ភ្នំពេញៈ អគ្គនាយកដ្ឋានដឹកជញ្ជូនផ្លូវគោក សហការជាមួយគ្រឹះស្ថានធនាគារ និងហិរញ្ញវត្ថុចំនួន ៨ ដើម្បីបង្កលក្ខណៈងាយស្រួល ដល់ការដាក់ពាក្យស្នើសុំត្រួតពិនិត្យលក្ខណៈបច្ចេកទេសយានជំនិះ (ឆៀក) ដែលការសហការណ៍នេះ គ្រោងនឹងដំណើរការនៅចុងឆ្នាំ។
ការសម្រេចនេះ ត្រូវបានធ្វើឡើងនៅក្នុងកិច្ចប្រជុំពិភាក្សា ស្ដីពីនីតិវិធីនៃការដាក់ពាក្យស្នើសុំត្រួតពិនិត្យលក្ខណៈបច្ចេកទេសយានជំនិះ (ឆៀក) នៅតាមគ្រឹះស្ថានធនាគារ និងហិរញ្ញវត្ថុ តាមរយៈប្រព័ន្ធវីដេអូពីចម្ងាយ កាលពីថ្ងៃទី ២៥ ឧសភា ដោយមានការចូលរួមពីមន្ត្រីនាយកដ្ឋានដឹកជញ្ជូនផ្លូវគោក នាយកដ្ឋានព័ត៌មានវិទ្យា និងទំនាក់ទំនងសាធារណៈ ព្រមទាំងតំណាងមន្ទីរសាធារណការ និងដឹកជញ្ជូនរាជធានី ខេត្តទាំងអស់ផងដែរ។
លោក ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោកក្រសួងសាធារណការ និងដឹកជញ្ចូន ដែលដឹកនាំកិច្ចប្រជុំនេះ បានប្រាប់ភ្នំពេញប៉ុស្តិ៍នៅថ្ងៃទី ២៦ ឧសភាថា នេះគឺជានីតិវិធីបន្ថែមថ្មីមួយក្នុងការដាក់ពាក្យស្នើសុំត្រួតពិនិត្យលក្ខណៈបច្ចេកទេសយានជំនិះ ឬឆៀក ដើម្បីបង្កលក្ខណៈងាយស្រួលដល់ម្ចាស់យានយន្ត។
លោកបញ្ជាក់ថា៖ «នេះជានីតិវិធីថ្មីមួយ ដើម្បីជួយសម្រួលដល់បងប្អូនយើង ឲ្យមានជម្រើសច្រើននៅកន្លែងគ្រឹះស្ថានធនាគារ និងហិរញ្ញវត្ថុ ដែលជាដៃគូជាមួយក្រសួងសាធារណការ ដែលគាត់អាចឲ្យគ្រឹះស្ថានធនាគារ និងហិរញ្ញវត្ថុ ជួយបំពេញពាក្យស្នើសុំ ព្រោះមុននឹងឆៀកឡាន គឺត្រូវបំពេញពាក្យស្នើសុំ។ អ៊ីចឹងពេលគាត់ជួយបំពេញពាក្យស្នើសុំហើយ គឺបង់ថវិការនៅគ្រឹះស្ថានធនាគារ និងហិរញ្ញវត្ថុ នោះតែម្តង ហើយមកដល់កន្លែងឆៀក គ្រាន់តែបង្ហាញវិក័យបត្រហ្នឹងទៅ គឺចូលឆៀកតែម្តង»។
លោក ឈួន វ៉ន់ ក៏បានឲ្យដឹងបន្ថែមទៀតថា នីតិវិធីថ្មីនេះ នឹងបង្កភាពងាយស្រួល និងឆាប់រហ័សដល់ម្ចាស់យានយន្តមកត្រួតពិនិត្យលក្ខណៈបច្ចេកទេសយានជំនិះខ្លួន ខណៈគ្រឹះស្ថានធនាគារ និងហិរញ្ញវត្ថុ ដែលបានសហការក្នុងការងារនេះ។
ក្នុងនោះ លោករៀបរាប់ថា មានធនាគាវឌ្ឈនៈ ធនាគាអេស៊ីលីដា ធនាគា ABA ធនាគាស្ថាបនា ធនាគាកម្ពុជាសាធារណៈ ធនាគាឯកទេសវីង គ្រឹះស្ថានហិរញ្ញវត្ថុលីហ៊ួរ និងគ្រឹះស្ថានហិរញ្ញវត្ថុ Pi Pay ដែលគ្រោងនឹងដំណើរការជាផ្លូវការ នៅចុងឆ្នាំ ២០២១ នេះ។
កាលពីថ្ងៃទី ៧ ឧសភា ក្រសួងសាធារណការ និងដឹកជញ្ចូន បានប្រកាសបើកដំណើរការឡើងវិញនូវសេវាត្រួតពិនិត្យលក្ខណៈបច្ចេកទេសយានយន្តចល័ត (ឆៀកចល័ត) ដោយក្នុងនោះ ក្រសួង បានអំពាវនាវឲ្យម្ចាស់យានយន្តដែលផុតសុពលភាព ត្រូវយកយានយន្តរបស់ខ្លួន ទៅធ្វើការត្រួតពិនិត្យលក្ខណៈបច្ចេកទេស ចាប់ពីថ្ងៃទី ១០ ឧសភាតទៅ។
លោក ឈួន វ៉ន់ បញ្ជាក់ថា៖«ក្រោយផ្អាកសកម្មភាពមួយរយៈដោយសារតែវិបត្តិកូវីដ ១៩ ហើយយើងចាប់ដំណើរការឡើងវិញ ឃើញថា បងប្អូនយើងបានចូលរួមមកបំពេញការងារឆៀកយានយន្តនេះ គឺមានចំនួនច្រើន។ បើប្រៀបធៀបពីមុន(បិទប្រទេសដោយសារកូវីដ១៩) ដែលមានចន្លោះពី ១ ០០០ ទៅជាង ១ ០០០ យានយន្ត ជារៀងរាល់ថ្ងៃ គឺត្រឡប់មករកសភាពដើមវិញហើយ ពេលនេះ»៕