The Phnom Penh Post Search

Search form

Logo of Phnom Penh Post newspaper Phnom Penh Post - ស្វែង សុជាតា សុំ​ឲ្យ​សមត្ថកិច្ច​ផ្ដន្ទាទោស​ប្ដី​ក្រោយ​ប្រើ​ហិង្សា​លើ​ខ្លួន​ និង​កូន​របួស​ធ្ងន់




ស្វែង សុជាតា សុំ​ឲ្យ​សមត្ថកិច្ច​ផ្ដន្ទាទោស​ប្ដី​ក្រោយ​ប្រើ​ហិង្សា​លើ​ខ្លួន​ និង​កូន​របួស​ធ្ងន់

Content image - Phnom Penh Post
តារាសម្ដែង​អ្នកនាង ស្វែង សុជាតា ដែល​ត្រូវ​ប្ដី​ក្មេង​ប្រើ​ហិង្សា​លើ​នាពេល​កន្លង​មក​។ រូបថត ភ្នំពេញប៉ុស្តិ៍

ស្វែង សុជាតា សុំ​ឲ្យ​សមត្ថកិច្ច​ផ្ដន្ទាទោស​ប្ដី​ក្រោយ​ប្រើ​ហិង្សា​លើ​ខ្លួន​ និង​កូន​របួស​ធ្ងន់

ភ្នំពេញៈ តារា​សម្តែង​ដ៏ល្បី​អ្នកនាង ស្វែង សុជាតា កំពុង​រក​អន្តរាគមន៍​តាម​ផ្លូវ​ច្បាប់​ពី​អាជ្ញាធរ​មាន​សមត្ថកិច្ច​ដើម្បី​ស្វែងរក​មុខ​ប្តី​ក្រោយ​ទទួល​ខុស​ត្រូវ​ផ្លូវ​ច្បាប់​ក្រោយ​ផ្ទុះ​ករណី​ហិង្សា​ប្រើ​កាំបិត​ពូថៅ​លើ​ខ្លួន​ និង​កូនប្រុស​ជាង​មួយ​ខួប​​ពី​សំណាក់​​ភាគី​​ខាង​​ប្រុស​នេះ​កាលពី​ចុង​សប្តាហ៍​​។

អ្នកនាង សុជាតា ដែល​ថ្មីៗ​នេះ​បាន​លេច​មុខមាត់​ជា​តារា​សម្តែង​ដ៏សំខាន់​មួយ​ក្នុង​រឿង​សម័យ​ខ្មែរក្រហម​ផលិត​ដោយ​តារាសម្តែង​ហូលីវូដ អ្នកស្រី Angelina Jolie ដាច់​ចិត្ត​ទម្លាយ​រឿង​ហិង្សា​ក្នុង​គ្រួសារ ដែល​អ្នកស្រី​បាន​រួមរស់​ជាមួយ​ប្តី​ក្មេង​បាន ៣ ឆ្នាំ​មក​ហើយ និង​មាន​ចំណង​បុត្រ​មួយ​ផង​នោះ ពីព្រោះ​ដោយសារ​តែ​មិន​អាច​ទ្រាំ​រង​អំពើ​ហិង្សា​ដែល​ចុងក្រោយ​នេះ​បាន​កើត​នៅ​ថ្ងៃ​ទី ២២ មេសា​នេះ​នៅក្នុង​ផ្ទះ​ឯ​បុរី​ប៉េងហួត ផ្លូវ​ជាសុផារ៉ា ស្ថិត​ក្នុង​សង្កាត់​ច្រាំង​ចំរេះ ១ ខណ្ឌ​ឫស្សីកែវ។

សុជាតា និយាយ​ថា​​តាម​ពិត​រឿង​ហេតុ​វាយ​ធ្វើ​បាប​គាត់​រហូត​គាត់​របួស​ជា​ទម្ងន់​ហើម​មុខមាត់​ភ្នែក​មើល​លែង​ច្បាស់​បាន​កើតឡើង​តាំង​ពី​ថ្ងៃ​ ៩ មេសា​មក​ម្ល៉េះ​គឺ​កើត​នៅ សង្កាត់​កំពង់​សំណាញ់ ក្រុង​តាខ្មៅ ជា​ផ្ទះ​អ្នក​មើល​ថែ​កូន​របស់​អ្នកនាង ប៉ុន្តែ​នាង​មិន​បាន​ចង់​ទម្លាយ​ជា​សាធារណៈ​នោះ​ទេ ដោយសារ​ជា​ប្តី​ប្រពន្ធ​រួមរស់​ជាមួយ​គ្នា និង​មិន​ចង់​មាន​រឿង​វែង​ឆ្ងាយ។

