.jpg)
អាជីវករក្នុងពេលកំពុងលក់បន្លែនៅផ្សារទួលទំពូងកាលពីកន្លងមក។ ហុង មិនា
ភ្នំពេញៈ អគ្គនាយកដ្ឋានកាំកុងត្រូលកម្ពុជា បានច្រានចោលចំពោះការលើកឡើងរបស់អតីតមេដឹកនាំគណបក្សប្រឆាំងលោកសម រង្ស៊ី ដែលថ្លែងតាមឃ្លីបវីដេអូមួយថា ម្ហូបអាហារ និងបន្លែបង្ការនៅក្នុងប្រទេសកម្ពុជា មានផ្ទុកទៅដោយសារធាតុគីមី ដែលកំពុងតែបំផ្លាញបន្តិចម្តងៗទៅដល់សុខភាពរបស់ប្រជាពលរដ្ឋ។
តាមរយៈលិខិតរបស់អគ្គនាយកដ្ឋានកាំកុងត្រូល ដែលភ្នំពេញបុស្ដិ៍ទទួលបាននៅថ្ងៃទី ៣០ ខែកញ្ញា បានសរសេរថា អ្វីដែលលោក សម រង្ស៊ី លើកឡើង គ្រាន់តែជាការកេងចំណេញផ្នែកនយោបាយ បំពានការពិតទាំងស្រុងគ្មានដឹងពីស្ថានភាពពិត និងអ្វីដែលរាជរដ្ឋាភិបាល និងប្រជាពលរដ្ឋកម្ពុជា បាននិងកំពុងធ្វើ និងទទួលផលពីការខិតខំចូលរួមគ្រប់ភាគីពាក់ព័ន្ធ ពិសេសលើបញ្ហាសុវត្ថិភាពម្ហូបអាហារនេះឡើយ។
លិខិតដដែលបានបញ្ជាក់ថា៖«ចំពោះបញ្ហាពាក់ព័ន្ធនឹងសុវត្ថិភាពម្ហូបអាហារ រាជរដ្ឋាភិបាល បានរៀបចំគ្រប់គ្រាន់ និងច្បាស់លាស់ ប្រកបដោយលក្ខណៈបច្ចេកទេស និងវិទ្យាសាស្ដ្រ ដើម្បីធានាសុវត្ថិភាព សុខភាព ព្រមទាំងការផ្ដល់ឲ្យបានពេញលេញ នូវអាហារមានគុណភាពជូនប្រជាពលរដ្ឋ»។
តាមរយៈលិខិតរបស់អគ្គនាយកដ្ឋានកាំកុងត្រូលដដែលបានរំឭក ចំពោះមតិលើកឡើងរបស់លោក ហ៊ុន សែន នាពេលកន្លងមក ធ្លាប់ប្រាប់ឲ្យប្រជាពលរដ្ឋធ្វើពហិការ ចំពោះម្ហូបអាហារ ដែលមានលួចលាយសារធាតុគីមី។
លិខិតបន្ដសរសេរបញ្ជាក់៖«ការហាមឃាត់នោះគឺសម្ដេចតេជោ មានបំណងឲ្យបងប្អូនប្រជាពលរដ្ឋទាំងអស់ មានការប្រុងប្រយ័ត្ន ចេះមើល ចេះជ្រើសរើស ផលិតផលទំនិញម្ហូបអាហារ ឲ្យបានសមស្របប៉ុណ្ណោះ ពីព្រោះបញ្ហាសុវត្ថិភាពម្ហូបអាហារ គឺជាបញ្ហារបស់យើងទាំងអស់គ្នា»។
តាមរយៈគេហទំព័រហ្វេសប៊ុក របស់លោក សម រង្ស៊ី ដែលបានបង្ហោះកាលពីថ្ងៃទី ២៧ ខែកញ្ញា ឆ្នាំ ២០១៨ បានសរសេរថា៖ «សូមការពារប្រជាពលរដ្ឋខ្មែរ កុំឲ្យគេសម្លាប់បន្តិចម្តងៗ ដោយគេបញ្ចូលជាតិគីមី ដែលជាជាតិពុល ក្នុងចំណីអាហារ ដែលប្រជាពលរដ្ឋទិញមកហូបចុករាល់ថ្ងៃពីទីផ្សារ»។
