ភ្នំពេញៈ អគ្គស្នងការដ្ឋាននគរបាលជាតិនៃក្រសួងមហាផ្ទៃបានសម្រេចបង្កើតផ្នែកអន្តោប្រវេសន៍សរុបចំនួន ៨៩ ចំណុះឲ្យអធិការដ្ឋាននគរបាលក្រុង ស្រុក ខណ្ឌ ចំនួន ១៩៧ នៃស្នងការដ្ឋាននគរបាលរាជធានី និងខេត្តដើម្បីសម្រួលការងារ និងគ្រប់គ្រងអន្តោប្រវេសន៍តាមមូលដ្ឋានជាមួយនឹងការពង្រឹងច្បាប់ការពារជនបរទេសស្របច្បាប់ និងផ្តន្ទាទោសជនបរទេសមិនស្របច្បាប់។
យោងតាមសេចក្តីសម្រេចរបស់ លោក នេត សាវឿន អគ្គស្នងការនគរបាលជាតិចុះថ្ងៃទី ១៧ ខែកក្កដាឆ្នាំ ២០១៥ ដែលជាថ្ងៃចាប់ផ្តើមអនុវត្តសេចក្តីសម្រេចនេះផងដែរឲ្យដឹងថាភារកិច្ច និងរបៀបរបបធ្វើការងាររបស់ផ្នែកអន្តោប្រវេសន៍ប្រចាំអធិការដ្ឋានក្រុង ស្រុក ខណ្ឌនីមួយៗនឹងត្រូវកំណត់ដោយសេចក្តីសម្រេចរបស់ស្នងការដ្ឋាននគរបាលរាជធានីខេត្តដោយមានការពិគ្រោះយោបល់ឯកភាពពីប្រធាននាយកដ្ឋានបុគ្គលិកហើយផ្នែកអន្តោប្រវេសន៍នីមួយៗនឹងត្រូវដឹកនាំដោយនាយផ្នែក ១ រូប និងនាយផ្នែករង ១ រូបជាជំនួយការ។ បើតាមសេចក្តីសម្រេចនេះផ្នែកអន្តោប្រវេសន៍ដែលត្រូវបង្កើតឡើងចំនួន ៨៩ នេះខ្លះត្រូវបានតម្រូវឲ្យអនុវត្តការងារក្នុងអធិការដ្ឋានក្រុង ស្រុក ខណ្ឌ លើសពីមួយក្នុងចំណោមអធិការដ្ឋានទាំង ១៩៨។
លោក សុខ ផល អគ្គស្នងការរងនគរបាលជាតិ និងជាអគ្គនាយកនៃអគ្គនាយកដ្ឋានអន្តោប្រវេសន៍បានឲ្យដឹងថាការបង្កើតផ្នែកអន្តោប្រវេសន៍នេះគឺជារចនាសម្ព័ន្ធថ្មីរបស់អគ្គនាយកដ្ឋានអន្តោប្រវេសន៍គិតចាប់ពីថ្នាក់កណ្តាលដល់ថ្នាក់មូលដ្ឋាន ខេត្ត និងក្រុង ស្រុក ខណ្ឌ ដែលមិនធ្លាប់មានពីមុនមក។
លោកថា៖ «ពីមុននៅតែខេត្តខ្សែរយៈមិនគ្រប់មិនមានតាមបណ្តាស្រុកនានាបើយើងបង្កើតបែបនេះទៅងាយស្រួលចំពោះបញ្ហាខ្លះកើតក្នុងស្រុកនានាមន្ត្រីទទួលបន្ទុកនៅទីនោះអាចធ្វើការងារភ្លាមៗមិនចាំបាច់រង់ចាំមន្ត្រីពីខេត្តចុះទៅមូលដ្ឋាន។ តួនាទីចម្បងរបស់ផ្នែកទាំងនេះគឺការធ្វើជំរឿនជនបរទេសបែងចែកជនបរទេសខុសច្បាប់ និងស្របច្បាប់ពលករបរទេស និងរួមចំណែកការពារសុវត្ថិភាពដល់ជនបរទេស»។
ប្រធានផ្នែកស៊ើបអង្កេត និងអនុវត្តនីតិវិធីនៃនាយកដ្ឋានអន្តោប្រវេសន៍ លោក អ៊ុក ហៃសីឡា បានឲ្យដឹងថាផ្នែកអន្តោប្រវេសន៍នឹងអាចជួយឲ្យការប្រមូលនូវព័ត៌មានពាក់ព័ន្ធនឹងការរស់នៅរបស់ជនបរទេសតាមមូលដ្ឋានកាន់តែច្បាស់លាស់ និងជាក់លាក់។
