.jpg)
ព្រះវិហារៈ បុរសឡាវ ២ នាក់ដែលត្រូវសមត្ថកិច្ចចាប់ខ្លួនជាមួយថ្នាំញៀន ១០០២,៥៦ ក្រាមនៅភូមិ កំពង់ស្រឡៅ ១ ឃុំកំពង់ស្រឡៅ ស្រុកឆែប ត្រូវបានសាលាដំបូងខេត្តព្រះវិហារចោទប្រកាន់ និងបញ្ជូនទៅឃុំខ្លួននៅពន្ធនាគារខេត្ត ក្រោយពីសមត្ថកិច្ចបញ្ចូនដល់តុលាការប៉ុន្មានម៉ោងកាលពីថ្ងៃទី ១ ខែធ្នូ។
លោកស្រី ជុំ កន្និយ៉ា អ្នកនាំពាក្យសាលាដំបូងខេត្តព្រះវិហារបានឲ្យដឹងកាលពីម្សិលមិញថា៖ «ជនសង្ស័យត្រូវបានលោកស្រីចៅក្រម ថន ប៉ោហៀក ធ្វើការចោទប្រកាន់ និងបញ្ជូនទៅឃុំខ្លួនបណ្តោះអាសន្ននៅពន្ធនាគារខេត្តហើយ»។
លោក មេឃ សំអូន ស្នងការរងទទួលបន្ទុកប្រឆាំងបទល្មើសគ្រឿងញៀនខេត្តព្រះវិហារបានឲ្យដឹងថា ជនសង្ស័យឈ្មោះ សុខ ថាវង្សពេលា ភេទប្រុស អាយុ ៤៦ ឆ្នាំ និងឈ្មោះ ខួន ម៉ាគីតា ភេទប្រុស អាយុ ៤៦ ឆ្នាំពួកគេជាជនជាតិឡាវ។
លោករំឭកប្រាប់ថាការបង្ក្រាបជនជាតិឡាវ ២ នាក់ខាងលើគឺកើតឡើងកាលពីថ្ងៃទី ២៩ វិច្ឆិកា ស្ថិតក្នុងផ្ទះសំណាក់មួយនៅក្នុងភូមិ-ឃុំខាងលើ ហើយក៏ជាប្រតិបត្តិការបង្ក្រាបរបស់សមត្ថកិច្ចប្រឆាំងគ្រឿងញៀនខេត្តព្រះវិហារជាមួយកម្លាំងសមត្ថកិច្ចប្រឆាំងគ្រឿងញៀននៃមន្ទីរប្រឆាំងគ្រឿងញៀនរបស់ក្រសួងមហាផ្ទៃ។ ការចាប់ខ្លួនជនសង្ស័យគឺធ្វើឡើងបន្ទាប់ពីសមត្ថកិច្ចបានធ្វើការស៊ើបអង្កេតតាមរយៈកម្លាំងសម្ងាត់ ហើយក៏ឈានដល់ការចាប់ខ្លួនពួកគេតែម្តង។
ក្នុងប្រតិបត្តិការនោះសមត្ថកិច្ចដកហូតបានម្សៅក្រាមពណ៌សថ្លាទម្ងន់ ១០០២,៥៦ ក្រាមប្រភេទមេតំហ្វេតាមីនដែលជនសង្ស័យវេចខ្ចប់ក្នុងថង់ប្លាស្ទិក ១ ធំ។
យោងរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀនប្រចាំឆមាសទី ១ ឆ្នាំ ២០១៨ បង្ហាញថាលទ្ធផលបង្ក្រាបបទល្មើសគ្រឿងញៀន សរុបមាន ៣៨៣៨ ករណីរួមទាំងបទល្មើសប្រើប្រាស់ថយចុះ ៤៩៣ ករណីស្មើនឹង ១១,៣៨ ភាគរយ (បើប្រៀបធៀបឆមាសទី ១ ឆ្នាំ ២០១៧ មាន ៤៣៣១ ករណី) ក្នុងនោះបទល្មើសជួញដូរមាន ២៤៧២ ករណីបទល្មើសដាំដុះកញ្ឆាមាន ១៧ ករណី។ បទល្មើសប្រើប្រាស់មាន ១៣៤៨ ករណីបទល្មើសសំយោគកែច្នៃមាន ១ ករណី។
ក្នុងការបង្ក្រាបនោះមានជនសង្ស័យសរុបដែលត្រូវបានឃាត់ខ្លួនមានចំនួន ៧៥៨០ នាក់ក្នុងនោះមានស្រី ៦៧២ នាក់ហើយបទល្មើសប្រើប្រាស់បានថយចុះ ២១១៤ នាក់ស្មើនឹង ២១,៨០ ភាគរយ (បើប្រៀបធៀបឆមាសទី ១ ឆ្នាំ ២០១៧ ដែលមាន ៩៦៩៤ នាក់)៕
