ភ្នំពេញ: អគ្គនាយកដ្ឋានអន្តោប្រវេសន៍នៃក្រសួងមហាផ្ទៃបានបណ្ដេញជនបរទេសចំនួន ៥៤២ នាក់ ក្នុងនោះមានស្ត្រីចំនួន ៥២ នាក់ ចេញពីប្រទេសកម្ពុជា ជាបន្តបន្ទាប់គ្នាក្នុងរយៈពេល ៩ ខែក្នុងឆ្នាំ ២០២០ ដោយហេតុបានប្រព្រឹត្តបទល្មើសផ្សេងៗខុសច្បាប់អន្តោប្រវេសន៍។
លោក កែវ វណ្ណថន អ្នកនាំពាក្យ និងជាអគ្គនាយករងនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃបានថ្លែងពីម្សិលមិញថា ជនបរទេសទាំងនោះមានចំនួន ៤០ សញ្ជាតិ ក្នុងនោះជនជាតិចិនមានចំនួនច្រើនជាងគេ។
លោក វណ្ណថន បានឱ្យដឹងថា ចាប់ពីឆ្នាំ ២០១៤ រហូតដល់បច្ចុប្បន្ននេះ អគ្គនាយកដ្ឋានអន្តោប្រវេសន៍នៃក្រសួងមហាផ្ទៃបានបណ្ដេញជនបរទេសចំនួន ១៧ ៥៩៩ នាក់ ក្នុងនោះស្ត្រីមានចំនួន ៣៤៥ នាក់ ដែលមាន ១០៤ សញ្ជាតិ ដោយសារពួកគេភាគច្រើនបានប្រព្រឹត្តបទល្មើស ដូចជា គ្រឿងញៀន ជួញដូរមនុស្ស ជួញដូរផ្លូវភេទ ចាប់ជំរិតទារប្រាក់តាមប្រព័ន្ធអ៊ីនធឺណិតអំពើហិង្សា។
លោកបញ្ជាក់ថា៖ «យើងបានអនុវត្តច្បាប់យ៉ាងតឹងរ៉ឹងចំពោះជនបរទេសនៅកម្ពុជា កាលណាពួកគាត់បានប្រព្រឹត្តល្មើសច្បាប់ គឺយើងអនុវត្តច្បាប់អន្តោប្រវេសន៍ ដោយធ្វើការបណ្ដេញចេញជាបន្តបន្ទាប់។ ទាក់ទងវិធានការថ្មីៗ គឺយើងបាននិងកំពុងធ្វើ ស្របពេលដែលមានជំងឺកូវីដ ១៩ ដូច្នេះជនបរទេសដែលចូលមកកម្ពុជាត្រូវតែគោរពតាមការណែនាំរបស់អាជ្ញាធរកម្ពុជាទាក់ទងការទប់ស្កាត់ជំងឺកូវីដ ១៩ និងគោរពច្បាប់អន្តោប្រវេសន៍កម្ពុជា។
លោក កែវ វណ្ណថន ថ្លែងថា៖ «ប្រសិនយើងរកឃើញជនល្មើសម្នាក់គឺយើងបណ្ដេញចេញម្នាក់ដោយមិនអាចទុកយូរបានទេ ព្រោះយើងពង្រឹងច្បាប់ការចូលមកកម្ពុជា។ បើគាត់ចង់ចូលមកកម្ពុជា គឺទាល់តែមានលក្ខខណ្ឌត្រឹមត្រូវតាមច្បាប់ និងមានលក្ខណៈត្រឹមត្រូវ ព្រោះកន្លងមកធ្លាប់មានជនបរទេសខ្លះមានលក្ខណៈមិនគ្រប់គ្រាន់តាមច្បាប់អន្តោប្រវេសន៍ យើងក៏មិនអនុញ្ញាតឱ្យគាត់ចូលមកដែរ»។
ទាក់ទងការបណ្ដេញជនបរទេសចេញពីកម្ពុជានេះ សមត្ថកិច្ចខេត្តព្រះសីហនុនៅថ្ងៃទី ២០ ខែវិច្ឆិកា បានបណ្ដេញស្ត្រីជាជនជាតិចិនចំនួន ២ នាក់ឱ្យទៅប្រទេសកំណើតវិញ បន្ទាប់ពីពួកគេបានជាប់ពាក់ព័ន្ធនឹងបទល្មើសបម្រើសេវាផ្លូវភេទនៅក្រុងព្រះសីហនុ។
