ត្បូងឃ្មុំៈ សមត្ថកិច្ចនៅមិនទាន់អាចកំណត់អត្តសញ្ញាណមនុស្សមួយក្រុមដែលគេសង្ស័យថា ជាក្រុមដាក់កុងត្រូលជជុះដែលបានដេញតាមបាញ់ឡានដឹកឈើមួយគ្រឿងរហូតដល់កើតមានគ្រោះថ្នាក់ចរាចរណ៍បណ្តាលឲ្យមនុស្ស ៣ នាក់ស្លាប់ និង ៤ នាក់រងរបួសកាលពីថ្ងៃសុក្រក្នុងខេត្តត្បូងឃ្មុំនៅឡើយទេ។
លោក ឈឹម គឹមហុង ស្នងការខេត្តត្បូងឃ្មុំទទួលបន្ទុកផ្នែកចរាចរណ៍បានឲ្យដឹងថា មនុស្ស ៣ នាក់បានស្លាប់ និង ៤ នាក់របួសធ្ងន់ និងស្រាលក្នុងហេតុការណ៍គ្រោះថ្នាក់ចរាចរណ៍ដែលបង្កដោយរថយន្តដឹកឈើមួយគ្រឿងម៉ាកសាំយ៉ុង ដោយបុកជាមួយរថយន្តម៉ាកសាំយ៉ុងដឹកពងទាមួយគ្រឿង និងរថយន្តដឹកអាចម៍គោកាលព្រឹកព្រលឹមថ្ងៃទី ៣០ មីនា នៅលើផ្លូវជាតិលេខ ៨ ក្នុងភូមិអូរព្រិច ឃុំកក់ ស្រុកពញាក្រែក។ ឡានដឹកឈើម៉ាកសាំយ៉ុងពណ៌ស មានមនុស្សជិះ ៣ នាក់ដោយម្នាក់ស្លាប់ និង ២ នាក់ទៀតរងរបួស ចំណែកឡានដឹកពងទា ពណ៌លឿងមានមនុស្សជិះ ៣ នាក់ដែលក្នុងនោះស្លាប់ ២ នាក់ និងរបួសម្នាក់ ចំណែកអ្នកបើកបររថយន្តដឹកអាចម៍គោដែលជិះតែម្នាក់ឯងបានរងរបួសស្រាល។
លោកថ្លែងថា៖ «តាមការស្រាវជ្រាវរថយន្តដឹកឈើ ជាអ្នកបង្កគ្រោះថ្នាក់។ គាត់ទៅបុកឡានដឹកពងទា បន្ទាប់មករថយន្តដឹកអាចម៍គោទៅបុកអាឡានដឹកពងទាទៀត។ យើងឮថាមានសមត្ថកិច្ចដេញឡានដឹកឈើ តែមិនដឹងខាងណាទេបានដេញហើយបានបាញ់មួយគ្រាប់ទៀត។ នេះបើតាមពលរដ្ឋដែលឃើញផ្ទាល់ភ្នែក។ តែមិនទាន់មានអ្នកណាបំភ្លឺឲ្យច្បាស់នៅឡើយ។ អ្នករបួសពីក្នុងឡានដឹកឈើ គាត់បានបំភ្លឺរួចហើយថា មានសមត្ថកិច្ចបានដេញមែន តែគាត់មិនដឹងខាងណាអ៊ីចឹងយើងកំពុងស្រាវជ្រាវ»។
លោកថាសមត្ថកិច្ចនឹងទទួលបានព័ត៌មានលម្អិត ប្រសិនបើជនរងគ្រោះ ដែលជាអ្នកបើកឡានដឹកឈើសហការបំភ្លឺដល់សមត្ថកិច្ចថា តើកម្លាំងខាងណាជាអ្នកដេញតាម។ នៅពេលនេះអ្នកបើកបរបានទៅព្យាបាលនៅវៀតណាម។
លោក ហ៊ុយ សម្បត្តិ មេប៉ុស្តិ៍ឃុំកក់បានឲ្យដឹងថា បច្ចុប្បន្ននេះឈើ និងរថយន្តកំពុងរក្សាទុកនៅប៉ុស្តិ៍របស់លោក។
លោកថា ឈើដែលដឹកតាមឡានសាំយ៉ុងនោះជាប្រភេទក្តារសម្រាប់ធ្វើជញ្ជាំងផ្ទះ មិនមែនជាប្រភេទឈើប្រណីតទេ។
ក្រសួងមហាផ្ទៃធ្លាប់បានចេញសេចក្តីប្រកាស និងព្រមានជាញឹកញាប់មិនឲ្យមានការដាក់កុងត្រូលជជុះនៅតាមដងផ្លូវជាដាច់ខាត ប៉ុន្តែកុងត្រូលជជុះនៅតែបន្តកើតមាន៕