ភ្នំពេញៈ ឡានដឹកដីចុះពីលើស្ពានព្រះមុនីវង្សថ្មីដាច់ហ្វ្រាំង បានបុកបុរសបើកម៉ូតូម្នាក់ ស្លាប់កាលពីល្ងាចម្សិលមិញ ខណៈដែលអគ្គស្នងការនគរបាលជាតិបានរាយការណ៍ថា អត្រាអ្នកស្លាប់ដោយសារគ្រោះថ្នាក់ចរាចរណ៍ក្នុង ខែវិច្ឆិកា ឆ្នាំ២០១៤ នេះ បានកើនឡើង ៥៦ ភាគរយបើធៀបទៅនឹង ខែវិច្ឆិកា ឆ្នាំ២០១៣។
ក្នុងសន្និសីទសារព័ត៌មានកាលពីថ្ងៃចន្ទម្សិលមិញប្រធាននាយកដ្ឋានសណ្តាប់ធ្នាប់ នៃអគ្គស្នងការដ្ឋាននគរបាលជាតិ លោក អែល សំនាង បានឲ្យដឹងថា គ្រោះថ្នាក់ចរាចរណ៍ក្នុង ខែវិច្ឆិកា ឆ្នាំ២០១៤ នេះមានចំនួន ៣៩៨ លើកដែលបណ្តាលឲ្យមនុស្ស ១៩០ នាក់ស្លាប់ ខណៈដែលក្នុង ខែវិច្ឆិកា ឆ្នាំ២០១៣ មានត្រឹមតែ ៣១២ លើកដែលមានមនុស្ស ១២២ នាក់ស្លាប់។
លោកបញ្ជាក់ថា តួលេខអ្នកស្លាប់ក្នុង ខែវិច្ឆិកា ឆ្នាំនេះ បានកើនឡើងចំនួន ៦៨ នាក់ស្មើនឹង ៥៦ ភាគរយបើធៀបទៅនឹង ខែវិច្ឆិកា ឆ្នាំមុន។
លោក អែល សំនាង បានបន្តថា គិតត្រឹម ខែវិច្ឆិកា ឆ្នាំ២០១៤ នេះ គ្រោះថ្នាក់ចរាចរណ៍បានកើតឡើងចំនួន ៤៨៤០ លើក ចំណែក ឆ្នាំ២០១៣ មាន ៤៣២២ លើកដែលកើនឡើងចំនួន ៥១៨ លើក ស្មើនឹង ១២ ភាគរយ។
អត្រាអ្នកស្លាប់មានចំនួន ២១៤៨ នាក់ក្នុង ឆ្នាំ២០១៤ ខណៈ ឆ្នាំ២០១៣ មានមនុស្ស ១៩០១ នាក់បានស្លាប់ដែលតួលេខនេះ បង្ហាញថា អ្នកស្លាប់បានកើនឡើង ២៤៧ នាក់ស្មើនឹង ១៣%។
កាលពីល្ងាចម្សិលមិញ ឡានដឹកដីមួយគ្រឿងបានដាច់ហ្វ្រាំង នៅពេលបើកចុះពីលើស្ពានព្រះមុនីវង្សថ្មី ហើយបានទៅបុកអ្នកបើកម៉ូតូម្នាក់បណ្តាលឲ្យស្លាប់ភ្លាមៗ និងបានអូសម៉ូតូជាច្រើនរយម៉ែត្រ។
លោក ហ៊ុន សុផល នាយនគរបាលប៉ុស្តិ៍ សង្កាត់ច្បារអំពៅ ១ ខណ្ឌច្បារអំពៅ បានឲ្យដឹងថា គ្រោះថ្នាក់ចរាចរណ៍នេះ បានកើតឡើងនៅវេលាម៉ោងជិត ៥ ល្ងាចម្សិលមិញ។ គ្រោះថ្នាក់ចរាចរណ៍នេះ បានបង្កឲ្យមានការកកស្ទះចរាចរណ៍អស់រយៈពេលជាច្រើនម៉ោង។
នគរបាលចរាចរណ៍បានចុះជួយអន្តរាគមន៍សម្រួលចរាចរណ៍ និងបានអូសរថយន្តបង្កហេតុ ព្រមទាំងម៉ូតូជនរងគ្រោះទៅកាន់ស្នងការដ្ឋាននគរបាលចរាចរណ៍ជើងគោករាជធានី ដើម្បីធ្វើការដោះស្រាយតាមផ្លូវច្បាប់។
អ្នករស់នៅម្តុំខាងកើតស្ពានព្រះមុនីវង្សបានឲ្យដឹងថា ឡានធុនធំដាច់ហ្វ្រាំង តែងតែបុកមនុស្សស្លាប់ជាញឹកញាប់ខណៈអ្នកបើកបរឡានធុនធំខ្លះ មិនព្រមបន្ថយល្បឿននៅពេលបើកចុះពីលើស្ពាន៕
រាយការបន្ថែមៈ ឃុត សុភចរិយា
