ភ្នំពេញៈ អគ្គស្នងការនគរបាលជាតិបានប្រាប់ឱ្យស្នងការដ្ឋាននគរបាលគ្រប់រាជធានី-ខេត្ត ត្រូវពង្រឹងនូវវិធានការធានាស្ថិរភាព សន្ដិសុខ និងសណ្ដាប់ធ្នាប់សាធារណៈជូនប្រជាពលរដ្ឋឲ្យបានល្អប្រសើរ ជាពិសេសទប់ស្កាត់ការអុកឡុករបស់ក្មេងទំនើង ក្នុងអំឡុងពិធីបុណ្យចូលឆ្នាំចិន ចាប់ពីថ្ងៃទី ៤ ដល់ថ្ងៃទី ៧ ខែកុម្ភៈ។
សេចក្ដីណែនាំស្ដីពីកិច្ចការពារសន្ដិសុខ សណ្ដាប់ធ្នាប់សាធារណៈ និងសុវត្ថិភាពសង្គមក្នុងឱកាសពិធីបុណ្យចូលឆ្នាំចិន វៀតណាម កូរ៉េ ដែលចុះហត្ថលេខាដោយលោកនេត សាវឿន អគ្គស្នងការនគរបាលជាតិនៅថ្ងៃទី ១ ខែកុម្ភៈ បានណែនាំដល់ប្រធាននាយកដ្ឋាន អង្គភាព និងស្នងការនគរបាលគ្រប់រាជធានី-ខេត្ត ត្រូវផ្ដោតលើការងារសំខាន់ៗមួយចំនួន មានដូចជា យកចិត្តទុកដាក់ប្រមូលព័ត៌មានពាក់ព័ន្ធសភាពការណ៍សន្តិសុខ សណ្តាប់ធ្នាប់សាធារណៈ ចាត់វិធានការការពារសន្តិសុខ សណ្តាប់ធ្នាប់នៅតាមទីអារាម ព្រះវិហារចិន វៀតណាម កូរ៉េ ក៏ដូចជាទីសក្ការៈ និងរមណីយដ្ឋានមួយចំនួន ដែលមានការប្រារព្ធពិធីផ្សេងៗ ដោយយកចិត្តទុកដាក់ទប់ស្កាត់មិនឲ្យមានបទល្មើសព្រហ្មទណ្ឌគ្រប់ប្រភេទ ជាពិសេសសកម្មភាពបង្កការអុកឡុករបស់ក្មេងទំនើង និងត្រូវរៀបចំឲ្យមានសណ្តាប់ធ្នាប់របៀបរៀបរយល្អប្រសើរ។
ជាមួយគ្នានេះ សេចក្តីណែនាំ ក៏បានប្រាប់ឲ្យអង្គភាព និងស្នងការដ្ឋាននគរបាលរាជធានី-ខេត្ត ត្រូវយកចិត្តទុកដាក់រៀបចំសណ្ដាប់ធ្នាប់ចរាចរណ៍ បញ្ចៀសការកកស្ទះ រឹតបន្តឹងច្បាប់ កាត់បន្ថយគ្រោះថ្នាក់ចរាចរណ៍ និងបង្កលក្ខណៈឱ្យពលរដ្ឋធ្វើដំណើរដោយសប្បាយរីករាយ និងសុវត្ថិភាព។ ត្រូវក្ដាប់ឱ្យបានឧបាយកល សកម្មភាពបង្កអសន្ដិសុខឬការញុះញង់នានាដែលអាចធ្វើឱ្យសង្គមមានចលាចល។
ត្រូវរំឭកប្រជាពលរដ្ឋឱ្យប្រុងប្រយ័ត្នចំពោះអគ្គិភ័យ ព្រមទាំងហាមឃាត់មិនឱ្យដុតផាវ កាំជ្រួច ឬបង្កសំឡេងផ្ទុះផ្សេងៗ និងការត្រៀមកម្លាំង និងមធ្យោបាយដើម្បីអន្តរាគមន៍ពន្លត់អគ្គិភ័យដែលអាចកើតឡើងជាយថាហេតុ។ ត្រូវពង្រឹងបន្ថែមការងារប្រចាំបញ្ជាគ្រប់ថ្នាក់ និងការងារផ្ដល់ព័ត៌មានឱ្យបានឆាប់រហ័ស ដើម្បីដោះស្រាយសភាពការណ៍ដែលកើតឡើងជាយថាហេតុឱ្យបានទាន់ពេលវេលា និងមានប្រសិទ្ធភាព។
