ភ្នំពេញៈ អគ្គិភ័យ ដែលបានឆាបឆេះផ្សារច្បារអំពៅ តាំងពីពាក់កណ្តាលអធ្រាត្រថ្ងៃទី ១៥ ឈានចូលថ្ងៃ ១៦ ខែមីនាមកនេះ បានបណ្តាលឲ្យតូបចំនួន ១៤៤៧ ខូចខាត ដែលអាជ្ញាធរឲ្យដឹងថា ករណីនេះបណ្តាលមកពី «ឆ្លងចរន្តអគ្គិសនី»។
យោងតាមរបាយការណ៍ពីនគរបាលប៉ុស្តិ៍ច្បារអំពៅ ២ ដែលមានលោក ទេព បូរ៉ា ជានាយប៉ុស្តិ៍ បានឲ្យដឹងថានៅយប់វេលាម៉ោង២៣និង៣០នាទីថ្ងៃព្រហស្បតិ៍ ទី ១៥ ខែមីនា ឆ្នាំ២០១៨ មានអគ្គីភ័យឆេះផ្សារច្បារអំពៅ ដែលឋិតនៅភូមិកណ្តាល សង្កាត់ច្បារអំពៅ ២ ខណ្ឌច្បារអំពៅ រាជធានីភ្នំពេញ ។
តាមរបាយការណ៍នេះ មូលហេតុឆេះ បណ្តាលមកឆ្លងចរន្តអគ្គីសនី ម្តុំតូបខាងកើតផ្សារ ។ តូបដែលឆេះ សរុបចំនួន ៥៨៨ តូប ក្នុងនោះឆេះតូបខាងក្នុងផ្សារចំនួន ៣៤០ តូប នឹងឆេះតូបក្រៅផ្សារចំនួន ២៤៨ តូប ដែលជាតូបសង់អំពីថ្មប្រក់ស័ង្កសីមានទំហំតូបនិមួយៗស្មើ ២ ម៉ែត្រ។
រថយន្តពន្លត់អគ្គិភ័យ រាប់សិបគ្រឿង ត្រូវបានយកមកប្រើប្រាស់ដើម្បីពន្លត់នេះផងដែរ។
លោក ទេព បូរ៉ា នាយនគរបាលប៉ុស្តិ៍ច្បារអំពៅ ២ ថ្លែងថា ៖ «ក្នុងប្រតិបត្តិការពន្លត់អគ្គិភ័យផ្សារច្បារអំពៅ ដែលសមត្ថកិច្ច បានគ្រប់គ្រងស្ថានការណ៍ទាំងស្រុងបាន នៅវេលាម៉ោងប្រមាណ ៣ និង ១០ នាទី រសៀលនេះ»៕