ភ្នំពេញៈ អគ្គនាយកដ្ឋានពន្ធដារបានព្រមានចាត់វិធានការចំពោះបុគ្គលមួយចំនួនដែលបានអូសទាញ បោកបញ្ឆោតបុគ្គលផ្សេងទៀត ក្នុងចេតនាគេចវេះពីការបង់ពន្ធតាមរយៈការប្រព្រឹត្តសកម្មភាពល្មើសច្បាប់ផ្សេងៗដែលអាចប្រឈមមុខនឹងការជាប់ពន្ធនាគារដល់ទៅ ៥ ឆ្នាំ។
ការប្រកាសចាត់វិធានការនេះ បន្ទាប់ពីសង្កេតឃើញថា កន្លងមកមានបុគ្គលមួយចំនួនបានអូសទាញបោកបញ្ឆោតបុគ្គលផ្សេងទៀតដែលមានការយល់ដឹងទាបឲ្យឈរឈ្មោះជាម្ចាស់ភាគហ៊ុន និងជាអភិបាលក្នុងការបង្កើតក្រុមហ៊ុននៅក្រសួងពាណិជ្ជកម្ម និងចុះបញ្ជីពន្ធដារនៅអគ្គនាយកដ្ឋានពន្ធដារ។
នៅពេលទទួលបានវិញ្ញាបនបត្រ ចុះបញ្ជីអាករលើតម្លៃបន្ថែមរួចហើយក៏បានយកទៅប្រើប្រាស់ចេញវិក្កយបត្រក្លែងក្លាយទៅឱ្យក្រុមហ៊ុនមួយផ្សេងទៀត ក្នុងគោលបំណងក្លែងបន្លំដាក់បញ្ចូលជាឥណទានអាករលើធាតុចូល សម្រាប់កាត់កងអាករលើធាតុចេញ និងបញ្ចូលជាបន្ទុកចំណាយដើម្បីកាត់បន្ថយពន្ធលើប្រាក់ចំណូល។
នេះបើតាមសេចក្តីជូនដំណឹងរបស់អគ្គនាយកដ្ឋានពន្ធដារ ស្តីពីការទប់ស្កាត់ការគេចវេះបង់ពន្ធដែលបានចេញផ្សាយកាលពីម្សិលមិញ។
លោក គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ ដែលបានចុះហត្ថលេខាក្នុងសេចក្តីជូនដំណឹងនេះបានចាត់ទុកសកម្មភាពប្រព្រឹត្តបទល្មើសទាំងនេះ គឺជាការគេចវេះពន្ធ និងការប្រព្រឹត្តបទល្មើសព្រហ្មទណ្ឌលើបទប្បញ្ញត្តិស្តីពីពន្ធដារដែលអាចជាប់ទោសពី ១ ឆ្នាំដល់ ៥ ឆ្នាំ។
លោកបានបញ្ជាក់ថា៖ «អគ្គនាយកដ្ឋាននឹងចាត់វិធានការចាំបាច់នានាតាមច្បាប់ជាធរមាន ដើម្បីស្វែងរកបុគ្គលដែលបានប្រព្រឹត្តបទល្មើសមកផ្តន្ទាទោសតាមច្បាប់។ ដូច្នេះដើម្បីចៀសវាងនូវការដាក់ទោសទណ្ឌ សូមឲ្យសាធារណជន និងធុរកិច្ចទាំងអស់ចៀសវាងនូវការប្រព្រឹត្តបទល្មើស និងអនុវត្តច្បាប់ស្តីពីសារពើពន្ធឲ្យបានត្រឹមត្រូវ»។