លោកថា៖ «កន្លងមកនៅខេត្តនីមួយៗយើងមានតែការិយាល័យអន្តោប្រវេសន៍មួយប៉ុណ្ណោះអ៊ីចឹងហើយមានការលំបាកពេលចង់បានទិន្នន័យច្បាស់លាស់ព្រោះយើងចង់ក្តាប់ឲ្យបានគ្រប់ជ្រុងជ្រោយពាក់ព័ន្ធនឹងជនបរទេសទាំងអស់កុំឲ្យមានការលំបាកពេលមានស្ថានទូតគេសួរនាំពីជនជាតិរបស់គេយើងអត់ដឹងខ្វះនូវព័ត៌មានមានភាពចន្លោះប្រហោងការងារ»។
លោក អ៊ុក ហៃសីឡា កាលពីម្សិលមិញអគ្គនាយកដ្ឋានអន្តោប្រវេសន៍ក្រសួងមហាផ្ទៃក៏បានបញ្ចូនចេញនូវជនជាតិវៀតណាមចំនួន ៣៣ នាក់ដែលមិនមានលិខិតស្នាក់នៅត្រឹមត្រូវត្រលប់ទៅប្រទេសវៀតណាមវិញតាមច្រកទ្វារអន្តរជាតិក្អមសំណេរ។
លោកថា អ្នកទាំង ៣៣ នាក់នេះត្រូវបានឃាត់ខ្លួនក្នុងតំបន់មួយចំនួនក្នុងរាជធានីភ្នំពេញ ខេត្តរតនគិរី និងខេត្តព្រះសីហនុ។
លោក ហៃសីឡា បានបញ្ជាក់ថា៖ «បើគិតចាប់ពីដើមខែកក្កដារហូតមកទល់ថ្ងៃអង្គារគឺជនជាតិវៀតណាមជាង ១០០ នាក់ ត្រូវបានឃាត់ខ្លួន និងបណ្តេញចេញទៅវិញពួកគេភាគច្រើនមកកម្ពុជារស់នៅ និងប្រកបរបរលក់កាហ្វេធ្វើសំណង់និងជាងឈើជាដើម»។
ប្រធានផ្នែកបច្ចេកទេសស៊ើបអង្កេតរបស់អង្គការលីកាដូលោក អំ សំអាត បង្ហាញសុទិដ្ឋិនិយមចំពោះយន្តការថ្មីតែដើម្បីឲ្យការគ្រប់គ្រងជនអន្តោប្រវេសន៍តាមមូលដ្ឋានកាន់តែមានប្រសិទ្ធភាពនោះលោកជំរុញឲ្យមន្ត្រីជំនាញបង្ហាញឆន្ទៈពង្រឹងការអនុវត្តច្បាប់ និងលុបបំបាត់អំពើពុករលួយ។
លោកថា៖ «ការអនុវត្តច្បាប់មិនមែនចេះតែរកឃើញបញ្ជូនចេញទេពួកគាត់ត្រូវមានឆន្ទៈទប់ស្កាត់ការហូរចូលដោយអនាធិបតេយ្យដែលជាដើមហេតុ និងត្រូវមានអព្យាក្រឹតភាពមិនត្រូវលាក់បាំង ឬឃុបឃិតគ្នាឲ្យជនបរទេសចូលតាមអំពើចិត្តនោះទេ»។
ក្នុងកិច្ចប្រជុំផ្សព្វផ្សាយផែនការអនុវត្តការគ្រប់គ្រងទៅលើជនអន្តោប្រវេសន៍ដែលធ្វើឡើងនៅទីស្តីការក្រសួងមហាផ្ទៃកាលពីដើមខែនេះអគ្គនាយកដ្ឋានជនអន្តោប្រវេសន៍ក្រសួងមហាផ្ទៃបានឲ្យដឹងថាក្នុងរយៈពេល ៦ ខែ ដើមឆ្នាំ ២០១៥ នេះជនអន្តោប្រវេសន៍ខុសច្បាប់ ១២០០ នាក់ត្រូវបានបណ្តេញចេញពីកម្ពុជាក្នុងនោះ ៩៨ ភាគរយជាជនជាតិវៀតណាម៕
