.jpg)
ពលរដ្ឋម្នាក់ជក់បារីនាពេលកន្លងមកនៅរាជធានីភ្នំពេញ។ រូបថត ភ្នំពេញប៉ុស្តិ៍
ភ្នំពេញៈ អគ្គនាយដ្ឋានគយ និងរដ្ឋាករកម្ពុជានៃក្រសួងសេដ្ឋកិច្ច និងហិរញ្ញវត្ថុ បានដាក់ចេញវិធានការរឹតបន្តឹងការនាំចូលមុខទំនិញស្រា និងបារីគ្រប់ប្រភេទជាបណ្តោះអាសន្ននៅតាមមាត់ច្រកមួយចំនួន ដើម្បីពង្រឹងប្រសិទ្ធភាពនៃការប្រមូលពន្ធ និងទប់ស្កាត់អំពើរត់គេចពន្ធនៅក្នុងប្រទេស។
លិខិតចុះហត្ថលេខាដោយលោក គុណ ញឹម ប្រតិភូរាជរដ្ឋាភិបាលទទួលបន្ទុក អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាចេញផ្សាយកាលពីថ្ងៃទី ៧ សីហា បានណែនាំដល់ប្រធាននាយកដ្ឋាន សាខា និងការិយាល័យគយទូទាំងប្រទេសឲ្យកំណត់ជាបណ្ដោះអាសន្ននូវមាត់ច្រកសម្រាប់ការនាំចូលមុខទំនិញស្រា និងបារីគ្រប់ប្រភេទ ដើម្បីស្របតាមយុទ្ធសាស្ត្រកៀរគរចំណូលរបស់រាជរដ្ឋាភិបាល។
លិខិតដដែលនោះបានឲ្យដឹងថា មុខទំនិញស្រាដែលមានជាតិអាល់កុលលើសពី ១០ ភាគរយ និងបារីគ្រប់ប្រភេទ គឺអនុញ្ញាតឲ្យនាំចូលតែតាមច្រកកំពង់ផែអន្តរជាតិព្រះសីហនុ កំពង់ផែអន្តរជាតិភ្នំពេញ និងអាកាសយានដ្ឋានអន្តរជាតិតែប៉ុណ្ណោះ ហើយលើកលែងតែការនាំចូលតាមរបបអគារលក់ទំនិញរួចពន្ធ។
លិខិតនោះបានឲ្យដឹងទៀតថា៖ «ការនាំចូលតាមមាត់ច្រកព្រំដែនផ្សេងទៀត ត្រូវមានការអនុញ្ញាតជាមុនពីអគ្គនាយកដ្ឋានគយ និងរដ្ឋាករកម្ពុជា»។
លិខិតនោះក៏បានបញ្ជាក់ឲ្យមន្ត្រីចាត់ចែងអនុវត្តឲ្យមានប្រសិទ្ធភាពខ្ពស់ ចាប់ពីថ្ងៃទី ១ ខែ វិច្ឆិកា ឆ្នាំ ២០២០ រហូតដល់មានការកំណត់ជាថ្មី»។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ មិនអាចផ្ដល់អត្ថាធិប្បាយបានភ្លាមៗតាមការស្នើសុំរបស់ភ្នំពេញប៉ុស្តិ៍បានទេ។
លោក សុខសេនសាន បានថ្លែងថា៖ «សហការីខ្ញុំកំពុងរៀបចំចម្លើយ»។
លោក មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជាបានឲ្យដឹងថា វិធានការដែលបានដាក់ចេញដោយនាយកដ្ឋានគយ និងរដ្ឋាករកម្ពុជា គឺជាការជំរុញដល់ប្រសិទ្ធភាពនៃការប្រមូលពន្ធរបស់រាជរដ្ឋាភិបាល ជាពិសេសកាត់បន្ថយការគេចពន្ធខុសច្បាប់ ខណៈដែលផលិតផលបារីមិនមានការបង់ពន្ធចំនួន ៤០ ភាគរយកំពុងដាក់លក់លើទីផ្សារ។
លោក មុំ គង់ បានថ្លែងឲ្យដឹងផងដែរថា៖ «នៅពេលដែលយកពន្ធទាបពីផលិតផលទាំងនេះមានន័យថា ដូចលើកទឹកចិត្តនៃការប្រើប្រាស់ ការដំឡើងពន្ធក៏បានចូលរួមកាត់បន្ថយការប្រើប្រាស់របស់ប្រជាពលរដ្ឋ»៕
វីដេអូ៖
