The Phnom Penh Post Search

Search form




Logo of Phnom Penh Post newspaper Phnom Penh Post - ឡាន​ក្រុង​ សន្យា​មិន​ដំឡើង​ថ្លៃ​សំបុត្រ​ចូល​ឆ្នាំ

ឡាន​ក្រុង​ សន្យា​មិន​ដំឡើង​ថ្លៃ​សំបុត្រ​ចូល​ឆ្នាំ

Content image - Phnom Penh Post
ចំណត​ឡាន​ក្រុង​នៅ​រាជធានី​ភ្នំពេញ។ ហុង មិនា

ឡាន​ក្រុង​ សន្យា​មិន​ដំឡើង​ថ្លៃ​សំបុត្រ​ចូល​ឆ្នាំ

ភ្នំពេញ: ក្រុមហ៊ុន​ដឹក​ជញ្ជូន​អ្នក​ដំណើរ​ចំនួន ២៩ បាន​សន្យា​ជាមួយ​រដ្ឋាភិបាល​ថា​នឹង​មិន​ដំឡើង​ថ្លៃ​លក់​សំបុត្រ​រថយន្ត​សម្រាប់​អ្នក​ដំណើរ​ទាំង​ទៅ​ទាំង​មក​នៅ​ក្នុង​ឱកាស​ចូលឆ្នាំ​ខ្មែរ​ប្រពៃណី​ជាតិ​ក្នុង​គោលបំណង​សម្រួល​ដល់​ប្រជាពលរដ្ឋ​ខ្មែរ​ដែល​តែងតែ​ចាកចេញ​ពី​ក្រុង​ភ្នំពេញ​ឆ្ពោះ​ទៅ​ស្រុក​កំណើត​ជួបជុំ​ក្រុម​គ្រួសារ និង​ចូលរួម​សប្បាយ​ជាមួយ​នឹង​ល្បែង​ប្រជាប្រិយ​ដែល​មាន​នៅ​តាម​តំបន់​របស់​ពួកគេ​រាងៗ​ខ្លួន។

ការ​សម្រេច​មិន​ដំឡើង​ថ្លៃ​របស់​ក្រុមហ៊ុន​បាន​ធ្វើ​ឡើង​កាលពី​ម្សិលមិញ​បន្ទាប់ពី​ក្រសួង​សាធារណការ និង​ដឹក​ជញ្ជូន​បាន​កោះប្រជុំ​ជាមួយ​តំណាង​ក្រុមហ៊ុន​ដឹកជញ្ជូន​អ្នក​ដំណើរ​ជុំវិញ​តម្លៃ​សំបុត្រ​នា​ឱកាស​បុណ្យ​ចូលឆ្នាំ​ខ្មែរ ហើយ​តំណាង​ក្រុមហ៊ុន​ដឹក​ជញ្ជូន​អ្នក​ដំណើរ​ទាំង​នោះ​បាន​សន្យា​ថា​នឹង​មិន​ដំឡើង​ថ្លៃ​សំបុត្រ​រថយន្ត​នា​អំឡុង និង​ក្រោយ​បញ្ចប់​ពិធី​បុណ្យ​ចូលឆ្នាំ​ខ្មែរ។

ក្រសួង​សាធារណការ និង​ដឹកជញ្ជូន​ក៏​បាន​ដាក់​ចេញ​នូវ​លក្ខខណ្ឌ​មួយ​ចំនួន​ដូចជា​រក្សា​តម្លៃ​ដឹក​ជញ្ជូន​អ្នក​ដំណើរ​ឲ្យ​នៅ​ដដែល​មិន​ត្រូវ​ផ្ទុក​អ្នក​ដំណើរ​លើស​ចំណុះ និង​ខុស​លក្ខណៈ​បច្ចេកទេស​គោរព​ឲ្យ​បាន​ខ្ជាប់ខ្ជួន​នូវ​ច្បាប់​ចរាចរណ៍​ផ្លូវគោក ពិសេស​មិន​ត្រូវ​បើកបរ​លើស​ល្បឿន​កំណត់ និង​បើកបរ​ដោយ​ភាព​យោគយល់​ និង​អធ្យាស្រ័យ​គ្នា។

លោក តូច ចាន់កុសល រដ្ឋលេខាធិការ​ក្រសួង​សាធារណការ និង​ដឹក​ជញ្ជូន​បាន​ថ្លែង​ថា​ក្រុមហ៊ុន​ដឹក​ជញ្ជូន​ទាំង ២៩ ក្រុមហ៊ុន​គឺជា​ក្រុមហ៊ុន​ដែល​បាន​ចុះ​បញ្ជិកា​ជាមួយ​ក្រសួង។

លោក ចាន់កុសល បាន​ថ្លែង​ថា៖ «យើង​យល់​ឃើញ​ថា​ខាង​ក្រុមហ៊ុន​ហាក់បី​ដូចជា​មាន​ការ​ភ្ញាក់​រឭក​ដោយ​សន្យា​មិន​ដំឡើង​ថ្លៃ​សំបុត្រ​ព្រោះ​ពួកគាត់​ក៏​មិន​ចង់​ឃើញ​រដ្ឋាភិបាល​សំណូមពរ​រាល់​ឆ្នាំ​ដដែលៗ​នោះ​ដែរ»។

លោក ឆឹម ចំណាន ប្រធាន​សមាគម​រថយន្ត​ក្រុង​កម្ពុជា​បាន​ឲ្យ​ដឹង​ថា​ខាង​ក្រុមហ៊ុន​ងាយស្រួល​ក្នុង​ការ​គ្រប់គ្រង​តម្លៃ​ប៉ុន្តែ​រថយន្ត​ឈ្នួល​ផ្សេង​ទៀត​ជាច្រើន​ដែល​រកស៊ី​ជា​លក្ខណៈ​បុគ្គល ឬ​ក្រុម​តូចៗ​ដែល​ពិបាក​គ្រប់គ្រង​តម្លៃ​ព្រោះ​ពួកគេ​ដំឡើង​ថ្លៃ​ដោយ​ខ្លួនឯង។

លោក ចំណាន ថ្លែង​ថា៖ «ពួកយើង​មិន​ចង់​ឃើញ​វប្បធម៌​ឡើង​ថ្លៃ​ពេល​បុណ្យ​ទាន​ម្តងៗ​នោះ​ទេ ព្រោះ​បណ្តា​ប្រទេស​ផ្សេង​គេ​មិន​ឆ្លៀត​ឡើង​ថ្លៃ​នោះ​ទេ»។

តំណាង​ក្រុមហ៊ុន​កាពីតូល និង​សូរិយា​ភ្នំពេញ​ដែល​ថ្លែង​សុំ​មិន​បញ្ចេញ​ឈ្មោះ​បាន​ប្រាប់​ឲ្យ​ដឹង​ថា តម្លៃ​ធ្វើ​ដំណើរ​ទៅ​តាម​ខេត្ត​ក្នុង​អំឡុង​ពេល​ចូល​ឆ្នាំ​មិន​ត្រូវ​បាន​ដំឡើង​ថ្លៃ​នោះ​ទេ​គឺ​នៅ​ដដែល។ ខាង​ក្រុមហ៊ុន​បាន​អះអាង​ថា​សំបុត្រ​ទៅ​សៀមរាប​ថ្ងៃ​នេះ​គឺ ២៦-០០០ រៀល និង​ថ្ងៃ​ស្អែក និង​ថ្ងៃ​ជិត​ចូល​ឆ្នាំ​គឺ​នៅ​ដដែល​មិន​ដំឡើង​នោះ​ទេ៕

អត្ថបទគួរចាប់អារម្មណ៍