.jpg)
ពិធីក្រុងពាលីសង់អគារឃុំឃាំងទំនើបក្នុងពន្ធនាគារព្រៃសនាពេលកន្លងមក។ ហុង មិនា
ភ្នំពេញៈ អ្នកជាប់ឃុំដែលសម្បូរប្រាក់នឹងអាចបានស្នាក់នៅក្នុងអគារពន្ធនាគារទំនើប ខណៈអគារវិនិយោគកម្ពស់ ៣ ជាន់កំពុងត្រូវបានសាងសង់ក្នុងមណ្ឌលអប់រំកែប្រែព្រៃសដែលតាមមន្ត្រីថា អាចនឹងបញ្ចប់នៅចុងឆ្នាំ ២០១៨ នេះ ជាអ្វីដែលមន្ត្រីសិទ្ធិមនុស្សយល់ថា ហាក់មានទម្រង់ជាការបែងចែកវណ្ណៈចំពោះអ្នកទោសដូចគ្នា។
លោកឧត្តមសេនីយ៍ សន កែវ អ្នកនាំពាក្យពន្ធនាគារនៃអគ្គនាយកដ្ឋានពន្ធនាគារបានប្រាប់ភ្នំពេញប៉ុស្តិ៍កាលពីម្សិលមិញថា សំណង់អគារនេះជាការវិនិយោគជាមួយក្រុមហ៊ុនឯកជនជាជនជាតិខ្មែរហើយថា ប្រសិនបើមិនមានអ្វីប្រែប្រួលទេនឹងសង់រួចនៅចុងឆ្នាំ ២០១៨ នេះសម្រាប់ដាក់ជនជាប់ឃុំដែលមានលទ្ធភាពដោយការបង់ថវិកា តែក៏មិនមែនដាក់អ្នកជាប់ឃុំទូទៅដែរ។
យ៉ាងណាក្ដីលោក សន កែវ មិនបានបង្ហាញឈ្មោះក្រុមហ៊ុន និងទឹកប្រាក់ចំណាយសាងសង់នោះទេ ដោយបង្វែរសំណួរឱ្យសួរលោក កែវ សុផាត ប្រធាននាយកដ្ឋានការងារសាងសង់ដែលមិនអាចសុំការអត្ថាធិប្បាយបាន ដោយសារមិនមានអ្នកលើកទូរស័ព្ទកាលពីម្សិលមិញ។
ប៉ុន្តែបើតាមសារព័ត៌មានក្នុងស្រុកមួយធ្លាប់បានរាយការណ៍ថា សំណង់អគារពន្ធនាគារនេះវិនិយោគដោយក្រុមហ៊ុនឈ្មោះ គន្ធរីខុន ហូលឌីង លើផ្ទៃដីជាង ១ ហិកតាក្នុងទឹកប្រាក់វិនិយោគជាង ៤ លានដុល្លារដោយបានចាប់បើកការដ្ឋានសាងសង់កាលពីខែឧសភាឆ្នាំមុន។
លោកឧត្ដមសេនីយ៍ សន កែវ បានបញ្ជាក់ថា៖ «កន្លែងនោះសម្រាប់ដាក់អ្នកជាប់ឃុំណាដែលមានលទ្ធភាពបង់លុយដើម្បីបានទៅស្នាក់នៅកន្លែងនោះ។ ប៉ុន្តែការគ្រប់គ្រងគឺតាមស្តង់ដារពន្ធនាគារតែមួយ អត់មានស្តង់ដារ ២ ទេ។ មានន័យថាពន្ធនាគារសាធារណៈ ពន្ធនាគារទូទៅ គ្រប់គ្រងបែបណា អគារពន្ធនាគារថ្មីនោះក៏គ្រប់គ្រងបែបហ្នឹងដែរ។ អត់មានម៉ាស៊ីនត្រជាក់ អត់មានពូក អត់មានអីទេ គឺគ្រាន់តែថាគាត់មានលុយបង់ទៅនៅកន្លែងទូលាយតែប៉ុណ្ណឹងទេ។ មានតែកង្ហារ ព្រោះពន្ធនាគារទូទៅក៏យើងមានកង្ហារដែរ។ ...មិនមែនមានន័យថា ជាសណ្ឋាគារពន្ធនាគារទេ ហើយក៏គ្មានគ្រែ គ្មានពូក គ្មានម៉ាស៊ីនត្រជាក់អីដែរ» ។
ពាក់ព័ន្ធនឹងមណ្ឌល (ម ១ សម្រាប់ឃុំមនុស្សប្រុស និងម ២ សម្រាប់ឃុំស្ត្រី) នោះ លោក ឧត្តមសេនីយ៍ សន កែវ បានថ្លែងថាករណីនេះលោកដូចជាមិនទាន់បានស៊ីជម្រៅទេ ប៉ុន្តែប្រហែលជាដដែលទេគ្រាន់តែជាអគារមួយសម្រាប់បង់ថវិកាស្នាក់នៅប៉ុណ្ណោះ។
ជុំវិញបញ្ហានេះលោក ស៊ឹង សែនករុណា អ្នកនាំពាក្យនៃសមាគមការពារសិទ្ធិមនុស្សអាដហុកបានស្វាគមន៍ការកែទម្រង់ពន្ធនាគារ ខណៈដែលបច្ចុប្បន្នកំពុងមានភាពចង្អៀត និងពុំមានផាសុកភាព។ ប៉ុន្តែលោកយល់ឃើញថា សម្រាប់ប្រទេសជឿនលឿនគឺអ្នកជាប់ឃុំបានស្នាក់នៅក្នុងពន្ធនាគារដែលស្ថានភាពស្មើៗគ្នា ដោយគេមិនបានសង់អគារពន្ធនាគារសម្រាប់តែអ្នកមានលុយទៅរស់នៅនោះទេ។
លោកបានបញ្ជាក់ថា៖ «ការកែទម្រង់ពន្ធនាគារនោះ ខ្ញុំស្វាគមន៍ ប៉ុន្តែមិនមែនកែទម្រង់របៀបអ្នកមានលុយ អ្នកមានវណ្ណៈទៅបែងចែកដែលជាអ្នកទោសដូចគ្នានោះទេ។ បើយើងប្រៀបធៀបជាមួយប្រទេសលោកសេរីគឺក្នុងពន្ធនាគារគេមានគ្រែ មានអី អ្វីដែលខាងពន្ធនាគារផ្តល់ឲ្យមិនមែនផ្តល់ឲ្យតែក្រុមអ្នកមានប្រាក់ទេ គឺអ្នកក្រក៏មានសិទ្ធិស្មើគ្នាទាំងអស់ដែរ។ អ្វីដែលគួរទទួលបានក្នុងពន្ធនាគារគឺត្រូវតែទទួលបានដូចៗគ្នា។ ប្រសិនមានពន្ធនាគារទំនើបរបៀបនេះ ខ្ញុំមានការព្រួយបារម្ភព្រោះថា គាត់មិនខ្លាចដាក់ទោសទណ្ឌពិន័យក្នុងពន្ធនាគារនោះទេ »៕
