The Phnom Penh Post Search

Search form

Logo of Phnom Penh Post newspaper Phnom Penh Post - ហេង ​សំរិន ​​អំពាវនាវ​ឲ្យ​សមាជិក​បក្ស​ប្រជាជន​ បន្ត​ឯកភាព​គ្នា​ផ្ទៃ​ក្នុង​បក្ស




ហេង ​សំរិន ​​អំពាវនាវ​ឲ្យ​សមាជិក​បក្ស​ប្រជាជន​ បន្ត​ឯកភាព​គ្នា​ផ្ទៃ​ក្នុង​បក្ស

លោក ហេង សំរិន ថ្លែង​​សុន្ទរកថា​នៅ​ក្នុង​ពិធី​រំឭក​ខួប​ ២ ធ្នូ​កាលពី​ម្សិលមិញ​។
លោក ហេង សំរិន ថ្លែង​​សុន្ទរកថា​នៅ​ក្នុង​ពិធី​រំឭក​ខួប​ ២ ធ្នូ​កាលពី​ម្សិលមិញ​។ ហេង ជីវ័ន

ហេង ​សំរិន ​​អំពាវនាវ​ឲ្យ​សមាជិក​បក្ស​ប្រជាជន​ បន្ត​ឯកភាព​គ្នា​ផ្ទៃ​ក្នុង​បក្ស

ភ្នំពេញៈ លោក ហេង សំរិន ប្រធាន​រដ្ឋសភា​ប្រធាន​កិត្តិយស​គណបក្ស​ប្រជាជន​ និង​ជា​ប្រធាន​ក្រុម​ប្រឹក្សា​ជាតិ​រណសិរ្ស​សាមគ្គី​អភិវឌ្ឍន៍​មាតុ​ភូមិ​កម្ពុជា​បាន​អំពាវនាវ​ដល់​សមាជិក​គណបក្ស​ប្រជាជន​គ្រប់​លំដាប់​​ថ្នាក់​បន្ត​រក្សា​សាមគ្គីភាព ​ឯកភាព​ផ្ទៃ​ក្នុង​បក្ស​ដើម្បី​ប្រទេស និង​ប្រជាពលរដ្ឋ​ខណៈ​ដែល​បច្ចុប្បន្ន​គណបក្ស​ប្រឆាំង​កាន់តែ​ក្លាយ​ទៅ​ជា​គូ​ប្រជែង​យ៉ាង​ស្រួច​ស្រាល់​ខ្លាំង​ឡើងៗ​ជាមួយ​នឹង​គណបក្ស​កាន់​អំណាច​យូរ​អង្វែង​មួយ​នេះ។

ថ្លែង​ក្នុង​មិទ្ទីញ​ខួប​អនុស្សាវរីយ៍​លើក​ទី ៣៧ ទិវា​កំណើត​រណសិរ្ស​សាមគ្គី​អភិវឌ្ឍន៍​មាតុភូមិ​កម្ពុជា​នៅ​ថ្ងៃ​ទី ២ ខែ​ធ្នូ ឆ្នាំ​ ២០១៥ លោក ហេង សំរិន បាន​រំឭក​ជា​ថ្មី​នូវ​ព្រឹត្តិការណ៍​ជាតិ និង​សារៈសំខាន់​ក្នុង​បុព្វ​ហេតុ​នៃ​ការ​រស់រាន​មាន​ជីវិត​ឡើង​វិញ​នៃ​មាតុភូមិ​កម្ពុជា​តាមរយៈ​រណសិរ្ស ២ ធ្នូ ដែល​ជា​ព្រឹត្តិការណ៍​រំដោះ​កម្ពុជា​ពី​របប​ប្រល័យ​ពូជសាសន៍ ប៉ុល ពត។

ទន្ទឹម​នឹង​ការ​ប្រកាស​ដឹង​គុណ​នូវ​ប្រវត្តិសាស្ត្រ​នេះ​លោក ហេង សំរិន ក៏​បាន​ថ្លែង​​សង្កត់​ធ្ងន់​ផង​ដែរ​​ថា៖ «បើ​គ្មាន​ថ្ងៃ​កំណើត​រណសិរ្ស ២ ធ្នូ និង​ជ័យជម្នះ ៧ មករា​ទេ​នោះ​យើង​ក៏​គ្មាន​អ្វីៗ​ដូច​សព្វ​ថ្ងៃ​នេះ​ដែរ​នេះ​គឺជា​សច្ចធម៌​នៃ​ប្រវត្តិសាស្ត្រ​»។

លោក ហេង សំរិន ក៏​បាន​អំពាវនាវ​ជាថ្មី​ទៅ​ដល់​គណៈកម្មាធិការ​គណបក្ស​ប្រជាជន​គ្រប់​ជាន់​ថ្នាក់​មន្ត្រី​រាជការ សមាជិក​សមាជិកា​នៃ​រណសិរ្ស​ឲ្យ​បន្ត​លើក​កម្ពស់​ស្មារតី​ថែរក្សា សាមគ្គីភាព ឯកភាព​ផ្ទៃក្នុង​ដោយ​ប្រកាន់​ខ្ជាប់​នូវ​ប្រពៃណី​ស្នេហា​ជាតិ​ផ្សារ​ភ្ជាប់​ជាមួយ​​ប្រជាជន។

