងរហ័សរហួន។ ក្រៅពីការលម្ហែកាយ និងងូតទឹកសមុទ្រកម្សាន្តសប្បាយ ភ្ញៀវទេសចរក៏អាចគយគន់ទស្សនាអំពីភាពក្រមិចក្រមើមរបស់សត្វស្វាដ៏គួរឲ្យចាប់អារម្មណ៍ទាំងនោះផងដែរ។
ប៉ុន្តែ កាលពីពេលថ្មីៗនេះ សត្វស្វា ដែលតែងតែលោតចុះលោតឡើង និងរត់លេងនៅទីនោះ ត្រូវបានគេចាប់យកទៅដាក់នៅកន្លែងផ្សេងអស់ជាច្រើនក្បាលហើយ។ ប្រជាពលរដ្ឋក្នុងខេត្តព្រះសីហនុ និងភ្ញៀវទេសចរ ដែលធ្លាប់ទៅកម្សាន្តនៅក្នុងតំបន់ឆ្នេរខាងលើនោះ បាននិយាយថា ទស្សនីយភាពទាំងនោះ បានក្លាយជារឿងអតីតកាលទៅហើយ។
លោក ឆាំ សាវុធ អាយុ ៤៥ ឆ្នាំ ជាអ្នករស់នៅក្នុងសង្កាត់លេខ ៤ ក្រុងខេត្តព្រះសីហនុ បាននិយាយថា សត្វស្វាជាច្រើនក្បាលត្រូវបានគេចាប់យកចេញពីតំបន់នោះស្ទើរអស់ទៅហើយ ក្រោមហេតុផលថាសត្វស្វាទាំងនោះ បាន «រំខាន» ដល់មហាជនទូទៅ រួមទាំងទេសចរផងដែរ ពិសេសបានធ្វើឲ្យប៉ះពាល់ដល់សណ្ដាប់ធ្នាប់ និងរបៀបរៀបរយសាធារណៈ។
លោក សាវុធ ថ្លែងថា៖ «កាលពីមួយសប្ដាហ៍មុននេះ មានមនុស្សមួយក្រុម បានមកចាប់សត្វស្វាជាច្រើនក្បាល ពីក្នុងតំបន់នេះ ដោយប្រើថ្នាំសណ្ដំបាញ់ទៅលើពួកវា ប៉ុន្តែពួកគេមិនបានប្រាប់ឲ្យដឹងអំពីមូលហេតុនៃការបរបាញ់ចាប់យកស្វាទាំងនោះឡើយ»។
ចំណែក លោក អឿ វិបុល ប្រធានការិយាល័យទេសចរណ៍ខេត្តព្រះសីហនុ ប្រចាំតំបន់ឆ្នេរ បានលើកឡើងស្រដៀងគ្នានេះថា សត្វស្វាធំៗ ដែលធ្លាប់បង្អួតខ្លួនដល់ភ្ញៀវទេសចរជាតិ និងអន្តរជាតិ នាពេលកន្លងមកនោះ បានបាត់វត្តមានពីតំបន់នោះហើយ។
លោកថ្លែងថា៖ «យើងពិតជាមានការសោកស្ដាយផងដែរ នៅពេលដែលដឹងថាពួកវាត្រូវបានគេចាប់យកទៅកន្លែងផ្សេង។ ក្នុងវិស័យទេសចរណ៍ យើងចាត់ទុកសត្វស្វាគឺជាផ្នែកមួយនៃផលិតផលទេសចរណ៍ ភាពរប៉ិលរប៉ូចរបស់វា ធ្វើឲ្យទេសចរខ្នក់ខ្នាញ់ និងចង់គយគន់ទស្សនា ព្រមទាំងថតរូបរបស់វាទុកជាអនុស្សាវរីយ៍»។
បើតាមលោកវិបុល នៅតំបន់ឆ្នេរឯករាជ្យ នាពេលបច្ចុប្បន្ន គេស្ទើរតែពុំឃើញមានវត្តមានសត្វស្វាបង្ហាញខ្លួនតាមដើមឈើដូចមុនទៀតឡើយ។
