.jpg)
វីរុសឆ្លងវីរុសនេះបានរាលដាលដល់ពន្ធនាគារខេត្តព្រះសីហនុដោយមានអ្នកជាប់ឃុំចំនួន ៣៤ នាក់ធ្វើតេស្តិ៍វិជ្ជមាននៅថ្ងៃទី ៨ ខែឧសភានេះ។
ភ្នំពេញៈ អ្នកជាប់ឃុំប្រមាណជាង ១ ម៉ឺននាក់ នៅក្នុងពន្ធនាគារក្នុងរាជធានីភ្នំពេញបានទទួលការចាក់វ៉ាក់សាំងរួចរាល់ ដើម្បីការពារការឆ្លងជំងឺកូវីដ១៩ ក្នុងនោះមានអ្នកជាប់ឃុំតែ ៤ នាក់ប៉ុណ្ណោះបានបដិសេធមិនទទួលវ៉ាក់សាំង ដោយហេតុនិន្នាការប្រឆាំង។ នេះបើយោងតាមអ្នកនាំពាក្យអគ្គនាយកដ្ឋានពន្ធនាគារ។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារបានថ្លែងប្រាប់ភ្នំពេញប៉ុស្តិ៍នៅថ្ងៃទី ១១ ខែឧសភានេះថា មន្ដ្រីអគ្គនាយកដ្ឋានពន្ធនាគារនៅរាជធានីភ្នំពេញបានសហការជាមួយក្រុមការងារចាក់វ៉ាក់សាំងនៃមន្ទីរពេទ្យ ១៦ ឧសភា បានប្រើរយៈពេល ៣ ថ្ងៃ ចាប់ផ្ដើមចាក់ថ្ងៃទី ៧ ដល់ថ្ងៃទី ៩ ខែឧសភា គឺបានបញ្ចប់ចាក់វ៉ាក់សាំងនេះដល់ជនជាប់ឃុំក្នុងពន្ធនាគារនៅរាជធានីភ្នំពេញ។
លោកបានថ្លែងថា៖ «យើងធ្វើលឿនលើសផែនការ ដូច្នេះយើងបញ្ចប់ការចាក់វ៉ាក់សាំងនៅក្នុងពន្ធនាគារនៅរាជធានីភ្នំពេញតាំងពីល្ងាចថ្ងៃអាទិត្យ។ ឥឡូវយើងកំពុងស្នើគោលការទៅចាក់វ៉ាក់សាំងដល់ជនជាប់ឃុំនៅខេត្ដព្រះសីហនុ ព្រោះទីនោះមានការឆ្លងរីករាលដាលជំងឺកូវីដ១៩ខ្លាំង ជនជាប់ឃុំនៅពន្ធនាគារខេត្ដព្រះសីហនុមានជាង ១ ៧០០ នាក់»។
ក្រោយមានការផ្ទុះការឆ្លងរីករាលដាលខ្លាំងនៃជំងឺកូវីដ១៩ កាលពីថ្ងៃទី ៨ ខែឧសភានេះ រដ្ឋបាលខេត្តព្រះសីហនុបានផ្សាយរបាយការណ៍លទ្ធផលនៃការវិភាគវត្ថុសំណាករកមេរោគកូវីដ១៩ ដោយបានរកឃើញមានករណីវិជ្ជមានថ្មីនៅក្នុងសហគមន៍ចំនួន ១២៦ នាក់ក្នុងនោះ ៣៤ នាក់គឺជាជនជាប់ឃុំនៅក្នុងពន្ធនាគារខេត្តនេះ។
លោក នុត សវនា បានបញ្ជាក់ថា ត្រឹមថ្ងៃទី ១១ ខែឧសភានេះ គឺមិនទាន់រកឃើញករណីវិជ្ជមានបន្ថែមទៀតនៃជនកំពុងជាប់ឃុំនៅក្នុងពន្ធនាគារខេត្ដព្រះសីហនុនៅឡើយទេ ខណៈបច្ចុប្បន្នក្រុមគ្រូពេទ្យកំពុងយកសំណាករបស់អ្នកពាក់ព័ន្ធមកពិនិត្យនៅឡើយ។