លោក​បាន​គូស​បញ្ជាក់​​ថា៖ «ត្រូវ​ខិតខំ​បញ្ចេញ​ឲ្យ​អស់​កម្លាំង​ក្នុង​ការ​បម្រើ​ប្រទេស​​ជាតិ​តាម​មាគ៌ា​នយោបាយ​របស់​គណបក្ស​ប្រជាជន​កម្ពុជា និង​កម្មវិធី​នយោបាយ​របស់​រដ្ឋាភិបាល​ត្រូវ​ចងចាំ​ថា​នេះ​ជា​គោល​បំណង និង​ឧត្តម​គតិ​ឥត​ប្រែប្រួល​របស់​រណសិរ្ស និង​គណបក្ស​ប្រជាជន​កម្ពុជា»។

លោកស្រី ជា វណ្ណាត អ្នក​វិភាគ​ឯករាជ្យ​ដែល​មាន​វ័យ​ចំណាស់​បាន​សង្កេត​ឃើញ​ថា​បច្ចុប្បន្ន​នេះ​គណបក្ស​ប្រជាជន​ទទួល​បាន​ការ​គាំទ្រ​ច្រើន​តាមរយៈ​ការ​កែ​ទម្រង់​រចនាសម្ព័ន្ធ​ដឹកនាំ​នា​ប៉ុន្មាន​ឆ្នាំ​ចុង​ក្រោយ​នេះ​ប៉ុន្តែ​លោកស្រី​នៅ​តែ​យល់​ឃើញ​ថា​គណបក្ស​នេះ​អាច​នឹង​ប្រឈម​នឹង​ការ​បាត់បង់​សមាជិក ឬ​ការ​គាំទ្រ​ពី​មហាជន​បន្ត​ទៀត​ប្រសិន​បើ​បញ្ហា​មួយ​ចំនួន​នៅ​តែ​មិន​ត្រូវ​បាន​ដោះស្រាយ​។

លោកស្រី​ ជា វណ្ណាត បាន​បញ្ជាក់​ថា៖ «គណបក្ស​ប្រជាជន​គួរ​តែ​ដោះស្រាយ​ឲ្យ​បាន​នូវ​អំពើ​ពុករលួយ អយុត្តិធម៌​សង្គម និង​បញ្ហា​របស់​ពលរដ្ឋ​ដើម្បី​រក្សា​នូវ​សំឡេង​គាំទ្រ​ពី​ពលរដ្ឋ និង​ផ្តល់​គុណប្រយោជន៍​ដល់​សមាជិក​បក្ស​របស់​ខ្លួន។ ជាមួយ​គ្នា​នេះ​គណបក្ស​នេះ​ត្រូវ​ផ្លាស់ប្តូរ​នូវ​ផ្នត់​គំនិត​ប្រកាន់​សីលធម៌ និង​គុណធម៌​ឲ្យ​បាន​​សមរម្យ​ក្នុង​ការ​តតាំង​ជាមួយ​បក្ស​ប្រឆាំង និង​បក្ស​ផ្សេង​ទៀត​ដើម្បី​ឲ្យ​មហាជន​ទុក​ចិត្ត និង​បន្ត​គាំទ្រ»។

យ៉ាង​ណា​ក៏ដោយ​នៅក្នុង​មីទ្ទីញ​នោះ​លោក ហេង សំរិន ក៏​បាន​ថ្លែង​ដែរ​ថា​រណសិរ្ស​គាំទ្រ និង​ជំរុញ​ឲ្យ​រដ្ឋាភិបាល​ដែល​ដឹកនាំ​ដោយ​​គណបក្ស​ប្រជាជន​លុប​បំបាត់​នូវ​បាតុភាព​ល្មើស​ច្បាប់​នានា​ដូចជា​ការ​ទន្ទ្រាន​កាន់​កាប់​ដីធ្លី​ការ​កាប់​បំផ្លាញ​ព្រៃឈើ​បំផ្លាញ​ធនធាន​ជលផល​ការ​ធ្វើ​ឲ្យ​បាត់បង់​ចំនូល​រដ្ឋ​ការ​បំផ្លាញ​ហេដ្ឋារចនាសម្ព័ន្ធ និង​ការ​ធ្វើឲ្យ​បាត់បង់​សណ្តាប់​ធ្នាប់​សង្គម​ជាដើម។

«រណសិរ្ស​សាមគ្គី​អភិវឌ្ឍន៍​មាតុភូមិ​កម្ពុជា» ពី​មុន​មាន​ឈ្មោះ​រណសិរ្ស​សាមគ្គី​សង្គ្រោះ​ជាតិ​កម្ពុជា​ជា​អង្គការ​ចាត់​តាំង​មហាជន​មួយ​ឈាន​មុខ​របស់​គណបក្ស​ប្រជាជន​ត្រូវ​បាន​បង្កើត​ឡើង​នៅ​ថ្ងៃ​ទី ២ ខែ​ធ្នូ ឆ្នាំ ១៩៧៨ នៅ​តំបន់​រំដោះ​នា​ភូមិ​ជើង​ឃ្លូ ឃុំ​ ២ ធ្នូ ស្រុក​ស្នួល ខេត្ត​ក្រចេះ​ដើម្បី​ប្រមូល​ផ្តុំ​កម្លាំង​​មហា​សាមគ្គី​ជាតិ​ក្រោក​ឈរ​ផ្តួល​រំលំ​របប​កម្ពុជា​ប្រជាធិបតេយ្យ​ក្រោម​ការ​ជួយ​ឧបត្ថម្ភ​ពី​កងទ័ព​ស្ម័គ្រ​ចិត្ត​វៀតណាម​ និង​ទទួល​បាន​ជោគជ័យ​នា​ថ្ងៃ ៧ មករា​ឆ្នាំ ១៩៧៩៕

អត្ថបទគួរចាប់អារម្មណ៍