The Phnom Penh Post Search

Search form




Logo of Phnom Penh Post newspaper Phnom Penh Post - ហ្វេសប៊ុក​លោក​ អេង ឆៃអ៊ាង ​ត្រូវ​គេ​លួច​ចូល




ហ្វេសប៊ុក​លោក​ អេង ឆៃអ៊ាង ​ត្រូវ​គេ​លួច​ចូល

Content image - Phnom Penh Post
លោក អេង ឆៃអ៊ាង ពេលផ្តល់​បទ​សម្ភាស​ជាមួយ​អ្នកសារព័ត៌មាន កន្លង​មក។ ហុង មិនា

ហ្វេសប៊ុក​លោក​ អេង ឆៃអ៊ាង ​ត្រូវ​គេ​លួច​ចូល

ភ្នំពេញៈ ប៉ុន្មាន​ម៉ោង​បន្ទាប់ពី​​ត្រូវ​​បាន​​​ជ្រើសរើស​​ធ្វើ​ជា​អនុប្រធាន​គណបក្ស​សង្គ្រោះ​ជាតិ​ដែល​នឹង​ធ្វើ​សមាជ​នៅ​ថ្ងៃ​នេះ​ហ្វេសប៊ុក​របស់​តំណាងរាស្រ្ត អេង ឆៃអ៊ាង ត្រូវ​បាន​ជនអនាមិក​លួច​​ចូល​​ដោយ​បាន​បង្ហោះ​នូវ​​រឿង​អាក្រក់​ៗ​ជាច្រើន​​​រួម​ទាំង​​រឿង​អាស្រូវ​​របស់​មេដឹកនាំ​គណបក្ស​ប្រឆាំង​។

ប្រាប់​ភ្នំពេញ​ប៉ុស្តិ៍​​កាលពី​ម្សិលមិញ​ លោក អេង ឆៃអ៊ាង អះអាង​ថា​លោក​មាន​ការ​​ភ្ញាក់ផ្អើល​​នៅ​ពេល​គណនី​ហ្វេសប៊ុក​របស់​លោក​ត្រូវ​បាន​គេ​លួច​ចូល​ហើយ​​ត្រូវ​បាន​បង្ហោះ​រឿង​ផ្តេសផ្តាស ហើយ​លោក​កំពុង​ប្រាប់​ទៅ​ក្រុមហ៊ុន​ហ្វេសប៊ុក​​ដើម្បី​ចាត់ការ​​ និង​ដោះស្រាយ​បញ្ហា​នេះ​ហើយ​ក៏​បាន​ប្រកាស​ជា​សាធារណៈ​ទៅ​អាជ្ញាធរ​​ថា​ លោក​​មិន​ទទួល​ខុស​ត្រូវ​​ចំពោះ​​ការ​ប្រើប្រាស់​ និង​ការ​បង្ហោះ​​រឿង​មិន​ពិត​ណា​មួយ​នៅលើ​ទំព័រ​ហ្វេសប៊ុក​នេះ​ទេ​។ «​​បន្ទាប់ពី​ទំព័រ​​ និង​គណនី​របស់​ខ្ញុំ​ត្រូវ​គេ​​​​​លួច​ចូល​​ពួកគេ​បាន​យក​ទំព័រ​របស់​ខ្ញុំ​ចែកចាយ​​​ និង​បង្ហោះ​​​​​ព័ត៌មាន​ផ្តេសផ្តាស​ដែល​ជា​ព័ត៌មាន​ហៅ​ថា​ព័ត៌មាន​​មិន​ត្រឹមត្រូវ​​»។ «​​អ្វី​ដែល​ខ្ញុំ​​បាន​សរសេរ​​នៅ​ក្នុង​ទំព័រ​​របស់​ខ្ញុំ​ ខ្ញុំ​បង្ហោះ​​​តែ​សកម្មភាព​ការងារ​​របស់​ខ្ញុំ​​តែ​ប៉ុណ្ណោះ​។ ខ្ញុំ​មិន​និយាយ​ថា​វា​ជា​រឿង​នយោបាយ​ទេ ខ្ញុំ​ចាត់​ទុក​​​ក្រុម​នោះ​​ជា​​ជន​ខិលខូច​ដែល​មាន​គំនិត​អាក្រក់​ចង់​ធ្វើ​បាប​​ខ្ញុំ​»។​