សុជាតា ថ្លែង​ថា៖ «ថ្ងៃ​នោះ (៩ មេសា) ខ្ញុំ​ខល​ទៅ​គាត់ ព្រោះ​គាត់​ទៅ​ផឹក​នៅ​ក្រៅ​ម៉ាថ្ងៃ​ហើយ។ គាត់​យក​ឡាន​ទៅ​ហើយ​បើក​ឡាន​មិន​ស្ទាត់​ផង ខ្ញុំ​ខ្លាច​ស្រវឹង ខ្ញុំ​គិត​សុវត្ថិភាព​គាត់។ គាត់​ក៏​ស្រែក​និយាយ​ថា​ម៉េច​ង៉ែង ចង់​ម៉េច​មួយ​អញ»។

នាង​បន្ត​ថា៖ «ខ្ញុំ​ក៏​បាន​ឆ្លើយតប​ដោយ​ប្រើ​ពាក្យ​ «អញ» ដែល​ថា​មិន​ដែល​ប្រើ​សោះ​តាំងពី​រួមរស់​នឹង​គ្នា។ ខ្ញុំ​ក៏​ស្រែក​វិញ​ថា អញ​ខ្លាច​អ្ហែង​បើក​ឡាន​បុក​គេ»។

សុជាតា ថ្លែង​ថា៖ «គាត់​មក​ដល់​ផ្ទះ ស្រវឹង​ផង ម៉ោង​ជិត ៩ យប់ ក៏​បើក​ទ្វារ​ហើយ​មក​រក​ខ្ញុំ គាត់​ផ្តួល (ខ្ញុំ) នឹង​ឥដ្ឋ​ផ្ទះ យក​ជើង​ពាក់​ប៊ូ​ផង សង្កត់ ជាន់​ក​ខ្ញុំ​ជញ្ជ្រុំ​ហ្មង»។

ទោះ​យ៉ាង​ណា​គាត់​បាន​ដាក់​បណ្តឹង​នៅ​សង្កាត់​កំពង់សំណាញ់ ក្រុង​តាខ្មៅ ហើយ​អាជ្ញាធរ​បាន​ហៅ​មក​សម្រប​សម្រួល ដោយ​ឲ្យ​ប្តី​ផ្តិត​មេដៃ​ឈប់​ធ្វើបាប​បន្ត​ទៀត។ ដោយសារ​នឹក​អាណិត​ប្តី និង​មិន​ចង់​ឲ្យ​បែកបាក់​គ្នា ក៏​នាង​សម្រប​សម្រួល។ ប៉ុន្តែ​លើក​នេះ​គឺ​នាង​ស្នើសុំ​ឲ្យ​អាជ្ញាធរ​មាន​សមត្ថកិច្ច​ចាត់ការ​តាម​នីតិវិធី​ច្បាប់ ព្រោះ​ដល់​កាលពី​ថ្ងៃ​សៅរ៍ ប្តី​ក្មេង​នេះ​បាន​ដល់​ថ្នាក់​ប្រើ​កាំបិត ពូថៅ​គំរាម​យក​ជីវិត​នាង​ និង​កូនប្រុស គ្រាន់​តែ​នាង​រអ៊ូ​ពី​មុខ​របួស​ហើម​ឈឺចាប់​ដែល​មិន​ទាន់​ជា​កាលពី​វ៉ៃ​កាលពី​ថ្ងៃ​ ៩ មេសា នោះ។ បុរស​ជា​ប្តី​ឈ្មោះ ថោង សុខុម អាយុ ២៧ ឆ្នាំ គឺជា​គ្រូ​ផ្សំ​ថ្នាំ​ឱសថ​បុរាណ ធ្លាប់​បួស​ជា​លោក​សង្ឃ ប៉ុន្តែ​ សុជាតា ថា លោក​មាន​ចិត្ត​ឆេវឆាវ​ណាស់ និង​ពូកែ​គុំកួន​ណាស់​ថ្មីៗ​នេះ​មិន​ដូច​កាល​ពី​ពួកគេ​ទើប​ស្គាល់​គ្នា​ដំបូង ដែល​បុរស​រូប​នេះ​បាន​ផ្តល់​ដំបូន្មាន​ល្អៗ និង​ប្រើ​ពាក្យ​ផ្អែមល្ហែម​នោះ​ឡើយ។

នាង​ថា៖ «កាល​ក្រ ដូច​ទឹក និង​ត្រី តែ​ឥឡូវ​រកស៊ី​រីកចម្រើន​ទាំងអស់​គ្នា​ដូច​ទឹក និង​ប្រេង​អ៊ីចឹង​ពួកយើង»។

Content image - Phnom Penh Post

នាង​ក៏​បាន​និយាយ​ពី​ប្រផ្នូល​មិន​ល្អ​ដែល​រូបនាង និង​ប្តី​បាន​យល់​សប្តិ​ដែល​នាង​ហៅថា​ជា «គ្រោះ» ហើយ​ប្តី​បាន​យល់​សប្ដិ​ថា​ខ្លួនឯង​កំបុត​ក្បាល។