លោកបានថ្លែងថា៖ «យើងទើបធ្វើតេស្ដលើកទី ១ រួចហើយ ឥឡូវកំពុងរង់ចាំលទ្ធផល។ រយៈពេល ៣ ទៅ ៤ ថ្ងៃខាងមុខ ក្រុមគ្រូពេទ្យនឹងមកយកសំណាកធ្វើតេស្ដម្ដងទៀត»។
លោក សវនា បច្ចុប្បន្នអគ្គនាយកដ្ឋានពន្ធនាគារបានដាក់ចេញវិធានការណ៍តឹងរ៉ឹងជាបន្តបន្ទាប់ ដើម្បីទប់ស្កាត់ការឆ្លងរីករាលដាល់ជំងឺកូវីដ១៩ ចូលទៅក្នុងពន្ធនាគារ។ ក្រោយពេលមានការផ្ទុះការឆ្លងក្នុងពន្ធនាគារអគ្គនាយកដ្ឋានពន្ធនាគារបានរឹតបន្ដឹងវិធានការណ៍បន្ថែមទៀត ដែលវិធានការណ៍នេះមានការចូលរួមតាក់តែងដោយគណៈកម្មការកាកបាទក្រហមអន្តរជាតិ និងអង្គការសុខភាពពិភពលោកក៏បានទទួលស្គាល់លើវិធានការណ៍ដែលកំពុងអនុវត្ដនេះ។
លោកបានថ្លែងថា៖ «យើងញែកក្រុមអ្នកវិជ្ជមានដាក់នៅអគារដាច់ដោយឡែក អ្នកដែលសង្ស័យក៏នៅអគារដោយឡែក យើងមានវិធានការណ៍ទៅតាមចំណាត់ថ្នាក់បែបនេះ ទាំងមន្ដ្រីពន្ធនាគារ និងជនជាប់ឃុំ គឺមិនឱ្យពួកគាត់ចេញពីពន្ធនាគារទេ»។
លោក សវនា បានបញ្ជាក់ថា ក្រោយពេលបញ្ចប់ការធ្វើតេស្តរកមេរោគកូវីដ១៩ ចំពោះអ្នកជាប់ពាក់ព័ន្ធចប់រួចរាល់នៅក្នុងពន្ធនាគារខេត្ដព្រះសីហនុ គឺនឹងចាប់ផ្ដើមអនុវត្ដយុទ្ធនាការចាក់វ៉ាក់សាំងដល់ជនជាប់ឃុំតែម្ដង ខណៈបច្ចុប្បន្នគឺទទួលបានគោលការណ៍ពីថ្នាក់ដឹកនាំ និងលោកនាយករដ្ឋមន្ត្រីរួចហើយ ដើម្បីផ្ដល់វ៉ាក់សាំងដល់ជនជាប់ឃុំក្នុងខេត្ដ ដែលជាខេត្ដគោលដៅ។
លោកបានឱ្យដឹងទៀតថា ក្រៅពីខេត្ដព្រះសីហនុជាខេត្ដគោលដៅសម្រាប់ផ្ដល់វ៉ាក់សាំងដល់ជនជាប់ឃុំ ខេត្ដសៀមរាប និងខេត្ដកណ្ដាលក៏ជាខេត្ដគោលដៅ ដើម្បីផ្ដល់វ៉ាក់សាំងដល់ជនជាប់ឃុំផងដែរ ព្រោះខេត្ដទាំងនេះកំពុងប្រឈមការឆ្លងរីករាលដាលនៃជំងឺកូវីដ១៩ខ្លាំងជាងគេ។
លោក សវនា បានឱ្យដឹងថាបច្ចុប្បន្នជនកំពុងជាប់ឃុំសរុបនៅទូទាំងប្រទេសមានចំនួនប្រមាណជាង ៤ ម៉ឺននាក់៕