ជុំវិញករណីនេះ លោក នេន ចំរើន ប្រធានមន្ទីរកសិកម្ម រុក្ខាប្រមាញ់និងនេសាទខេត្តព្រះសីហនុ កាលពីថ្ងៃអង្គារបានចេញសេចក្ដីជូនដំណឹងយ៉ាងបន្ទាន់មួយ ដើម្បីឆ្លើយបំភ្លឺទៅនឹងចម្ងល់របស់មហាជននៅក្នុងខេត្តនេះ។ នៅក្នុងលិខិតជូនដំណឹងនោះ លោកបានបញ្ជាក់ពីមូលហេតុនៃការចាប់សត្វស្វាចេញពីតំបន់ឆ្នេរឯករាជ្យនោះថា ដោយសារហ្វូងសត្វស្វាទាំងនោះបានបង្កការរំខានដល់មហាជន និងការធ្វើដំណើររបស់ប្រជាពលរដ្ឋ រួមទាំងទេសចរជាតិ និងអន្តរជាតិ។
ជាមួយគ្នានេះ លោក ចំរើន បានប្រាប់ភ្នំពេញប៉ុស្តិ៍ថា៖ «មន្ត្រីជំនាញរដ្ឋបាលព្រៃឈើមកពីឧទ្យានជាតិភ្នំតាម៉ៅ បានចុះចាប់សត្វស្វាបង្កការរំខានមួយចំនួនចេញ ដើម្បីរក្សាសុវត្ថិភាព និងសណ្ដាប់ធ្នាប់សាធារណៈ។ សត្វស្វាដែលត្រូវបានចាប់ចេញពីតំបន់ខាងលើនេះ ត្រូវបាននាំយកទៅលែងនៅក្នុងតំបន់ដែនជម្រកសុវត្ថិភាព សហគមន៍ព្រៃឈើវាល ស្ថិតក្នុងខេត្តពោធិ៍សាត់»។
ទោះជាយ៉ាងណា លោកចំរើន មិនបានប្រាប់ឲ្យដឹងអំពីចំនួនសត្វស្វា ដែលត្រូវបានចាប់ចេញពីតំបន់ខាងលើនោះទេ ប៉ុន្តែ លោក ព្រាប សុជាតិ មន្ត្រីជំនាញនៃឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ ដែលបានដឹកនាំក្រុមការងារចុះចាប់សត្វស្វាទាំងនោះ បានប្រាប់ភ្នំពេញប៉ុស្តិ៍នៅថ្ងៃម្សិលមិញថា សត្វស្វាដែលត្រូវបានចាប់ពីតំបន់ខាងលើមានចំនួនសរុប ៣០ ក្បាល។
លោកថា៖ «យើងចាប់តែស្វាណាដែលកាចៗតែប៉ុណ្ណោះ ព្រោះវាអាចបង្កបញ្ហាដល់ប្រជាពលរដ្ឋ និងទេសចរ ពិសេសកុមារតូចៗ។ នៅពេលនេះ ពួកវាត្រូវបានដោះលែងទៅក្នុងព្រៃការពាររបស់សហគមន៍ព្រៃឈើវាល ក្នុងខេត្តពោធិ៍សាត់ដោយសុវត្ថិភាព»។
ការចាប់សត្វស្វាទាំងនោះ លោក សុជាតិ បង្ហើបឲ្យដឹងដែរថា គឺតាមសំណើរបស់ម្ចាស់សណ្ឋាគារឯករាជ្យ ដែលបានអះអាងថា ហ្វូងស្វាទាំងនោះបានបង្កការរំខានដល់ភ្ញៀវរបស់ពួកគេ និងបំផ្លិចបំផ្លាញទ្រព្យសម្បត្តិឯកជនរបស់សណ្ឋាគារ ដែលរួមមានរុះរើដំបូល និងអំពូលភ្លើងរបស់សណ្ឋាគារជាដើម៕
