The Phnom Penh Post Search

Search form




Logo of Phnom Penh Post newspaper Phnom Penh Post - អគ្គស្នងការ​បញ្ជា​ឲ្យ​នគរបាល​កែប្រែ​ឥរិយាបថ​បម្រើ​ពលរដ្ឋ

អគ្គស្នងការ​បញ្ជា​ឲ្យ​នគរបាល​កែប្រែ​ឥរិយាបថ​បម្រើ​ពលរដ្ឋ

លោក នេត សាវឿន អគ្គ​ស្នងការ​នគរបាល​ជាតិ​។
លោក នេត សាវឿន អគ្គ​ស្នងការ​នគរបាល​ជាតិ​។ រូបថត នគរបាល​ជាតិ

អគ្គស្នងការ​បញ្ជា​ឲ្យ​នគរបាល​កែប្រែ​ឥរិយាបថ​បម្រើ​ពលរដ្ឋ

ភ្នំពេញៈ អគ្គស្នងការ​នគរបាល​ជាតិ​លោក នេត សាវឿន បាន​បញ្ជា​ឲ្យ​មន្ត្រី​នគរបាល​ពង្រឹង​សមត្ថភាព​បម្រើ​សេវា​ជូន​ពលរដ្ឋ​តាមរយៈ​ការ​កែប្រែ​ឥរិយាបថ​ធ្វើ​ការងារ​តាម​មូលដ្ឋាន​ដើម្បី​ទទួល​បាន​ការ​ដំឡើង​ឋានន្តរស័ក្តិ និង​ប័ណ្ណ​សរសើរ​។

ការ​ប្រកាស​បញ្ជា​នេះ​ធ្វើ​ឡើង​កាលពី​ថ្ងៃ​ទី​ ២៨ ខែ​កញ្ញា នៅ​ខេត្ត​កំពត​ក្នុង​ពិធី​ប្រកាស​តែងតាំង​លោក ម៉ៅ ច័ន្ទមធុរិទ្ធ ស្នងការ​នគរបាល​ខេត្ត​កំពត​ថ្មី​ថ្នាក់​ឧត្តម​សេនីយ៍ត្រី​ចំណែក​លោក ថ្លាង ភិរិន ស្នងការ​ចាស់​ត្រូវ​ទៅ​​បំពេញ​ការងារ​ថ្មី​ក្នុង​តួនាទី​ជា​អនុប្រធាន​នាយកដ្ឋាន​សណ្តាប់ធ្នាប់​សាធារណៈ​របស់​អគ្គស្នងការដ្ឋាន​នគរបាល​ជាតិ។

បើ​តាម​ការ​ចុះ​ផ្សាយ​របស់​អគ្គស្នងការដ្ឋាន​នគរបាល​ជាតិ​ក្នុង​ពិធី​តែងតាំង​នោះ​លោក នេត សាវឿន បាន​ប្រកាស​ឲ្យ​ប៉ុស្តិ៍​រដ្ឋបាល​នគរបាល​ទាំងអស់​ធ្វើការ​កែប្រែ​ឥរិយាបថ​ខិតខំ​បម្រើ​សេវា​ជូន​ប្រជាពលរដ្ឋ​ឲ្យ​បាន​ល្អ​ប្រសើរ​ហើយ​ការ​កែប្រែ​នេះ​ទៀត​សោត​គឺ​ធ្វើ​ឡើង​តាមរយៈ​ការ​ប្រឡង​ប្រជែង​អនុវត្ត​ការងារ​នៅ​តាម​មូលដ្ឋាន។

លោក​ថា៖ «ប៉ុស្តិ៍​នគរបាល​ត្រូវ​​កែ​អាកប្បកិរិយា​របស់​ខ្លួន​ត្រូវ​ធ្វើ​ល្អ​ ផ្តល់​ទំនុក​ចិត្ត​ល្អ ការពារ​សុខ​សុវត្ថិភាព​ជូន​ដល់​ប្រជាពលរដ្ឋ​ជាមួយ​នឹង​ភ្ញៀវទេសចរ​ពិសេស​កាត់បន្ថយ​ការ​ព្រួយបារម្ភ​របស់​ប្រជាពលរដ្ឋ​នៅ​តាម​មូលដ្ឋាន​ដូចជា បទល្មើស​ចោរប្លន់ ល្បែង​ស៊ីសង បទល្មើស​គ្រឿងញៀន និង​បទល្មើស​ចរាចរណ៍​ជាដើម»។