ស្នងការ​នគរបាល​ខេត្ត​កណ្តាល លោក អ៊ាវ ចំរើន បាន​ថ្លែង​ថា​លោក​មិន​បាន​ដឹង​ពី​ករណី​ហិង្សា​កើត​ក្នុង​ទឹកដី​តាខ្មៅ​ឡើយ​រវាង​ប្តីប្រពន្ធ​តារា​សម្តែង​ល្បី​ឈ្មោះ​រូប​នេះ ប៉ុន្តែ​លោក​បាន​លើក​ទឹកចិត្ត​ឲ្យ​អ្នកនាង​ សុជាតា មក​ប្តឹង​នៅ​ស្នងការដ្ឋាន​ផ្ទាល់​តែ​ម្តង។ នៅ​ភ្នំពេញ​លោក រឿន វន នាយនគរបាល​ប៉ុស្តិ៍​ច្រាំងចំរេះ ១ ថ្លែង​ថា​មន្ត្រី​នគរបាល​លោក​បាន​ទទួល​ពាក្យ​បណ្តឹង​អ្នកនាង សុជាតា កាលពី​ល្ងាច​ថ្ងៃ​សៅរ៍​ហើយ​នឹង​ចាត់ការ​បញ្ជូន​បន្ត។

លោក​ថ្លែង​ថា៖ «យើង​កំពុង​រៀបចំ​ឯកសារ​បញ្ជូន​ទៅ​អធិការដ្ឋាន​ខណ្ឌ»។

អ្នកនាង ស្វែង សុជាតា ឲ្យ​ដឹង​ផង​ដែរ​ថា​អ្នកនាង​នឹង​ស្វែងរក​ការ​ព្យាបាល​នៅ​ប្រទេស​ថៃ ដោយសារ​សភាព​ជំងឺ​មិន​ធូរស្រាល​សោះ​ដោយសារ​ភ្នែក​ចាប់ផ្តើម​ស្រវាំង ហើយ​ចុក​សៀតផ្កា​ខាង​ឆ្វេង​ទៀត​ផង។ ទាក់ទិន​នឹង​ករណី​ហិង្សា​នេះ​នៅ​អំឡុង​ខែ​វិច្ឆិកា ឆ្នាំ ២០១៦ កញ្ញា ពេជ្រ អាវីហ្សា ជា​តារាសម្តែង ក៏​ត្រូវ​បាន​សង្សារ​ជា​អ្នក​វាយ​ឡើង​ហើម​មុខមាត់​ផង​ដែរ ហើយ​សង្សារ​នាង​ត្រូវ​បាន​ឃាត់​ខ្លួន​បញ្ជូន​ទៅ​កាន់​ពន្ធនាគារ​ដោយ​ចោទ​ពី​បទ​ហិង្សា​ដោយ​ចេតនា។

អ្នកស្រី រស់ សុភាព នាយិកា​អង្គការ​យេនឌ័រ និង​ការ​អភិវឌ្ឍន៍​កម្ពុជា​ហៅ​កាត់ GAD-C បាន​សរសើរ​ដល់​ស្ត្រី​ជាពិសេស​ជា​តារា​ភាពយន្ត​ដ៏ល្បី ដែល​ហ៊ាន​ក្រោកឈរ​ប្រឆាំង​នឹង​អំពើ​ហិង្សា។

អ្នកស្រី​ថ្លែង​ថា៖ «វា​បង្ហាញ​ថា​នៅ​ពេល​មាន​អំពើ​ហិង្សា​ក្នុង​គ្រួសារ​ម្នាក់ៗ​តែង​សំដៅ​ទៅ​លើ​អ្នក​ក្រីក្រ និង​មិន​ចេះ​អក្សរ​តែ​ពេល​នេះ​បង្ហាញ​ថា​ករណី​នេះ​មិនមែន​តែ​លើ​អ្នក​ក្រ​ទេ តែ​អ្នក​មាន​ និង​គ្រួសារ​អ្នក​អភិជន​ក៏​មាន​បញ្ហា​ហ្នឹង​ដែរ»។

ហើយ​ការ​ផ្តល់​ការ​ផ្សះផ្សា​គឺជា​វប្បធម៌​ថ្នាក់​មូលដ្ឋាន ក្នុង​ករណី​ហិង្សា​ក្នុង​គ្រួសារ​ដែល​អ្នកស្រី​យល់​ថា «ខុស» មួយ ប៉ុន្តែ​អាជ្ញាធរ​គ្មាន​ជម្រើស​នោះ​ទេ ព្រោះ​ជា​ផុ្នត់​គំនិត​យូរ​មក​ហើយ។ ច្បាប់​ប្រឆាំង​អំពើ​ហិង្សា​គឺ​នៅ​តែ​មិន​អាច​ត្រូវ​គេ​អនុវត្ត​ឲ្យ​មាន​ប្រសិទ្ធភាព​នោះ​ទេ​ដរាប​ណា​មិន​មាន​ការ​លើក​ស្ទួយ​ក្នុង​ការ​បង្កើន​ថវិកា​ពី​រាជរដ្ឋាភិបាល៕ (រាយការណ៍​បន្ថែម Erin Handley)

អត្ថបទគួរចាប់អារម្មណ៍