The Phnom Penh Post Search

Search form




Logo of Phnom Penh Post newspaper Phnom Penh Post - ហ៊ុន ​សែន ​​លើក​ករណី​ហ្វេសប៊ុក​ចំអក​ សម ​រង្ស៊ី

ហ៊ុន ​សែន ​​លើក​ករណី​ហ្វេសប៊ុក​ចំអក​ សម ​រង្ស៊ី

បុរស​ម្នាក់​កំពុង​មើល​ផេក​ ហ្វេសប៊ុក​របស់​លោក ហ៊ុន សែន។
បុរស​ម្នាក់​កំពុង​មើល​ផេក​ ហ្វេសប៊ុក​របស់​លោក ហ៊ុន សែន។ ហុង មិនា

ហ៊ុន ​សែន ​​លើក​ករណី​ហ្វេសប៊ុក​ចំអក​ សម ​រង្ស៊ី

ភ្នំពេញៈ លោក​នាយក​រដ្ឋមន្ត្រី ហ៊ុន សែន បាន​ចេញ​មុខ​បដិសេធ​ជា​លើក​ដំបូង​ថា​លោក​មិន​បាន​ទិញ​ចំនួន like ពី​ក្រុមហ៊ុន​ហ្វេសប៊ុក​នោះ​ទេ​ហើយ​ក៏​បាន​រិះគន់​ប្រធាន​គណបក្ស​ប្រឆាំង​លោក សម រង្ស៊ី ថា​ប្រកួត​ចាញ់​លោក​ហើយ​មិន​ព្រម​ទទួល​ចាញ់។

ក្នុង​ពិធី​ចែក​សញ្ញាបត្រ​ដល់​និស្សិត​សាកលវិទ្យាល័យ​ន័រតុន​ដែល​ធ្វើ​ឡើង​នៅ​កោះពេជ្រ​កាលពី​ម្សិលមិញ​លោក​នាយក​រដ្ឋមន្ត្រី​ថ្លែង​ថា​ចំនួន​ like ដែល​ចេះ​តែ​កើន​នៅលើ​ហ្វេសប៊ុក​លោក​ជា​បន្តបន្ទាប់​គឺ​បាន​មក​ដោយសារ​គេ​ចូលចិត្ត​ខណៈ​លោក​បដិសេធ​ថា​មិន​បាន​យក​លុយ​ទៅ​ទិញ​ចំនួន like នោះ​ទេ។ លោក​ថា​សូម្បី​តែ​ខ្លួន​លោក​ក៏​មិន​ដឹង​ថា​ចំនួន like នោះ​បាន​មកពី​ណា​ផង។ តែ​លោក​ថា​ បើ​មាន​គេ ​like ច្រើន​ជា​រឿង​ល្អ​សម្រាប់​នាយក​រដ្ឋមន្ត្រី​កម្ពុជា។

លោក​ថា៖ «ហើយ​ខ្ញុំ​ទៅ​ដឹង​អី​អាណា like មកពី​ណា​បើ​ខ្ញុំ​ទៅ​ទិញ like ពី​ឥណ្ឌា​បាន​ខ្លាំង​មែន​ហ្មង​ប៉ុន្តែ​ខ្ញុំ​សប្បាយ​ចិត្ត​ទៅ​វិញ​ទេ​សប្បាយ​ចិត្ត​ត្រង់​ថា​ខ្ញុំ​ ហ៊ុន សែន ត្រូវ​បាន​ប្រជាជន​ឥណ្ឌា និង​ប្រជាជន​នៅ​ក្រៅ​ប្រទេស​ទទួល​ស្គាល់​ថា​ជា​នាយក​រដ្ឋមន្ត្រី​របស់​កម្ពុជា។

លោក​ថា៖ «នាយក​រដ្ឋមន្ត្រី​ខ្មែរ ខ្មែរ​ខ្វល់​ពេញ​ប្រទេស​ថែម​ទាំង​បរទេស​គេ​ជួយ like ហើយ​ម៉េច​មិន​ស្វាគមន៍​ទាល់​តែ​គេ​ជេរ ហ៊ុន សែន បាន​ស្វាគមន៍​ឬ​ម៉េច?»។

លោក​ ហ៊ុន សែន ក៏​បាន​ថ្លែង​បែប​ចំអក​ឱ្យ​លោក សម រង្ស៊ី ផង​ដែរ​ថា៖ «យី​លោក​ប្រធាន​អើយ ទណ្ឌិត​អើយ មើល​ឱ្យ​ល្មម​បាន​ទេ ចាញ់​គេ​មិន​ព្រម​ចាញ់​ទេ ពី​ដើម​ទៅ​ប្តឹង​គណៈកម្មាធិការ​ជាតិ​រៀបចំ​ការ​បោះឆ្នោត​ (ថា​មាន​ភាព​មិន​ប្រក្រតី​រឿង​បោះឆ្នោត​ឆ្នាំ ២០១៣​) តិច​ទៀត​ទៅ​ជេ​ហ្វេសប៊ុក​ហើយ»។

