.jpg)
អគារឥន្ទ្រទេវីនៃរាជបណ្ឌិត្យសភាកម្ពុជាដែលត្រូវបានសម្ពោធពីម្សិលមិញនៅភ្នំពេញ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន ពីម្សិលមិញសម្ពោធអគារឥន្ទ្រទេវីរាជបណ្ឌិត្យសភាកម្ពុជាដែលជាកន្លែងបណ្តុះបណ្តាលនិស្សិតថ្នាក់បរិញ្ញាបត្រជាន់ខ្ពស់ មជ្ឈមណ្ឌលបកប្រែភាសាបរទេស និងជាកន្លែងស្រាវជ្រាវដោយក្រៅពីនេះលោកចាត់ទុកអគារមួយនេះសម្រាប់ធ្វើការប្រជុំពិភាក្សា និងធ្វើកិច្ចការផ្សេងៗហើយបន្ទាប់ទៅទៀតនឹងមានអគារមួយទៀតដែលហៅថា «ខេមរៈពិទូ» ដែលនឹងដោះស្រាយនៅពេលខាងមុខ។
តាមរយៈសុន្ទរកថាលោក សុខ ទូច ថ្លែងក្នុងពិធីនោះថា ការសាងសង់អគារនេះ គឺដើម្បីប្រើប្រាស់ជាកន្លែងបណ្តុះបណ្តាល និស្សិតថ្នាក់បរិញ្ញាបត្រជាន់ខ្ពស់ (អនុបណ្ឌិត) លើគ្រប់មុខជំនាញ និងជាមជ្ឈមណ្ឌលបកប្រែភាសាបរទេស។ លោកថ្លែងថា ជាទិសដៅនាពេលអនាគត រាជបណ្ឌិត្យសភាកម្ពុជាមានបំណងប្រមូលផ្តុំអ្នកមានចំណេះដឹងខាងភាសាផ្សេងៗ ហើយសុំសិទ្ធិធ្វើការបកប្រែនូវរាល់ស្នាដៃ ឬផលិតផលដែលមានតម្លៃសម្រាប់ជាតិមកជាខេមរភាសា។
លោកថ្លែងថា៖ «ពីព្រោះយើងយល់ថាការប្រើប្រាស់ខេមរភាសា វាអាចផ្តល់សារៈសំខាន់ទៅដល់អ្នកសិក្សាស្រាវជ្រាវដូចជាយុវជន ដែលមិនចេះភាសាបរទេសហើយអាចមើលឯកសារនោះបានស៊ីជម្រៅតាមរយៈខេមរភាសា»។
លោកបន្តថា អគារនេះក៏ជាកន្លែងស្រាវជ្រាវ ប្រមូលផ្តុំបញ្ញវន្តតាមរយៈការរៀបចំសិក្ខាសាលា សន្និសីទ និង កម្មវិធីតុមូលផ្សេងៗសម្រាប់បញ្ញវន្តធ្វើការវិភាគអំពីបញ្ហាសង្គម នយោបាយ សេដ្ឋកិច្ច និងបច្ចេកវិទ្យាទំនើបៗរបស់ពិភពលោកថ្មីៗនេះផងដែរ។
លោក សុខ ទូច បញ្ជាក់ថា៖ «ជារួមអគារនេះនឹងជាទីបម្រើដល់បញ្ញវន្តទាំងខាងផ្នែកវិទ្យាសាស្ត្រពិត និងវិទ្យាសាស្ត្រសង្គម ដើម្បីឱ្យបញ្ញវន្តទាំងឡាយបានបង្ហាញស្នាដៃរបស់ខ្លួនសម្រាប់ការរួមចំណែកក្នុងការអភិវឌ្ឍសង្គមជាតិ»។
