ព្រះសីហនុៈ អគ្គស្នងការនគរបាលជាតិ លោក នេត្រ សាវឿន បានសម្រេចបញ្ជូនមន្ត្រីនគរបាលជាន់ខ្ពស់ចំនួន ១១ រូបឲ្យទៅជួយដឹកនាំពង្រឹងការការពារសន្តិសុខដល់ស្នងការដ្ឋាននគរបាលខេត្តព្រះសីហនុ ខណៈដែលប្រជាពលរដ្ឋនិងសង្គមស៊ីវិល បានសម្តែងការព្រួយបារម្ភ ចំពោះកំណើនយ៉ាងច្រើននៃជនជាតិចិន ហើយតែងតែបង្កឲ្យមានបទល្មើសជាច្រើនកើតឡើងនៅក្នុងខេត្តទេសចរណ៍ដ៏ល្បីល្បាញជាប់មាត់សមុទ្រមួយនេះ។
បើតាមលិខិតបង្គាប់ការ ដែលចុះហត្ថលេខាដោយនាយឧត្តមសេនីយ៍ នេត សាវឿន អគ្គស្នងការនគរបាលជាតិ ចុះថ្ងៃទី ៣១ ខែសីហា ឆ្នាំ ២០១៨ បានសម្រេចចាត់បញ្ជូនក្រុមការងារ ចំនួន ១១ រូប ក្នុងនោះមានលោកនាយឧត្តមសេនីយ៍ ថោង លីម អគ្គស្នងការរងនគរបាលជាតិ ជាប្រធាន និងឧត្តមសេនីយ៍ចំនួន ៩ រូប និងវរសេនីយ៍ចំនួនមួយរូប ដែលមានតួនាទីជាអនុប្រធាននិងសមាជិក«ដើម្បីចុះជួយដឹកនាំ ពង្រឹងការងារសន្តិសុខ សណ្តាប់ធ្នាប់ និងរបៀបរៀបរយសង្គម នៅខេត្តព្រះសីហនុ»។
លោក គៀត ច័ន្ទថារិទ្ធ អ្នកនាំពាក្យ អគ្គស្នងការនគបាលជាតិ បានថ្លែងប្រាប់ភ្នំពេញបុស្ដិ៍ កាលពីម្សិលមិញថា ការដែលអគ្គស្នងការនគរបាលជាតិ បញ្ជូនកងកម្លាំងជំនាញទៅបន្ថែមនេះ ព្រោះក្នុងរយៈកាលចុងក្រោយនេះ វិនិយោគិនបរទេស បានសម្រុកទៅវិនិយោគ យ៉ាងគំហុក នៅខេត្ដព្រះសីហនុ។
លោកថ្លែងថា៖«ពេលមានការវិនិយោគបរទេសធំៗច្រើនអ៊ីចឹង គឺយើងត្រូវការពារសន្ដិសុខឲ្យគេ ដើម្បីឲ្យគេឃើញថា ស្រុកយើង សុខសប្បាយល្អចឹង ដើម្បីឲ្យអ្នកវិនិយោគ គេបន្ដមកច្រើនថែមទៀត»។
បើតាមលោក ច័ន្ទថារិទ្ធ នៅខេត្ដព្រះសីហនុនាពេលបច្ចុប្បន្ន មិនមែនមានតែជនជាតិចិន ដូចការលើកឡើងមួយចំនួននោះទេ ក្នុងនោះក៏មានវិនិយោគិន កូរ៉េ និងម៉ាឡេស៊ី ជាច្រើនផងដែរ។
លោកបន្ថែមថា៖«ចិនគឺមកច្រើនហើយ តែកូរ៉េ ខាងម៉ាឡេ អីក៏គាត់មកដែរ តែគ្នាយើង គាត់មើលឃើញតែខាងចិន។ ប៉ុន្ដែតាមពិតចំពោះការរកស៊ី ចិនគាត់ច្រើនជាងគេ គាត់ធ្វើអ្វីលឿនជាងគេ»។