បច្ចុប្បន្ន​ចំនួន like របស់​លោក​នាយក​រដ្ឋមន្រ្តី​មាន​ ៣, ២៦៧,៥៧១ ខណៈ​ចំនួន like របស់​លោក សម រង្ស៊ី មាន​ចំនួន ២,២៧៩,៨២៦ គិត​ត្រឹម​ម៉ោង ៣ ​និង​ ៣៥ នាទី រសៀល​កាលពី​ថ្ងៃ​ពុធ​ម្សិលមិញ។

ការ​ចេញ​បដិសេធ​របស់​លោក​ ហ៊ុន សែន ​នេះ​បន្ទាប់​ពី​កាសែត​ភ្នំពេញ​ប៉ុស្តិ៍​ថ្មីៗ​នេះ​បាន​ដក​ស្រង់​ពី​គេហទំព័រ​វិភាគ​មួយ​ឈ្មោះ socialbakers.com បាន​បង្ហាញ​អំពី​ចំនួន​អ្នក​គាំទ្រ​លោក ហ៊ុន សែន ថា​ជាង ៧០ ​ភាគរយ​គឺ​មក​ពី​ក្រៅ​ប្រទេស។

ក្រោយ​មក​ប្រធាន​គណបក្ស​ប្រឆាំង​លោក សម រង្ស៊ី បាន​បង្ហោះ​លើ​ហ្វេសប៊ុក​របស់​លោក​ដោយ​ភ្ជាប់​ជាមួយ​អត្ថបទ​ ​ភ្នំពេញ​ ប៉ុស្តិ៍ ​ថា​៖ «ការ​រកឃើញ like ក្លែងក្លាយ​លើ​ទំព័រ facebook របស់​ ហ៊ុន សែន។ «​Like មួយ​ចំនួន​ធំ​ដែល​បង្ហាញ​លើ​ទំព័រ​នេះ​គឺ​បាន​មកពី​ការ​ទិញ ឬ​ជួល​មនុស្ស​ក្រីក្រ​ដែល​អត់​ការងារ​ធ្វើ​ឲ្យ​បង្កើត accounts Facebook ក្លែងក្លាយ​ដើម្បី​ផ្តល់ Likes សិប្បនិម្មិត ក្លែង​បន្លំ ជូន​សម្តេច»។

លោក សម រង្ស៊ី បាន​ថ្លែង​តាម​អ៊ីមែល​កាលពី​ម្សិលមិញ​ដោយ​ចំអក​ដាក់​លោក​ ហ៊ុន សែន វិញ​ថា​លោក​ ហ៊ុន សែន កំពុង​ធ្វើឲ្យ​ករណី​របស់​គាត់​កាន់តែ​អាក្រក់​ឡើង​ដោយសារ​ភ័ស្តុតាង​​នៃ​ការ​ទិញ​ likes ក្លែងក្លាយ​របស់​គាត់​​ដែល​មិន​អាច​ប្រកែក​បាន​។

លោក​បញ្ជាក់​ថា​៖ «​ហេតុ​ដូច្នេះ​ការ​ប្រៀបធៀប​ដែល​ធ្វើ​ឡើង​រវាង​​ហ្វេសប៊ុក​​របស់​គាត់​​ និង​​លទ្ធផល​បោះឆ្នោត​គឺជា​ការ​វាយប្រហារ​ត្រឡប់​ទៅ​គាត់​វិញ។ ប្រាកដ​ណាស់​ចំនួន​ likes ច្រើន​ខ្លាំង​នៅ​លើ​ហ្វេសប៊ុក​របស់​គាត់​គឺ​ដោយសារ​ការ​បោកប្រាស់​ (likes ក្លែងក្លាយ)។

លោក​ សម រង្ស៊ី បាន​លើក​ឡើង​ថា​ជ័យជម្នះ​ក្នុង​ការ​បោះឆ្នោត​របស់​លោក ហ៊ុន សែន គ្មាន​អ្វី​សង្ស័យ​ទេ​គឺ​បាន​ដោយសារ​ការ​បោកប្រាស់​សន្លឹក​ឆ្នោត​ក្លែងក្លាយ ឬ​ទិន្នន័យ​ក្លែងក្លាយ​។

លោក​ សម រង្ស៊ី បន្ត​ថា៖ «​ខណៈ​​គាត់​គួរ​តែ​​ការពារ​កិត្តិយស​របស់​គាត់​ចំពោះ​ការ​ចោទប្រកាន់​នេះ​ខ្ញុំ​សូម​ឲ្យ​គាត់​សុំ​ការ​បំភ្លឺ​ពី​ក្រុមហ៊ុន​ហ្វេសប៊ុក​ដែល​មាន​មូលដ្ឋាន​នៅ​អាមេរិក​ពាក់ព័ន្ធ​នឹង​ «​likes» ​ដែល​គាត់​ប្រមូល​បាន​ទូទាំង​​ពិភពលោក​ក្នុង​រយៈកាល​ ១២ ​ខែ​ចុងក្រោយ​នេះ​។ រវាង​យើង​ចំនួន​ likes ដែល​គួរ​ឲ្យ​អស់​សំណើច​បំផុត​គឺ​មកពី​ប្រទេស​ឥណ្ឌា​»៕ PS

អត្ថបទគួរចាប់អារម្មណ៍