.jpg)
លោក ម៉ម ប៉ុនហេង រដ្ឋមន្ត្រីក្រសួងសុខាភិបាល ចុះត្រួតពិនិត្យការដំឡើងគ្រែសម្រាប់ព្យាបាលអ្នកជំងឺនៅអគាររៀបមង្គលការ ដឺ ព្រេមៀ សេនធ័រ សែនសុខ កាលពីព្រឹកមិញ។ រូបថត CAMUP
ភ្នំពេញ៖ ក្រសួងសុខាភិបាលបានកំពុងរៀបចំអគាររៀបមង្គលការ ដឺ ព្រេមៀ សេនធ័រ សែនសុខ និងអគារវិមានពិភពថ្មី សែនសុខ ធ្វើជាទីកន្លែងសម្រាប់ព្យាបាលអ្នកជំងឺកូវីដ ១៩ កម្រិតស្រាល ខណៈដែលចំនួនវិជ្ជមាននៃអ្នកឆ្លងជំងឺដ៏កាចសាហាវនេះ ត្រូវបានរកឃើញរាប់រយនាក់ជារៀងរាល់ថ្ងៃ។
យោងតាមការលើកឡើងរបស់លោកស្រី យក់ សម្បត្តិ រដ្ឋលេខាធិការក្រសួងសុខាភិបាល ប្រាប់បណ្ដាញព័ត៌មានហ្វ្រេសញូវ នៅថ្ងៃអាទិត្យ ទី ១៨ ខែមេសា នេះ បានឱ្យដឹងថា លោក ហុង ពីវ និងលោក លី យ៉ុងផាត់ បានប្រគល់អគាររៀបមង្គលការនេះ ជូនលោកនាយករដ្ឋមន្រ្តី ហ៊ុន សែន ដើម្បីចាត់ចែងសម្រាប់ដាក់អ្នកជំងឺកូវីដ ១៩។
លោកស្រីបានប្រាប់ថា អគារទាំងពីរនេះអាចដាក់ព្យាបាលអ្នកជំងឺកូវីដ ១៩ បានចំនួនពី ១ ០០០ ទៅដល់ជាង ២ ០០០ គ្រែ។
បើតាមលោកស្រី យក់ សម្បត្ដិ គិតមកត្រឹមថ្ងៃនេះ មណ្ឌលព្យាបាលជំងឺកូវីដ ១៩ កម្រិតស្រាលមានចំនួន ៧ ទីតាំង មាននៅវិទ្យាល័យជាស៊ីមសាមគ្គីដាក់ព្យាបាលអ្នកជំងឺចំនួន ២៦០ គ្រែ, អគារម៉ូឌែនដាក់អ្នកជំងឺជាង ២៣០ គ្រែ, អគារនៅពោធិ៍ចិនតុង ១៦០ គ្រែ, អគារការកោះពេជ្រដាក់បានជាង ២ ៧០០ គ្រែ, វិទ្យាល័យជម្ពូវ័ន្ដបានជិត ៧០ គ្រែ, អគារវិមានពិភពថ្មីសែនសុខចំនួនជាង ៨០០ គ្រែ និងអគារ ដឺ ព្រេមៀ សេនធ័រសែនសុខចំនួនពី ១ ០០០ ទៅ ១ ៥០០ គ្រែ។
ទន្ទឹមនឹងនេះដែរ អនុប្រធានក្រុមប្រឹក្សាភិបាល នៃគ្រូពេទ្យស្ម័គ្រចិត្តយុវជនសម្តេចតេជោ លោកស្រី ពេជ ចន្ទមុន្នី បានបង្ហោះនៅលើបណ្តាញសង្គមហ្វេសប៊ុកផ្លូវការរបស់លោកស្រីកាលពីយប់ថ្ងៃសៅរ៍ ទី ១៧ ខែមេសា ដោយលោកស្រីបានបញ្ចេញនូវអារម្មណ៍របស់លោកស្រីនៅពេលដែលមានការរៀបចំមន្ទីរពេទ្យព្យាបាលអ្នកជំងឺកូវីដ ១៩ ម្តងៗ។
គ្រែត្រូវបានដំឡើងសម្រាប់ព្យាបាលអ្នកជំងឺនៅអគាររៀបមង្គលការ ដឺ ព្រេមៀ សេនធ័រ សែនសុខ កាលពីព្រឹកមិញ។ រូបថត CAMUP
លោកស្រីបញ្ជាក់ថា៖ «ខ្ញុំមានអារម្មណ៍ក្តុកក្តួលចិត្ត អាណិតដល់រដ្ឋាភិបាលដែលខំចំណាយប្រាក់ក្នុងការរៀបចំមន្ទីរពេទ្យឱ្យអ្នកជំងឺមានកន្លែងព្យាបាលអាណិតដល់សម្តេចតេជោ ដែលលោកខិតខំប្រឹងគិតគូរ និងផ្តល់គំនិតគ្រប់បែបយ៉ាង ដើម្បីទប់ស្កាត់ការរីករាលដាលនៃជំងឺនេះ ជាពិសេស គឺការពារជីវិតបងប្អូនប្រជាពលរដ្ឋខ្មែរ»។
លោកស្រី ពេជ ចន្ទមុន្នី បានបន្តថា លោកស្រីអាណិតដល់ក្រុមគ្រូពេទ្យជួរមុខទាំងអស់ដែលកំពុងប្រយុទ្ធជាមួយនឹងសត្រូវដែលមើលមិនឃើញស្រមោលនេះ។ អាណិត និងខ្លោចចិត្តដល់ក្មេងតូចៗដែលឆ្លងនូវជំងឺដ៏កាចសាហាវមួយនេះ។
លោកស្រីបានលើកឡើងថា៖ «ខ្ញុំតែងតែបួងសួងសុំមន្ទីរពេទ្យដែលខ្ញុំកំពុងរៀបចំនេះ គ្មានមនុស្សមកសម្រាក និងជាមន្ទីរពេទ្យចុងក្រោយ។ សម្តេចតេជោរាជរដ្ឋាភិបាល និងក្រុមគ្រូពេទ្យយើងខ្ញុំបានខំប្រឹងពេញទំហឹងហើយ តែខ្ញុំសុំឱ្យបងប្អូនប្រជាពលរដ្ឋជួយសហការ ទើបយើងអាចឆ្លងកាត់ការលំបាកនេះជាមួយគ្នាបាន»៕
