The Phnom Penh Post Search

Search form

Logo of Phnom Penh Post newspaper Phnom Penh Post - អគ្គិសនី​កម្ពុជា​អំពាវនាវ​ឲ្យ​ប្រើ​ម៉ាស៊ីន​ភ្លើង

អគ្គិសនី​កម្ពុជា​អំពាវនាវ​ឲ្យ​ប្រើ​ម៉ាស៊ីន​ភ្លើង

អគ្គិសនី​កម្ពុជា​អំពាវនាវ​ឲ្យ​ប្រើ​ម៉ាស៊ីន​ភ្លើង

130329_06
អ្នកជំនាញកំពុងតបណ្តាញភ្លើងនៅតាមផ្លូវជាតិលេខ ៦ អា ក្នុងស្រុកមុខកំពូល ហុង មិនា

ភ្នំពេញៈ ក្រោយពី​មាន​ការ​រអ៊ូ​រទាំ ពី​ប្រជា​ពលរដ្ឋ​ ជុំវិញ​ការ​ដាច់​ចន្តរ​អគ្គិសនី​ញឹកញាប់ ដែល​​បាន​បង្ក​ការ​លំបាក​ដល់​ការ​រស់​នៅ​ ​ខណៈ​ដែល​អា​កាស​ធាតុកំពុង​ក្តៅ​​ហួត​ហែង​យ៉ាង​ខ្លាំង​នោះ​ អគ្គិសនី​កម្ពុជា​​ បាន​អំពាវ​នាវ​ សុំ​ឲ្យ​​អ្នក​មាន​លទ្ធ​ភាព ប្រើ​ប្រាស់​ម៉ាស៊ីន​ភ្លើង​ផ្ទាល់​​ខ្លួន ​ជា​ជំនួយ​នៅ​ចន្លោះ​ពី​ម៉ោង​៨ព្រឹក​ដល់​ម៉ោង៩​យប់។

លោក កែវ រតនៈ ​អគ្គ​នាយក​អគ្គិសនី​កម្ពុជា បាន​គូស​បញ្ជាក់​នៅ​ក្នុង​សេច​ក្ដី​​ជូន​ដំណឹង​មួយ​ចុះ​ថ្ងៃ​ទី​ ២៦ ​ខែ​មីនា ឆ្នាំ​២០១៣​ ថា​ ស្រប​ពេល​សេដ្ឋកិច្ច​នៅ​កម្ពុជា ​មាន​ការ​កើន​ឡើង តម្រូវ​ការ​ប្រើ​ប្រាស់​ថាមពល​​អគ្គិសនី​ក៏​មាន​ការ​កើន​ឡើង​ ក្នុង​កម្រិត​មួយ​ខ្ពស់​ផង​ដែរ ​ដែល​ប្រការ​នេះ ​ធ្វើ​ឲ្យ​ការ​ផ្គត់​ផ្គង់​​ មាន​ការ​ខ្វះ​ខាត។

លោក​បាន​បញ្ជាក់​នៅ​ក្នុង​សេច​ក្ដី​ជូន​ដំណឹង​​ថា​៖«បញ្ហា​កង្វះ​ខាត​នេះ ​គឺ​បណ្ដាល​មក​ពី​ភាគី​ប្រទេស​វៀត​ណាម បាន​លក់​ថាមពល​មក​ឲ្យ​កម្ពុជា មិន​គ្រប់​តាម​កិច្ច​សន្យា​ចំនួន​ ២៥០ ​មេហ្គា​វ៉ាត់ គឺគេ​លក់​ឲ្យ​កម្ពុជា​​ត្រឹម​តែ ១៧០ មេហ្គា​វ៉ាត់ ​ប៉ុណ្ណោះ»។