លោក សម រង្ស៊ី បាននិយាយតាមរយៈវីដេអូបង្ហោះលើហ្វេសប៊ុក ចំពោះបញ្ហាចំណីអាហារនេះដោយចោទសួរថា តើនរណាត្រូវធានា សុវត្ថិភាពចំណីអាហារសម្រាប់ប្រជាពលរដ្ឋ ហើយធានាយ៉ាងដូចម្ដេច?។
លោកបានអះអាងថា៖«ចំណីអាហារនៅប្រទេសកម្ពុជា ដូចជាផ្លែឈើ បន្លែ សាច់ ត្រី ច្រើនតែបង្កប់ដោយជាតិគីមី ប្រកបដោយគ្រោះថ្នាក់។ ដូច្នេះយើងត្រូវសម្គាល់ ជាតិគីមីទាំងអស់នោះ នៅក្នុងទំនិញ អីវ៉ាន់ហូបចុក ដែលលក់នៅតាមទីផ្សារ»។
ឆ្លើយតបចំពោះអ្វីដែលប្រមុខរាជរដ្ឋាភិបាលកម្ពុជាធ្លាប់បានលើកឡើងចំពោះបញ្ហាបចំណីអាហារមានសារជាតិគីមី និងប្រាប់កុំឲ្យប្រជាពលរដ្ឋទិញអ្វីដែលមានជាតិគីមីនាពេលកន្លងមកនោះ លោក រង្ស៊ី ថា៖«លោក ហ៊ុន សែន និយាយបែបនេះ អំពីសុវត្ថិភាពចំណីអាហារ អំពីហានិភ័យ សម្រាប់ប្រជាពលរដ្ឋដែលជាអ្នកប្រើប្រាស់ បង្ហាញឲ្យឃើញថា គាត់អត់យល់អ្វីទាល់តែសោះ គាត់មិនមានស្មារតីទទួលខុសត្រូវទេ។ គាត់គួរណាស់សិក្សា អំពីបទពិសោធន៍ នៅប្រទេសជឿនលឿន មិនមែនតែនៅសហរដ្ឋអាមេរិក និងទ្វីបអឺរ៉ុបទេ សូម្បីតែនៅប្រទេសជិតខាងកម្ពុជា ដូចជា ប្រទេស ឥណ្ឌា ហ្វីលីពីន វៀតណាម និងប្រទេសថៃ គេមានអ្នកដឹកនាំដែលមានចំណេះវិជ្ជាខ្ពស់ខ្ពស់ ដែលមានស្មារតី ទទួលខុសត្រូវ ហើយគេចាត់វិធានការ គេរៀបចំឲ្យមានស្ថាប័ន ឲ្យមានក្រសួង ឲ្យមានវិទ្យាស្ថានឲ្យមានយន្ដការ ឲ្យមានមន្ទីរពិសោធន៍ ដើម្បីការពារសុខភាពប្រជាពលរដ្ឋនៅប្រទេសគេ»។
ផ្ទុយពីអ្វីដែលលោក សម រង្ស៊ី បានលើកឡើង អគ្គនាយកដ្ឋានកាំកុងត្រូល បានបង្ហាញថា៖«ចំពោះការលើកបង្ហាញពីការធ្វើការរបស់មន្ដ្រី មន្ទីរពិសោធន៍នៅស្រុកគេ ក៏គ្រាន់តែចង់សម្ញែង អួតអាង បំភ្លៃការពិតថា មានតែស្រុកអាមេរិក ឬប្រទេសដទៃ ហើយមកបង្អាក់បង្អោនជាតិសាសន៍កម្ពុជាយើងប៉ុណ្ណោះ»។
លិខិតរបស់ អគ្គនាយកដ្ឋានកាំកុងត្រូលបន្ដបង្ហាញថា កម្ពុជា មានមន្ទីរពិសោធន៍ម្ហូបអាហារ ដែលមានសមត្ថភាពវិភាគឃើញសារធាតុគីមី មេរោគចម្លង កត្ដាគ្រោះថ្នាក់ជារូបវន្ដផ្សេងៗ មិនចាញ់ប្រទេសជឿនលឿន ទាំងលើឧបករណ៍ សម្ភារ យកមកបំពាក់ប្រើប្រាស់នៅមន្ទីរពិសោធន៍ និងមន្ដ្រីជំនាញ សុទ្ធតែបានឆ្លងកាត់ការរៀនសូត្រមានបទពិសោធន៍ពីក្នុង និងក្រៅប្រទេស៕