លោក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានប្រាប់ភ្នំពេញប៉ុស្ដិ៍ ពីម្សិលមិញថា ថ្វីដ្បិតមានការជំរុញឱ្យផ្ដោតលើអំពើផ្សេងៗដែលអាចនាំឱ្យសង្គមមានចលាចលក្ដី ប៉ុន្តែលោកថា ពលរដ្ឋគ្រប់រូបគឺកំពុងពេញចិត្តចូលរួមសប្បាយរីករាយក្នុងពិធីបុណ្យចូលឆ្នាំចិន ដូច្នោះមិនអាចមានសកម្មភាពឯណាមួយដែលនាំឱ្យសង្គមកើតចលាចលឡើយ ហើយការណែនាំរបស់ស្នងការបែបនេះ គឺគ្រាន់តែផ្ដោតសំខាន់ទៅលើការរៀបចំសណ្ដាប់ធ្នាប់ ការប្រុងប្រយ័ត្នអំពីគ្រោះអគ្គិភ័យ និងជាពិសេសទប់ស្កាត់ការដុតផាវកាំជ្រួច ដែលធ្លាប់មានបទពិសោធបង្កគ្រោះថ្នាក់ដល់ពលរដ្ឋ។
លោកថា៖ «ខ្ញុំគិតថាក្នុងរដូវចូលឆ្នាំចិន-ខ្មែរនេះ ដូចជាសុទ្ធតែអ្នកដែលគោរពនូវប្រពៃណីនេះអ៊ីចឹងណា៎ ដូច្នេះខ្ញុំគិតថាដូចជាមិនមានពីណាដែលមានចេតនាចង់បំផ្លិចបំផ្លាញទេ។ មនុស្សគ្រប់រូបក៏ពេញចិត្តនឹងចូលរួមដើម្បីធ្វើឱ្យបរិយាកាសក្នុងពិធីចូលឆ្នាំនេះ បានប្រព្រឹត្តទៅស្ងប់ស្ងាត់សប្បាយ ហើយគ្មានអំពើណាមួយបង្កចលាចលដល់សង្គមទេ»។
លោក ស ថេត បន្ថែមថា ការណែនាំអំពីសន្ដិសុខ និងសណ្ដាប់ធ្នាប់នៅក្នុងពិធីបុណ្យចូលឆ្នាំចិនក្នុងឆ្នាំនេះ មិនមានអ្វីប្លែកជាងរាល់ឆ្នាំឡើយ និងតែងមានការណែនាំជានិច្ចនៅក្នុងពិធីបុណ្យទូទៅ។
លោកថា៖ «ហើយមិនមែនជាពិធីបុណ្យក៏យើងមានការយកចិត្តទុកដាក់ដែរ យើងមានផែនការការពារដែរ។ ខ្ញុំប្រាប់ចំនួនពិត (ប្រើប្រាស់កងកម្លាំងក្នុងពិធីបុណ្យចូលឆ្នាំចិន) អត់បានទេ ប៉ុន្តែយើងនឹងប្រើប្រាស់ឱ្យអស់លទ្ធភាពដែលមាន ហើយអាស្រ័យទៅលើការកកស្ទះច្រើន ឬតិច»។
លោក ព្រហ្ម យ៉ន នាយការិយាល័យបង្ការ និងពន្លត់អគ្គិភ័យឱ្យដឹងដែរថា រថយន្តចំនួន ៤៨ គ្រឿង រួមទាំងកម្លាំងជំនាញ កំពុងពង្រាយតាមខណ្ឌចំនួន ៨ ស្ថិតក្នុងទីក្រុងភ្នំពេញ ដើម្បីត្រៀមទប់ស្កាត់គ្រោះអគ្គិភ័យដែលអាចកើតឡើងជាយថាហេតុ។
លោកថា៖ «រថយន្តយើងគឺពង្រាយតាមគោលដៅទាំងអស់ដែលងាយរងគ្រោះ ដូចជាខណ្ឌទួលគោក ពោធិ៍សែនជ័យ ដូនពេញ ច្បារអំពៅ ស្ទឹងមានជ័យ»។
លោក ព្រហ្ម យ៉ន បន្ថែមថា ពិធីបុណ្យចូលឆ្នាំចិនក្នុងឆ្នាំនេះហាក់មានសភាពស្ងប់ស្ងាត់ល្អជាងឆ្នាំមុន ដោយសារនៅក្នុងពិធីសែននៅព្រឹកថ្ងៃទី ៤ ខែកុម្ភៈ ពុំកើតមានករណីអគ្គិភ័យណាមួយឡើយ៕