ដោយមិនគិតដល់ទោសទណ្ឌផ្សេងទៀត អភិបាល បណ្ណាធិការកម្មសិទ្ធិកររបស់សហគ្រាសណាមួយឬបុគ្គលទទួលខុសត្រូវឱ្យសហគ្រាសណាមួយដែលបានប្រព្រឹត្តអំពើគេចវេះពន្ធ នឹងត្រូវរងការផ្តន្ទាទោសតាមមាត្រា ១២៧ នៃច្បាប់ស្តីពីសារពើពន្ធ ដោយពិន័យជាប្រាក់ពី ១០ លានរៀលដល់ ២០ លានរៀលឬជាប់ពន្ធនាគារពី ១ ឆ្នាំដល់ ៥ ឆ្នាំឬទោសទាំង ២ នេះ។
ភ្នំពេញប៉ុស្តិ៍មិនអាចសុំការអត្ថា ធិប្បាយបន្ថែមជុំវិញបញ្ហានេះពីលោក គង់ វិបុល បានទេ កាលពីម្សិលមិញ ព្រោះតែលោក មិនលើកទូរស័ព្ទ។
កាលពីខែមិថុនាកន្លងទៅ អគ្គនាយកដ្ឋានពន្ធដារ បានឲ្យដឹងថា សម្រាប់រយៈពេល ៥ ខែដំបូង នៅដើមឆ្នាំនេះ ចំណូលពន្ធអាករដែលប្រមូល បានតាមប្រព័ន្ធគ្រប់គ្រងទិន្នន័យ ចំណូលអនឡាញ មានចំនួន ៥ ៣៤៣,៣៩ ពាន់លានរៀល ឬប្រ មាណ ១ ៣៣៥,៨៥ លានដុល្លារ ស្មើនឹង ៥៨,៣៧ ភាគរយ នៃផែនការប្រចាំឆ្នាំ។ ចំនួននេះ បើប្រៀបធៀបរយៈពេលដូចគ្នាក្នុងឆ្នាំ ២០១៨ មានការកើនឡើងចំនួន ១ ១៦៦,៩០ ពាន់លានរៀល ឬប្រមាណ ២៩១,៧៣ លានដុល្លារ ស្មើនឹង ២៧,៩៤ ភាគរយ។
លោក ព្រាប កុល នាយកប្រតិបត្តិអង្គការតម្លាភាពកម្ពុជាបានប្រាប់ភ្នំពេញប៉ុស្តិ៍កាលពីម្សិលមិញថា ការព្រមានរបស់ស្ថាប័នមួយនេះ មិនមែនជារឿងថ្មីនោះទេ ប៉ុន្តែចំពោះការអនុវត្តច្បាប់គឺជារឿងចាំបាច់ដែលត្រូវតែមានវិធានការដើម្បីទប់ស្កាត់ការគេចវេះពីការបង់ពន្ធ។
លោកបន្តថា ក្នុងពេលបច្ចុប្បន្ន ចំណូលពន្ធដែលរដ្ឋាភិបាលប្រមូលបាន មានការកើនឡើងចន្លោះពី ៨ ទៅ ២០ ភាគរយ ដូច្នេះការអនុវត្តច្បាប់ និងការពង្រឹងច្បាប់កាន់តែប្រសើរគឺជាកត្តានាំឲ្យការប្រមូលចំណូលពន្ធចូលរដ្ឋមានការកើនឡើងហ្នឹងដែរ។
លោកបញ្ជាក់ថា៖ «វាជាកំណើនគួរឲ្យកត់សម្គាល់ហើយយើងក៏សង្ឃឹមថា នឹងមានការកើនឡើងហ្នឹងទៀតបើអ្នករកស៊ីធំៗពួកឧកញ៉ាឬឈ្មួញអ្នកមានលុយ មានអំណាចហ្នឹងគាត់ស្ម័គ្រចិត្តបង់ពន្ធ ដែលអាចនឹងមានចំណូចបន្ថែមទៀត ព្រោះមានអ្នកមាន ឧកញ៉ាមួយចំនួន ដែលមានខ្នងទៅ គាត់មានវិធីដើម្បីគេចពន្ធ»៕