លោក ជួន ណារិន្ទ ស្នងការនគរបាលខេត្តព្រះសីហនុបានថ្លែងពីម្សិលមិញថា លោកគ្រាន់តែទទួលព័ត៌មាន ប៉ុន្ដែសមត្ថកិច្ចលោកមិនបានកាន់សំណុំរឿងនេះទេ ព្រោះមន្ត្រីជំនាញនៃអគ្គនាយកដ្ឋានអន្តោប្រវេសន៍ជាអ្នកចាត់ចែង។
លោកបញ្ជាក់ថា៖ «ខ្ញុំគ្រាន់តែដឹងគេបណ្ដេញជនជាតិចិន ២ នាក់ ប៉ុន្ដែសមត្ថកិច្ចខ្ញុំមិនបានចាត់ចែងរឿងនេះទេ គឺខាងអន្តោប្រវេសន៍ជាអ្នកចាត់ចែង»។
បើតាមសារព័ត៌មាន DAP News ដកស្រង់សម្ដីមន្ត្រីនគរបាលម្នាក់មិនបញ្ចេញឈ្មោះឱ្យដឹងពីម្សិលមិញថា ជនជាតិចិនទាំង ២ នាក់ឈ្មោះ SHI LIBAO ភេទស្រី អាយុ ៤០ ឆ្នាំ និងឈ្មោះ XU YING ភេទស្រី អាយុ ៣៤ ឆ្នាំ ត្រូវបានបណ្ដេញចេញពីកម្ពុជា បន្ទាប់ពីសមត្ថកិច្ចបានបង្ក្រាបពួកគេពាក់ព័ន្ធនឹងបទល្មើសបម្រើសេវាផ្លូវភេទ។
លោក អំ សំអាត ប្រធានផ្នែកឃ្លាំមើល និងការពារសិទ្ធិមនុស្សនៃអង្គការលីកាដូបានថ្លែងពីម្សិលមិញថា ប្រទេសនីមួយៗតែងតែមានច្បាប់អន្តោប្រវេសន៍។ ដូច្នេះជនបរទេសដែលចូលមកប្រទេសកម្ពុជាដោយខុសច្បាប់ ត្រូវតែបណ្ដេញចេញទៅវិញយោងទៅតាមច្បាប់អន្តោប្រវេសន៍ ដោយប្រើវិធានការបណ្ដេញចេញ ឬអនុវត្តទោសនៅកម្ពុជា។
លោក ថ្លែងថា ប្រសិនជនបរទេសណាដែលបានប្រព្រឹត្តបទល្មើសព្រហ្មទណ្ឌនៅកម្ពុជា ត្រូវតែអនុវត្តទោសព្រហ្មទណ្ឌនៅកម្ពុជារួចរាល់សិន ទើបបណ្ដេញចេញពីកម្ពុជា ឬប្រទេសដែលមានបត្យាប័នជាមួយគ្នាអាចបញ្ជូនទៅឱ្យអនុវត្តទោសក្នុងពន្ធនាគារនៅប្រទេសសាមីខ្លួន។ ការបណ្ដេញនេះមិនមានចាត់ចូលក្នុងករណីរំលោភសិទ្ធិមនុស្សទេ ប៉ុន្ដែបើមានការបំពានលើគោលការណ៍សិទ្ធិមនុស្ស ទើបគេចាត់ចូលករណីរំលោភសិទ្ធិមនុស្ស។
លោក អំ សំអាត បានបញ្ជាក់ថា៖ «យើងគាំទ្រនូវការអនុវត្តច្បាប់ដ៏ត្រឹមត្រូវស្របតាមបទដ្ឋានអន្តរជាតិ ក៏ដូចជាគោលការណ៍សិទ្ធិមនុស្ស ព្រោះការបណ្ដេញចេញ ឬតម្រូវឱ្យត្រឡប់ទៅប្រទេសសាមីវិញ មិនមែនមានតែកម្ពុជាយើងមួយទេ គឺប្រទេសណាក៏គេធ្វើអ៊ីចឹងដែរ គឺឱ្យតែចូលប្រទេសគេដោយខុសច្បាប់ គឺគេនឹងអនុវត្តតាមច្បាប់ស្រុកគេហើយ»៕
វីដេអូ៖