លោក សុខ ទូច ថ្លែងទៀតថារយៈពេល ២០ ឆ្នាំមកនេះ រាជបណ្ឌិត្យសភាកម្ពុជាបានសិក្សាស្រាវជ្រាវ និងស្វែងរកធាតុចូលយ៉ាងច្រើនជូនដល់រដ្ឋាភិបាលក៏ដូចជាស្ថាប័នពាក់ព័ន្ធ។ រាជបណ្ឌិត្យសភាកម្ពុជាបានបង្កើនកិច្ចសហប្រតិបត្តិការជាមួយស្ថាប័នស្រាវជ្រាវ និងសាកលវិទ្យាល័យជាតិ និងអន្តរជាតិជាបន្តបន្ទាប់ជាមួយប្រទេសជាសមាជិកអាស៊ាន និងអាស៊ីប៉ាស៊ីហ្វិក ដូចជា ជប៉ុន កូរ៉េខាងត្បូង ចិន អាមេរិក អាល្លឺម៉ង់ រុស្ស៊ី អូស្ត្រាលី បង់ក្លាដែស បែលឡារូស ប៉ូឡូញ អ៊ីតាលី ជាដើម។
ទោះយ៉ាងណាលោក ហ៊ុន សែន បានណែនាំឱ្យស្ថាប័នទាក់ទងការស្រាវជ្រាវត្រូវបន្ត និងពិនិត្យមើលឱ្យច្បាស់ទៅលើអ្វីដែលគួរចំណាយធនធានដើម្បីធ្វើការសិក្សាដែលបម្រើឱ្យស្ថានភាពជាក់ស្តែង ហើយការសិក្សានោះគួរត្រូវបានជាធាតុចូលដែលអាចទទួលយកបានដោយស្ថានប័នអនុវត្ត។
លោក ហ៊ុន សែន ថ្លែងថា៖ «មិនមែនសិក្សាហើយបញ្ជូនមកឱ្យនាយករដ្ឋមន្ត្រី ហើយនាយករដ្ឋមន្ត្រីជំរុញឱ្យស្ថាប័នអនុវត្តនោះគេអនុវត្ត ព្រោះយើងត្រូវដឹងថា នៅពេលវេលាដែលយើងកំពុងសិក្សានេះ គោលនយោបាយជាក់លាក់មួយត្រូវបានដាក់ចេញដោយរាជរដ្ឋាភិបាល។ ក្នុងនោះមានទាំងយុទ្ធសាស្ត្រចតុកោណ។ ក្រៅពីយុទ្ធសាស្ត្រចតុកោណដែលយុទ្ធសាស្ត្ររួមផ្នែកមួយៗសុទ្ធតែមាន។ ឧទាហរណ៍គោលនយោបាយគាំពារសង្គមគឺមានចែងច្បាស់លាស់ធ្វើម៉េច ធ្វើម៉េច ធ្វើម៉េច។ អាហ្នឹងសុទ្ធតែជាបញ្ហា»។
លោកក៏បានឯកភាពទៅលើការស្នើសុំរបស់រាជបណ្ឌិត្យសភាដើម្បីរៀបចំបន្ទប់ពិសោធន៍មួយបំពាក់ដោយគ្រឿងបរិក្ខារដែលបម្រើរាល់ការងារស្រាវជ្រាវបង្កាត់ពូជរុក្ខជាតិដែលមានតម្លៃ ២០០ ០០០ ដុល្លារ និងការស្នើសុំបណ្តុះបណ្តាលជំនាញវិជ្ជាជីវៈផ្នែកទេសចរណ៍នៅរាជបណ្ឌិត្យសភាកម្ពុជា ដោយសហការបច្ចេកទេសជាមួយក្រសួងទេសចរណ៍ផងដែរ។
បើតាមសុន្ទរកថារបស់លោក សុខ ទូច អគារមានកម្ពស់ ៣ ជាន់នេះគឺមានបណ្ដោយប្រវែង ៤០ ម៉ែត្រ និងទទឹង ១៧ ម៉ែត្រ។
អគារឥន្ទ្រទេវីនេះមានបន្ទប់ចំនួន ២៤ ដែលក្នុងនោះប្រើជាបន្ទប់ការិយាល័យ ១ បន្ទប់ ប្រជុំខ្នាតតូច ១ បន្ទប់ ការពារនិក្ខេបបទ ១ បន្ទប់ សិក្សាចំនួន ១៨ បន្ទប់ Lab ចំនួន ២ និងសាលសន្និសីទ (សាលសហសិក្សា) ១។ បន្ទប់នីមួយៗមានបំពាក់សម្ភារសម្រាប់សិក្សារៀនសូត្រមានជាអាទិ៍ តុសិស្ស តុគ្រូ LCD កង្ហារម៉ាស៊ីនត្រជាក់ និងអំពូលម៉ែត្រជាដើម។ អគារនេះចំណាយថវិកាអស់ចំនួន ១,៥៤៦,៩៤៤.៣០ ដុល្លារសហរដ្ឋអាមេរិក៕
