The Phnom Penh Post Search

Search form




Logo of Phnom Penh Post newspaper Phnom Penh Post - ហាង​ទូរស័ព្ទ​មួយ​ត្រូវ​ចោរ​គាស់​ទ្វារ​លួច​អស់​រាប់​ម៉ឺន​$




ហាង​ទូរស័ព្ទ​មួយ​ត្រូវ​ចោរ​គាស់​ទ្វារ​លួច​អស់​រាប់​ម៉ឺន​$

ហាង​ទូរស័ព្ទ​មួយ​ត្រូវ​ចោរ​គាស់​ទ្វារ​លួច​អស់​រាប់​ម៉ឺន​$

ភ្នំពេញៈ ហាង​ជួសជុល​ទូរស័ព្ទ​ដៃ​សាំសុង​មួយ នៅ​តាម​មហាវិថី​ព្រះមុនីវង្ស ត្រូវ​ជន​សង្ស័យ​ជា​សន្តិសុខ​ក្រុមហ៊ុន​ឯកជន LPSA ដែល​មក​យាម​ពេល​យប់ លួច​គាស់​ទ្វារ​យក​ទូរស័ព្ទ​អស់​រាប់រយ​គ្រឿង និង​ប្រាក់​រាប់​ម៉ឺន​ដុល្លារ​ផង កាលពី​យប់​ថ្ងៃ​អាទិត្យ។

លោក ជួន ចិត្ត នាយប៉ុស្តិ៍​ចតុមុខ​ប្រាប់​ថា ហាង​ជួសជុល​ទូរស័ព្ទ​ដៃ​ម៉ាក​សាំសុង បាន​សង្ស័យ​ថា​សន្ដិសុខ​ឯកជន​របស់​ក្រុមហ៊ុន LPSA ដែល​ជួល​មក​យាម​ការពារ គាស់​សោ​ទ្វារ​ចូល​លួច​សម្ភារ​ក្នុង​ហាង​អស់​មួយ​ចំនួន​ធំ ក្នុង​នោះ​មាន​ទូរស័ព្ទ​និង​ប្រាក់​ដុល្លារ​មួយ​ចំនួន តែ​មិន​ដឹង​ថា អស់​ប៉ុន្មាន​ប្រាកដ​នោះ​ទេ​។ លោក​ថា ករណី​នេះ​ខាង​ក្រុមហ៊ុន​កំពុង​តែ​ពិចារណា​ដាក់​ពាក្យ​ប្តឹង? ដោយ​សារ​នៅ​រង់ចាំ​ការ​ស៊ើប​អង្កេត​ឲ្យ​បាន​ហ្មត់ចត់​សិន តែ​ខាង​សមត្ថកិច្ច​បាន​ចុះ​ទៅ​សួរ​នាំ​និង​កត់​ហេតុ​ពី​ក្រុមហ៊ុន​រួច​អស់​ហើយ។

លោក​បន្ត​ថា​ ៖ «ខាង​ក្រុមហ៊ុន​កំពុង​ពិនិត្យ​តាម​លក្ខណៈ​បច្ចេកទេស លើ​ក្រយៅ​ម្រាម​ដៃ​ក្នុង​ម៉ាស៊ីន​ស្គែន ដើម្បី​នឹង​កំណត់​រក​អត្ត​សញ្ញាណ​ជនជាប់​សង្ស័យ»។

បុគ្គលិក​ក្នុង​ក្រុមហ៊ុន​សុំ​មិន​ឲ្យ​ចេញ​ឈ្មោះ​ប្រាប់​ថា នៅ​ម៉ោង​៦ កន្លះ​ព្រឹក​ថ្ងៃ​ចន្ទ ពេល​បុគ្គលិក​មក​ធ្វើ​ការ​នៅ​អគារ​ក្រុមហ៊ុន​សាំសុង នៅ​ផ្ទះ​លេខ​៣១២ E០ នៅ​ផ្លូវ​ព្រះមុនីវង្ស សង្កាត់​ចតុមុខ ខណ្ឌ​ដូនពេញ ក៏​បាន​ឃើញ​ស្នាម​គាស់​ទ្វារ​របើក ហើយ​ទូរស័ព្ទ​ខាង​ក្នុង បាន​បាត់​អស់​ប្រមាណ​ជា​២០០​ទៅ​១​ពាន់​គ្រឿង ជាមួយ​នឹង​ប្រាក់​រាប់​ម៉ឺន​ដុល្លារ​ថែម​ទៀត។

បុគ្គលិក​រូប​នេះ​អះអាង​ថា រាល់​ការ​ប្តូរ​វេន​យាម​ភ្នាក់ងារ​សន្តិសុខ​ម្នាក់ៗ សុទ្ធ​តែ​មាន​ចុះ​វត្តមាន​ក្នុង​សៀវភៅ ហេតុ​នេះ សមត្ថកិច្ច​និង​ខាង​ក្រុមហ៊ុន អាច​ធ្វើ​ការ​ស្រាវជ្រាវ​តាម​នោះ​ឃើញ។

ស្ត្រី​បុគ្គលិក​ប្រាប់​ដែរ​ថា ជា​ដំបូង​គេ​ជនសង្ស័យ​ទៅ​លើ​ឈ្មោះ វឿន វណ្ណារិទ្ធ​ភេទ​ប្រុស អាយុ​២៥​ឆ្នាំ ជា​សន្ដិសុខ​ឯកជន​ក្រុមហ៊ុន LPSA នៅ​ភូមិ​រកា​លើ ឃុំ​ខ្ទប ស្រុក​ស្អាង ខេត្ដ​កណ្ដាល មាន​លំនៅ​អចិន្រៃ្តយ៍​ក្រុម​ទី១០ ភូមិ​ស្ដុក​ប្រវឹក ឃុំ​ព្រៃ​ត្រឡប់ ស្រុក​មោងឫស្សី ខេត្ដ​បាត់ដំបង។ សន្ដិសុខ​ម្នាក់​នេះ ត្រូវ​បញ្ជូន​ឲ្យ​មក​យាម​នៅ​ហាង​សាំសុង ក្នុង​ពេល​យប់​និង​ទើប​តែ​ចូល​ធ្វើ​ការ​បាន​៣​ថ្ងៃ និង​បាន​មក​យាម​ក្រុមហ៊ុន​បាន​ពីរ​ថ្ងៃ រាប់​ទាំង​ថ្ងៃ​កើត​ហេតុ។

ក្រោយ​កើត​ហេតុ សមត្ថកិច្ច​ជំនាញ​ចុះ​អង្កេត បាន​រក​ឃើញ​នៅ​នឹង​កន្លែង​កើត​ហេតុ មាន​រណា​អារ​ដែក សម្បក​សោ និង​មាន​ដែក​គាស់​មួយ​ផង។

ម្ចាស់​ក្រុមហ៊ុន​ពី​ម្សិលមិញ ត្រូវ​បុគ្គលិក​ប្រាប់​ថា មិន​អាច​ផ្តល់​ព័ត៌មាន​បាន​ទេ ព្រោះ​ជាប់​អតិថិជន​មក​រក​ទូរស័ព្ទ។ ឯ​ខាង​ក្រុមហ៊ុន​សន្តិសុខ LPSA មិន​អាច​ទាក់ទង​បាន​ទេ ពី​ម្សិលមិញ៕

អត្ថបទគួរចាប់អារម្មណ៍