ទន្ទឹម​នឹង​នេះ​ អគ្គិសនី​កម្ពុជា ​ក៏​បាន​អំពាវ​នាវ​ដល់​បណ្ដា​អតិថិជន​ទាំង​អស់ ឲ្យ​​ជួយ​សន្សំ​សំចៃ ដោយ​កាត់​បន្ថយ​ការ​ប្រើ​ប្រាស់​ថាមពល​អគ្គិសនី ​ដែល​មិន​ចាំ​បាច់ និង​សុំ​ឲ្យ​អតិថិជន​ធំៗជួយ​ប្រើ​ប្រាស់​ម៉ាស៊ីន​ភ្លើង​ផ្ទាល់​ខ្លួន ជំនួស​ឲ្យ​ការ​ប្រើ​ប្រាស់​ប្រភព​ពី​អគ្គិសនី​កម្ពុជា​ ក្នុង​អំឡុង​ពេល​តម្រូវ​ការ​ខ្ពស់​ ដែល​ចាប់​ផ្ដើម​ពី​ម៉ោង ៨ ព្រឹក ដល់​ម៉ោង ៩​យប់ ដើម្បី​បង្វែរ​ថាមពល​ដែល​បាន​សន្សំ​សំចៃ​នេះ យក​ទៅ​ផ្គត់​ផ្គង់​ជូន​បណ្ដា​អតិថិជន​តូចៗ ជា​ពិ​សេស​អតិថិ​ជន​លំ​នៅ​ឋាន​ដែល​ពុំ​មាន​ម៉ាស៊ីន​ភ្លើង​ផ្ទាល់​ខ្លួន​ ។ ប៉ុន្ដែ វិធាន​ការ​នេះ គឺ​អនុវត្ដ​ក្នុង​រយៈ​ពេល​ខ្លី ចាប់​ពី​ខែ​មេសា ដល់​ខែ​ឧសភា ឆ្នាំ ២០១៣។

សេចក្ដី​ជូន​ដំណឹង​បាន​ឲ្យ​ដឹង​ថា អគ្គិសនី​កម្ពុជា កំពុង​ចាត់​វិធាន​ការ​មួយ​ចំនួន​បន្ថែម ​ដើម្បី​បន្ថយ​នូវ​រយៈពេល​នៃ​ការ​កាត់​ចរន្ដ​តាម​បណ្ដា​លំនៅឋាន​របស់​ អតិថិជន ដែល​ក្នុង​នោះ​រួម​មាន ការ​បង្កើន​សមត្ថភាព​ផ្គត់​ផ្គង់ ដោយ​បន្ថែម​រយៈ​ពេល​ផលិត​ពី ៦ ម៉ោង ទៅ ១១​ម៉ោង​ចេញ​ពី​វារី​អគ្គិសនី​កំចាយ​និង​គិរីរម្យ​។ បន្ថែម​ប្រភព​ផ្គត់ផ្គង់​ថ្មី កម្លាំង​១៥​មេហ្គាវ៉ាត់ ពី​ប្រទេស​ថៃ មក​ផ្គត់ផ្គង់​នៅ​ភ្នំពេញ ផ្លូវ​ជាតិ​លេខ ៤ តំបន់​ថ្នល់​ទទឹង។

លោក រតនៈ បាន​បញ្ជាក់​ថា ចាប់​ពី​ខែ​មិថុនា ឆ្នាំ ​២០១៣ ខាង​មុខ​នេះ​ទៅ​អគ្គិសនី​កម្ពុជា​ នឹង​ដាក់​ឲ្យ​ដំណើរ​ការ​រោងចក្រ​ធ្យូង​ថ្ម​ទី១ នៅ​ក្រុង​ព្រះសីហនុ រួម​ជា​មួយ​វារី​អគ្គិសនី​ដែល​មាន​ស្រាប់ និង​វារី​អគ្គិសនី​ថ្មី​មួយ​ទៀត ដែល​នឹង​ធ្វើ​ឲ្យ​ស្ថានភាព​ផ្គត់ផ្គង់​នៅ​រាជធានី​ភ្នំ​ពេញ ក៏ដូច​ជា​ខេត្ដ​មួយ​ចំនួន មាន​សភាព​ល្អ​ប្រសើរ​ឡើង​វិញ​ជា​អតិប្បរមា៕

អត្ថបទគួរចាប់អារម្មណ៍