.jpg)
ក្ក្រុមការងារ EDC ចុះពិនិត្យ ខ្សែភ្លើងក្នុងតំបន់ក្រហម។ រូបភាព យូសុះ អាប់ឌុលរ៉ាស់ហ៊ីម
ភ្នំពេញៈ ចាប់ពីខែឧសភានេះទៅអគ្គិសនីកម្ពុជា បានប្រកាសនឹងចេញវិក្កយបត្រភ្លើងតែម្ដងក្នុងរយៈពេល ៣ ខែជាប់គ្នា សម្រាប់អតិថិជន ដែលកំពុងស្ថិតនៅក្នុងតំបន់ក្រហម ឬតំបន់បិទខ្ទប់ ដោយហេតុភ្នាក់ងារអគ្គិសនីកម្ពុជាពុំអាចចូលទៅបំពេញភារកិច្ចក្នុងតំបន់ទាំងនោះបាននៅក្នុងរាជធានីភ្នំពេញ និងក្រុងតាខ្មៅនៃខេត្តកណ្ដាល ដើម្បីផ្ដល់វិក្កយបត្រប្រចាំខែតាមធម្មតា។
លោក កែវ រតនៈ ប្រាប់ភ្នំពេញប៉ុស្តិ៍ថា អគ្គនាយកអគ្គិសនីកម្ពុជា បានដាក់ចេញនូវវិធានការបណ្តោះអាសន្ននេះនឹងត្រូវអនុវត្តចាប់ពីខែឧសភានេះទៅតាមតំបន់ជាក់ស្តែង រហូតដល់ពេលដែលរាជរដ្ឋាភិបាលប្រកាសការបញ្ចប់តំបន់បិទខ្ទប់។
លោក ថ្លែងថា៖ «យើងចូលអត់ចុះ តំបន់ក្រហមទាំងអស់មិនមែនថាភ្នាក់ងារអគ្គិសនីចូលមិនបានទាំងអស់ទេ ប៉ុន្តែកន្លែងខ្លះហានិភ័យខ្លាំងគឺចូលមិនបាន ហើយការធ្វើបែបនេះ ដើម្បីកុំបងប្អូនយើងបង់តម្លៃអគ្គិសនីថ្លៃ»។
លោកបានអះអាងថា តារាងនៃការប្រើប្រាស់អគ្គិសនីដែលបានកំណត់ហើយដូចជា បរិមាណនៃការប្រើប្រាស់ក្នុងមួយខែ ចាប់ ១០ គីឡូវ៉ាត់ចុះក្រោមតម្លៃ ៣៨០ រៀលក្នុងគីឡូវ៉ាត់ម៉ោង។ ពី ១១ គីឡូដល់ ៥០ គីឡូ តម្លៃ ៤៨០ រៀល។ ពី ៥១ គីឡូ ដល់ ២០០ គីឡូ តម្លៃ ៦១០ រៀល និងអ្នកប្រើប្រាស់ចាប់ពី ២០១ គីឡូឡើងទៅតម្លៃ ៧៣០ រៀល ដែលតារាងនេះគឺរដ្ឋមានកម្មវិធីផ្តល់អត្រាអនុគ្រោះក្រោមថ្លៃដើម មានន័យថារដ្ឋបំពេញខាតឱ្យអ្នកប្រើប្រាស់ថាមពលអគ្គិសនីរួចហើយ។
លោក កែវ រតនៈ ថ្លែងថា៖ «អគ្គិសនីកម្ពុជាពុំអាចបញ្ចុះតម្លៃភ្លើងបានទេ ទោះក្នុងអំឡុងពេលបិទខ្ទប់ក្តី ដោយសារតម្លៃដែលបានដាក់ចេញនោះ រដ្ឋបានបំពេញថ្លៃខាតរួចទៅហើយ»។
ទោះយ៉ាងណាក៏ដោយលោក រតនៈ អះអាងថា ការចេញវិក្កយបត្រភ្លើង ៣ ខែជាប់គ្នានេះ មិនមានន័យថា អគ្គិសនីកម្ពុជាកំណត់យកបរិមាណនៃការប្រើប្រាស់ភ្លើងសរុបមកគិតជាតម្លៃដែលបានកំណត់ក្នុងតារាងនោះទេ គឺចែកជាមធ្យមភាគ គិតតម្លៃប្រើប្រាស់ជាប្រក្រតីប្រចាំខែ។