លោក ម៉ៅ ច័ន្ទមធុរិទ្ធ ដែល​ទើប​ទទួល​​តំណែង​ថ្មី​ជា​ស្នងការ​ខេត្ត​កំពត​បាន​ឲ្យ​ដឹង​ថា​ ​ការ​បញ្ជា​​កែប្រែ​ឥរិយាបថ​ការងារ​នេះ​គឺ​ដោយសារ​ថ្នាក់​ដឹកនាំ​ស្ថាប័ន​នេះ​ទទួល​ស្គាល់​នូវ​កំហុស​ឆ្គង​របស់​មន្រ្តី​នគរបាល​មួយ​ចំនួន​កន្លង​មក​ដែល​បម្រើ​សេវា​សាធារណៈ​ជូន​ដល់​ប្រជាពលរដ្ឋ​មាន​ភាព​យឺតយ៉ាវ​មិន​បាន​បែងចែក​ការងារ​បម្រើ​រដ្ឋ និង​ការងារ​ផ្ទាល់​ខ្លួន។

លោក​ថា៖ «នៅ​ទីណា​ក៏​មាន​បញ្ហា​នេះ​ដែរ​ទើប​ឯកឧត្តមអគ្គ (នេត សាវឿន) ប្រកាស​ពង្រឹង​រឿង​នេះ។ មន្រ្តី​នគរបាល​ត្រូវ​ស្វាគមន៍​រីករាយ​រាក់ទាក់​នៅ​ពេល​ដែល​ពលរដ្ឋ​ស្នើ​សុំ​ឲ្យ​ជួយ​»។

តំណាង​បណ្តាញ​គណនេយ្យ​ភាព​សង្គម​អាស៊ី​បូព៌ា និង​អាស៊ី​ប៉ាស៊ីហ្វិក​ប្រចាំ​កម្ពុជា​លោក សន ជ័យ បាន​ហៅ​យន្តការ​នេះ​ជា​ផ្នែក​មួយ​នៃ​ការ​លើក​ទឹកចិត្ត​ដើម្បី​កែប្រែ​ឥរិយាបថ​មិន​សមរម្យ​របស់​នគរបាល។

លោក​​ថា៖ «តាម​បទពិសោធ​ការ​អនុវត្ត​ច្បាប់​របស់​មន្ត្រី​នគរបាល​ត្រូវ​បាន​ពលរដ្ឋ​រិះគន់​ច្រើន​ធ្វើការ​មិន​បាន​ល្អ​មិន​ស្តាប់​យោបល់​ពលរដ្ឋ​ប្រើ​អំណាច​ហួសហេតុ​ការ​ផ្តល់​សេវា​សាធារណៈ​ទារ​លុយ​ហើយ​ក្នុង​នោះ​មន្ត្រី​គ្នា​ឯង​ក៏​រិះគន់​គ្នា​ទៅវិញ​ទៅមក​ដែរ​»​។

លោក​ជ័យ​បាន​និយាយ​ថា​ការ​ដំឡើង​ឋានន្តរស័ក្តិ​ដល់​នគរបាល​គប្បី​ផ្អែក​លើ​សមត្ថភាព​បុគ្គល​ចំណេះដឹង សីលធម៌ វិជ្ជាជីវៈ ស្នាដៃ​ការងារ។ «ការ​ចូល​បម្រើ​ការងារ​របស់​មន្ត្រី​នគរបាល​តាម​ខ្សែ តាម​រយៈ​ការ​សូកប៉ាន់​គប្បី​ត្រូវ​បញ្ឈប់​ព្រោះ​បែប​នេះ​អ្នក​ទាំង​នោះ​គិត​តែ​ពី​ស្រង់​ដើម​ចំពោះ​ថ្លៃ​សូកប៉ាន់​មិន​គិត​បម្រើ​ប្រជាពលរដ្ឋ​ក្នុង​តួនាទី​របស់​ខ្លួន​នោះ​ទេ»៕

អត្ថបទគួរចាប់អារម្មណ៍