បញ្ជាក់ថា ការបញ្ចូនក្រុមការងារជំនាញចុះទៅបន្ថែមនេះ មិនមែនជាហេតុការមិនល្អទេ ហើយក្នុងខេត្ដព្រះសីហនុ មកដល់ពេលនេះ មិនមានហេតុការណ៍មិនល្អណាមួយកើតឡើងនោះទេ គ្រាន់តែមានការខុសឆ្គងខ្លះ ដែលមិនអាចចៀសផុត»។
លោក ស្រី ជាប សុធារី មន្រ្ដីសម្របសម្រួលសមាគមអាដហុក (Adhoc) ប្រចាំខេត្ដព្រះសីហនុ បានឲ្យដឹងថា នៅខេត្ដព្រះសីហនុ បច្ចុប្បន្ន មានករណីកើតឡើងមិនដាច់ទេ គ្រាន់តែមិនសូវមានអ្វីធំដុំ ជាករណីដដែលៗ ពិសេសករណីជម្លោះជនជាតិចិន និងជនជាតិចិន។
លោកស្រីថ្លែងថា៖«បញ្ហាបទល្មើសមានរាល់ថ្ងៃ ប៉ុន្ដែបើចង់បានព័ត៌មានលម្អិតទាក់ទងរឿងហ្នឹង ទាល់តែសួរទៅស្នងការខេត្ត។ មុននេះ (ល្ងាចថ្ងៃព្រហស្បត៍) ខ្ញុំទើបមកពីសង្កាត់លេខ ៤ ចង់ទៅសួររឿងថ្ងៃមុន ដែលមានជនជាតិចិនទៅអុកឡុកកន្លែងម៉ាស្សាមួយកន្លែង។ ទៅដល់ទីនោះ គឺមិនបានជួបប៉ូលិសអីម្នាក់សោះ។ ពេលសួរទៅ ទើបដឹងថា មានករណីមនុស្សស្លាប់នៅម្ដុំតោពីរ ហើយប៉ូលិសទៅទីនោះអស់»។
លោស្រីបន្ថែមថា៖«ឥឡូវប៉ូលិសនៅប្រចាំការ ២៤ម៉ោង ប្ដូរវេនគ្នាប្រចាំការ ព្រោះមិនអាចអត់មានអ្នកប្រចាំការបានទេ ព្រោះមានករណីកើតឡើងរហូត។ ប៉ុន្ដែឥឡូវយើងបានក្រុមការងារ ប្រជាការពារភូមិ គាត់បានចុះជួយការងារនេះខ្លះ។ តែយើងនៅតែព្រួយបារម្ភ ព្រោះជនជាតិចិនមានច្រើនឡើងៗ យើងមិនដឹងជាគោលនយោបាយរបស់រាជរដ្ឋាភិបាលយ៉ាងម៉េចទេ តែការព្រួយបារម្ភនេះ ព្រោះយើងជាជនជាតិខ្មែរម្នាក់»។
បើតាមលោក ស្រី សុធារី ប្រជាការពារភូមិ គឺជាប្រជាពលរដ្ឋធ្វើការងារស្ម័គ្រចិត្ដ ដែលមានគ្នាប្រលែល ៤០នាក់ ដោយបែងចែកគ្នា ឃ្លាំមើលទៅតាមសង្កាត់ផ្សេងៗគ្នា ក្នុងក្រុងកំពង់សោម។
លោក រ៉ា ម៉ន ប្រជាពលរដ្ឋ រស់នៅក្នុងសង្កាត់ លេខ៤ នៃក្រុងកំពង់សោម បានលើកឡើងថា បច្ចុប្បន្ន គ្រប់កន្លែងនៅក្រុងជាប់មាត់សមុទ្រមួយនេះ គឺពោរពេញទៅដោយជនជាតិចិន។
លោកថ្លែងថា៖«មិនមែនមានតែជនជាតិចិនចុះមកវិនិយោគទេ សូម្បីតែអ្នករកស៊ីធម្មតា បើកហាង និងកម្មករសំណង់ ក៏សុទ្ធតែជនជាតិចិនដែរ។ ខ្មែរយើង បើមានល្មម មិនបាច់ទៅរកស៊ីអីទេ នៅកំពង់សោមនោះ»៕