ភ្នំពេញៈ គ្រូបង្រៀនម្នាក់បានស្លាប់ និងមនុស្ស ៥ នាក់រងរបួសស្រាល និងធ្ងន់ដោយសាររថយន្តក្រឡុកស៊ីម៉ងត៍មួយគ្រឿងបើកបុករះម៉ូតូចំនួន ៦ គ្រឿងនិងម៉ូតូកង់បី ១ គ្រឿង កាលពីព្រឹកថ្ងៃទី ២០ កុម្ភៈ ស្ថិតនៅខាងមុខវិទ្យាល័យបឹងត្របែក សង្កាត់ទន្លេបាសាក់ ខណ្ឌចំការមន។ នេះបើតាមការបញ្ជាក់ពីមន្ត្រីនគរបាលចរាចរណ៍។
លោក ប៉ែន ឃុន នាយរងការិយាល័យចរាចរណ៍ផ្លូវគោកប្រាប់ភ្នំពេញប៉ុស្ដិ៍ម្សិលមិញថា អ្នកបើកបររថយន្តក្រឡុកស៊ីម៉ងត៍ហើយដែលគេស្គាល់ថា ជាក្រុមហ៊ុនស៊ីម៉ងត៍ឈ្មោះ អេសស៊ីជី ខនគ្រីតត្រូវបានឃាត់ខ្លួនដើម្បីកសាងសំណុំរឿង និងត្រូវបញ្ជូនទៅសាលាដំបូងរាជធានីភ្នំពេញនៅថ្ងៃនេះ។
លោក ប៉ែន ឃុន បន្តថា បើតាមចម្លើយសារភាពពីអ្នកបើកបរឱ្យដឹងថា មូលហេតុនៃការបុករះនេះគឺដោយសារហ្រ្វាំងរថយន្តមិនដំណើរការ។
លោកថា៖ «រថយន្តហ្នឹងបើតាមចម្លើយសារភាពរបស់អ្នកបើកបរគាត់ឆ្លើយថាហ្រ្វាំងវាអត់ស៊ី អ៊ីចឹងវាអាចចូលខ្យល់ចូលអីអ៊ីចឹងណា៎ ជាន់ខុសៗ ហើយស្ទះទើមៗហ្នឹង»។
បើតាមការចុះផ្សាយពីសារព័ត៌មានមួយចំនួនដែលស្រង់សម្ដីសាក្សីឃើញហេតុការណ៍បានឱ្យដឹងថា នៅវេលាម៉ោង ៨ ព្រឹក ថ្ងៃម្សិលមិញ រថយន្តម៉ាក Hino ពណ៌ស ពាក់ស្លាកលេខព្រះសីហនុ ៥A-០១៤៣ ជារថយន្តក្រឡុកស៊ីម៉ងត៍របស់ ក្រុមហ៊ុនអេសស៊ីជី បានបើកបរក្នុងល្បឿនលឿនតាមបណ្ដោយផ្លូវព្រះមុនីវង្ស ហើយមកដល់ខាងមុខវិទ្យាល័យបឹងត្របែក ស្រាប់តែចាប់ ហ្រ្វាំងមិនជាប់ ក៏ជ្រុលទៅបុកអ្នកដំណើរតាមម៉ូតូនិងកង់បីអស់ជាច្រើនគ្រឿង។
ក្រោយកើតមានករណីនេះ លោក ផេង សុវណ្ណារ៉ា នាយកវិទ្យាល័យបឹងត្របែកបានចេញសេចក្ដីជូនដំណឹងបញ្ជាក់ថាលោក សុខ ទែល ជាគ្រូបង្រៀនសាលាបឹងត្របែក ដែលទទួលរងគ្រោះថ្នាក់ពីការបុករថយន្តក្រឡុកស៊ីម៉ងត៍នៅពេលធ្វើដំណើរមកបង្រៀន គឺបានទទួលមរណភាព។
ទោះបីជាយ៉ាងណា បើតាមបម្រាមសាលារាជធានីភ្នំពេញអនុវត្តតាំងពីឆ្នាំ ២០១៣ ឱ្យដឹងថា ដើម្បីការពារការកកស្ទះចរាចរណ៍ និងបញ្ចៀសការគ្រោះថ្នាក់ចរាចរណ៍ គឺពុំអនុញ្ញាតឱ្យរថយន្តធុនធ្ងន់គ្រប់ប្រភេទបើកបរចូលក្នុងក្រុងនៅអំឡុងចាប់ពីម៉ោង ៥ ព្រឹកដល់ម៉ោង ៩ យប់ឡើយ។
លោក ស ថេត ស្នងការរាជធានីភ្នំពេញ បានប្រាប់ភ្នំពេញប៉ុស្ដិ៍នៅថ្ងៃម្សិលមិញថា ប្រសិនបើអាជ្ញាធរមិនអនុញ្ញាតឱ្យរថយន្តក្រឡុកស៊ីម៉ងត៍ចូលមកក្នុងក្រុងនៅម៉ោងហាមឃាត់ទេ វានឹងអាចធ្វើឱ្យគាំងចំពោះការអភិវឌ្ឍផ្នែកសំណង់នៅទីក្រុង ប៉ុន្តែលោកថា លោកមិនគាំទ្រចំពោះអ្នកបើកបរដោយព្រហើន មិនគោរពច្បាប់ឡើយ។
លោក ស ថេត អះអាងថា ជនបើកបរឡានស៊ីម៉ងត៍បង្កគ្រោះថ្នាក់កាលពីម្សិលមិញ នឹងត្រូវបញ្ជូនទៅដាក់គុក បើទោះជាមានអ្នកជួយអន្តរាគមន៍ ក៏លោកមិនព្រមឡើយ។
លោកបន្តថា៖ «ប៉ុន្តែអាឡានធំៗខុសពីឡានក្រឡុកស៊ីម៉ងត៍យើងហាមហើយ ក៏ប៉ុន្តែវាមិន ទាន់បាន ១០០% ទេ ដោយសារកន្លែងខ្លះគេអនុញ្ញាតដូចជា ចម្ការដូងយើងទៅហាមយ៉ាងម៉េច បើសុទ្ធតែរោងចក្រនៅហ្នឹង អ៊ីចឹងយើងត្រូវគិតគូរសមធម៌ឬក៏យុត្តិធម៌សងខាង»។
លោក ស ថេត បញ្ជាក់ថា បន្ទាប់ពីមានករណីរថយន្តក្រឡុកស៊ីម៉ងត៍ពីថ្ងៃម្សិលមិញបង្កគ្រោះថ្នាក់នេះ លោកជាមួយលោកឃួង ស្រេង អភិបាលរាជធានីបាននាំគ្នាគិតពិចារណាឡើងវិញអំពីផ្លូវណាដែលអាចគួរអនុញ្ញាតឱ្យរថយន្តក្រឡុកស៊ីម៉ងត៍បើកបរចូលក្នុងក្រុងបាន ដើម្បីកុំឱ្យរាំងស្ទះចំពោះការអភិវឌ្ឍ ស្របពេលសំណង់សណ្ឋាគារ និងខុនដូកំពុងកើនឡើងយ៉ាងខ្លាំង។
ប៉ុន្តែលោក គង់ រតនៈ អនុប្រធានវិទ្យាស្ថានសុវត្ថិភាពចរាចរណ៍យល់ឃើញថា បើទោះជាមិនអាចទប់ស្កាត់រថយន្តធំៗបើកបរចូលក្នុងក្រុងប៉ុន្តែអាជ្ញាធរគួរមានវិធានការរឹតបន្តឹង៕