លោកថ្លែងថា៖ «ដូច្នេះអគ្គិសនីកម្ពុជា អត់មានជម្រើសអីក្រៅពីចេញវិក្កយបត្របណ្តោះអាសន្ន ៣ ខែឱ្យទៅគាត់ អីចឹងបើគាត់មានលទ្ធភាពបង់តាមហ្នឹងស៊ីសងតាមការជាក់ស្តែង ប៉ុន្តែបើនៅខ្វះអាចបំពេញនៅតាមក្រោយ»។
លោកបានបញ្ជាក់ថា វិធានបណ្ដោះអាសន្នបែបនេះមិនមានន័យថាអ្នកប្រើប្រាស់អគ្គិសនីដែលមិនបង់តម្លៃនេះត្រូវផ្តាច់ភ្លើងដែរ។
លោក រតនៈ ថ្លែងថា៖ «យើងគ្មានគោលការណ៍ផ្តាច់ភ្លើងនៅតំបន់ក្រហម លឿងទុំ និងតំបន់លឿងឡើយ ជាពិសេសសម្រាប់បងប្អូនដែលជាអ្នកប្រកបរបរទទួលទានតូចតាច ជាកម្មករ-កម្មការិនី ពលករ សិស្ស-និស្សិត ដែលជួលបន្ទប់ទេ»។
អគ្គិសនីកម្ពុជាបានគូសបញ្ជាក់ថា ការយកមធ្យមភាគ ៣ ខែ ដើម្បីចេញវិក្កយបត្របណ្ដោះអាសន្ននេះ ពុំមែនជាការកេងចំណេញពីអតិថិជនណាម្នាក់ឡើយ តែជាការសម្រួលដល់ពលរដ្ឋដែលរស់នៅតំបន់បិទខ្ទប់កុំឱ្យបង់តម្លៃភ្លើងថ្លៃជាងមុន។
ទាក់ទងតំបន់ក្រហមនេះដែរ រដ្ឋាករទឹកស្វយ័តក្រុងភ្នំពេញកាលពីថ្ងៃទី ៨ ឧសភា បានសម្រេចមិនយកថ្លៃប្រើប្រាស់ទឹកស្អាតរយៈពេល ៣ ខែ សម្រាប់កម្មករ កម្មការិនី សិស្ស និស្សិត ដែលកំពុងស្នាក់នៅក្នុងតំបន់បិទខ្ទប់។ ការសម្រេចនេះតបតាមការអំពាវនាវរបស់លោកនាយករដ្ឋមន្ត្រី ហ៊ុន សែន ដែលស្នើឱ្យរដ្ឋាករទឹក ស្វយ័តក្រុងភ្នំពេញ ពិនិត្យលទ្ធភាពផ្តល់ការអនុគ្រោះនេះ។
បច្ចុប្បន្ននេះ រដ្ឋបាលរាជធានីភ្នំពេញបានកំណត់តំបន់ក្រហមនៅក្នុងទីតាំងភូមិសាស្ត្ររាជធានីភ្នំពេញដូចជា ខណ្ឌមានជ័យ មាន ៣ សង្កាត់ ខណ្ឌទួលគោក មាន ៣ សង្កាត់ ខណ្ឌពោធិ៍សែនជ័យ មាន ២ សង្កាត់ ខណ្ឌឫស្ស៊ីកែវ មាន ១ សង្កាត់ ខណ្ឌ ៧មករា មាន ១ សង្កាត់ និងខណ្ឌច្បារអំពៅ មាន ១ សង្កាត់។ ដោយឡែករដ្ឋបាលខេត្តកណ្តាលបានកំណត់តំបន់អគារវប្បធម៌ក្នុងភូមិសាស្ត្រភូមិតាខ្មៅ២ នៃសង្កាត់តាខ្មៅ ក្រុងតាខ្មៅជាតំបន់ក្រហម៕
វីដេអូ៖