លោក ឆៃអ៊ាង បន្ថែម​ថា ​តាមរយៈ​ការ​លួច​ចូល​ក្នុង​ហ្វេសប៊ុក​របស់​លោក​បុគ្គល​​នោះ​​​​អាច​ចង់​ភ្ជាប់​លោក​ទៅ​ពាក់ព័ន្ធ​​ជាមួយ​បទ​ចោទប្រកាន់​ណា​មួយ​ដើម្បី​​​បង្កើត​បទល្មើស​ទម្លាក់​មក​​លើ​រូប​លោក​​​ដើម្បី​ឲ្យ​​មាន​ចំណាត់ការ​​ផ្លូវ​ច្បាប់​​។ ​«​​ក្នុង​នាម​យើង​ជា​ខ្មែរ​ដូច​គ្នា​យើង​គួរ​ធ្វើ​អ្វី​​មាន​ភាព​ស្មោះត្រង់​​ដើម្បី​សង្គម​ជាតិ​យើង​​ដើម្បី​​មាន​តម្លៃ​សីលធម៌​»​។

នៅលើ​គណនី​ហ្វេសប៊ុក​របស់​លោក ឆៃអ៊ាង ដែល​ត្រូវ​បាន​លួច​ចូល​ និង​​ប្រើប្រាស់​កាលពី​ម្សិលមិញ​បាន​បង្ហាញ​ថា​លោក ឆៃអ៊ាង មិន​ពេញ​ចិត្ត​នឹង​​​ប្រធាន​ស្តីទី​របស់​គណបក្ស​សង្គ្រោះ​ជាតិ លោក កឹម សុខា។ ​

នៅ​លើ​ហ្វេសប៊ុក​របស់​លោក​​សរសេរ​ថា​៖ «​ឲ្យ​ខ្ញុំ​ទ្រាំ​​បម្រើ​​មនុស្ស​ធុន​នេះ​​រហូត​ដល់​ពេល​ណា លោក កឹម សុខា យក​ទីស្នាក់ការ​​​គណបក្ស​នៅ​ចាក់​អង្រែ​លើ​​ធ្វើ​ជា​ផ្ទះ​​សំណាក់​»។

គណនី​ហ្វេសប៊ុក​​របស់​លោក ឆៃអ៊ាង ក៏​​ត្រូវ​បាន​ប្រើ​ដើម្បី​ចែកចាយ​គណនី​ហ្វេសប៊ុក​​របស់​លោកស្រី ចំរើន សកម្មជន​នយោបាយ​​ដែល​គាំទ្រ​គណបក្ស​ប្រជាជន​ផង​ដែរ​ដោយ​បង្ហាញ​អំពី​​ការ​សន្ទនា​រវាង​​លោក​នាយក​រដ្ឋមន្រ្តី ហ៊ុន សែន ​និង​​សកម្មជន​​នយោបាយ​កញ្ញា ធី សុវណ្ណថា ប៉ុន្តែ​មិន​បាន​​បង្ហាញ​អត្ថន័យ​ពេញ​នៃ​ការ​សន្ទនា​នេះ​ទេ​។

ពាក់ព័ន្ធ​នឹង​សមាជ​ថ្ងៃ​នេះ​ដើម្បី​អនុម័ត​​បញ្ជី​បេក្ខភាព​​ទាំង​​បី​រូប​​នៃ​អនុប្រធាន​​គណបក្ស​សង្គ្រោះ​ជាតិ​ និង​ប្រធាន​លោក ឆៃអ៊ាង បាន​បញ្ជាក់​ថា​សមាជ​ថ្ងៃ​នេះ​គឺ​ដើម្បី​បោះឆ្នោត​ដោយ​​​​ការ​លើក​ដៃ​​ ដើម្បី​ផ្តល់​ទំនុក​ចិត្ត​លើ​បេក្ខជន​ទាំងអស់​ដើម្បី​ក្លាយ​ជា​​មេដឹកនាំ​គណបក្ស​សង្គ្រោះ​ជាតិ​។ «​​ខ្ញុំ​មាន​ជំនឿ​ [ថា​គណបក្ស​​សង្គ្រោះ​ជាតិ​មាន​ភាព​រឹងមាំ​ជាង​មុន​]។ អ្វី​ដែល​ [ប្រជាពលរដ្ឋ​] ចង់​បាន​​គឺ​សុំ​ឲ្យ​ [គណបក្ស​សង្គ្រោះ​ជាតិ​] ​ឲ្យ​មាន​ភាព​រឹងមាំ មិន​បែកបាក់​»​៕ PS

អត្ថបទគួរចាប់អារម្មណ៍