ភ្នំពេញៈ ចក្រភពអង់គ្លេសបានបន្តផ្តល់ថវិកា ៤,៣ លានដុល្លារអាមេរិក ដើម្បីបញ្ចប់កម្មវិធីសកម្មភាពមីនសកលនៅកម្ពុជា (GMAP2) ដែលនឹងចាប់ផ្តើមពីខែមេសាឆ្នាំនេះ រហូតដល់ខែមីនាឆ្នាំ ក្រោយមុនពេលការចាប់ផ្តើមកម្មវិធី GMAP ជាលើកទី ៣ ដែលនឹងប្រព្រឹត្តទៅនៅឆ្នាំ ២០២១ ដដែល។
ក្នុងកម្មវិធីសកម្មភាពមីនមនុស្សធម៌នៅកម្ពុជា នៅឯនិវេសនដ្ឋានឯកអគ្គរាជទូតចក្រភពអង់គ្លេសប្រចាំកម្ពុជាលោកស្រី Tina Redshaw ឯកអគ្គរាជទូតអង់គ្លេសប្រចាំកម្ពុជាត្រូវបានដកស្រង់សម្ដីដោយអាជ្ញាធរមីនកម្ពុជាថា ចក្រភពអង់គ្លេសនឹងផ្តល់ថវិកាចំនួន ៤,៣ លានដុល្លារអាមេរិកបន្ថែមជួយដល់កម្មវិធីសកម្មភាពមីនសកលទី ២ (GMAP2) ក្នុងរយៈពេល ១ ឆ្នាំដែលបញ្ចប់នៅខែមីនា ឆ្នាំ ២០២១ មុននឹងចាប់ផ្តើមបន្តកម្មវិធីសកម្មភាពមីនសកលទី ៣ នៅក្នុងឆ្នាំ ២០២១ នោះ។
លោកស្រី ឯកអគ្គរាជទូតបានបន្ថែមថា៖ “កម្ពុជា និងចក្រភពអង់គ្លេសមានបេសកកម្មរួមគ្នាក្នុងការចូលរួមសង្គ្រោះជីវិត មនុស្សឲ្យរួចផុតពីគ្រោះថ្នាក់ដោយសារមីននៅកម្ពុជា។
ដោយឡែកលោកទេសរដ្ឋមន្ត្រី លី ធុជ អនុប្រធានទី ១ នៃអាជ្ញាធរមីនក៏ត្រូវបានអាជ្ញាធរមីនបានដកសម្តីក្នុងព្រឹត្តិការណ៍នោះដែរ ដោយលោកបានថ្លែងថា ចក្រភពអង់គ្លេសបានចូលរួមសកម្មភាពសម្អាតមីនចាប់តាំងពី ១៩៩២ នៅលើផ្ទៃដីជាង ១២២ គីឡូម៉ែតក្រឡាដោយបានរកឃើញគ្រាប់មីន និងយុទ្ធភណ្ឌមិនទាន់ផ្ទុះជិត ៧ ម៉ឺនគ្រាប់។
បើតាមអាជ្ញាធរមីនក្នុងឱកាសនោះលោក លី ធុជ ក៏បានស្នើសុំឲ្យចក្រភពអង់គ្លេសបន្តជួយរាជរដ្ឋាភិបាលកម្ពុជាក្នុងការអនុវត្តនូវផែនការយុទ្ធសាស្ត្រជាតិសកម្មភាពមីន (២០១៨-២០២៥) ដើម្បីឈានឆ្ពោះទៅរកកម្ពុជាគ្មានគ្រាប់មីន (មីនប្រឆាំងមនុស្ស និងមីនប្រឆាំងរថក្រោះ) ត្រឹមឆ្នាំ ២០២៥ ផងដែរ។
លោកបានថ្លែងថា៖ «ការងារបោសសម្អាតមីនមនុស្សធម៌គឺជាបេសកកម្មដ៏មោះមុតរបស់យើងទាំងអស់គ្នា។ ខ្ញុំសូមស្នើសុំឲ្យដៃគូអភិវឌ្ឍន៍ទាំងអស់ និងភាគីពាក់ព័ន្ធបន្តចូលរួមជាមួយរាជរដ្ឋាភិបាលកម្ពុជាក្រោមការដឹកនាំដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រីប្រធានអាជ្ញាធរមីន និងប្រជាជនកម្ពុជា ដើម្បីខិតខំធ្វើការឆ្ពោះទៅកម្ពុជាគ្មានមីននៅឆ្នាំ ២០២៥»។
លោកបានបន្តថា៖ «យើងអាចប្រារព្ធ [ព្រឹត្តិការណ៍នេះ] ទាំងអស់គ្នា ពីព្រោះយើងបានបោសសម្អាតមីនទាំងអស់គ្នាដើម្បីធ្វើឲ្យកម្ពុជាគ្មានមីន។ នៅពេលយើងធ្វើការទាំងអស់គ្នាថ្ងៃថ្មីនឹងមកដល់»។
នៅក្នុងសុន្ទរកថារបស់លោកដែលភ្នំពេញប៉ុស្តិ៍ទទួលបានកាលពីថ្ងៃអាទិត្យលោក លី ធុជ បានថ្លែងថា ការបន្តផ្តល់ថវិការយៈពេល ១ ឆ្នាំបន្ថែមនេះនឹងធានាថា ការគាំទ្ររបស់ប្រទេសអង់គ្លេសនៅតែធ្វើឱ្យជីវិតជនរងគ្រោះដោយសារមីនកាន់តែប្រសើរឡើង។
លោកបានបញ្ជាក់ថា៖ «វាមានសារៈសំខាន់ណាស់ដែលប្រទេសកម្ពុជាគឺជាផ្នែកមួយនៃកម្មវិធីសកលដ៏គួរឱ្យកត់សម្គាល់នេះ។ វាផ្តល់ឱ្យបុរស និងស្ត្រីកម្ពុជារាប់រយនាក់អាចធ្វើការងារដែលពួកគេចង់ដោយមោទនភាព ហើយវាកំពុងនាំយើងខិតទៅជិតប្រទេសដែលគ្មានគ្រាប់មីន»។
លោកបានបន្ថែមទៀតថាតាំងពីការចាប់ផ្តើមកម្មវិធី GMAP2 នៅក្នុងខែកក្កដា ឆ្នាំ ២០១៨ មកគ្រាប់មីនរាប់ពាន់គ្រាប់ត្រូវបានរកឃើញហើយផ្ទៃដីជិត ២០ គីឡូម៉ែត្រក្រឡាត្រូវបានបោសសម្អាត។
លោកថ្លែងថា៖ «គម្រោងនេះក៏បានពង្រឹងសមត្ថភាពអាជ្ញាធរមីន ដើម្បីសម្របសម្រួល និងគ្រប់គ្រងវិស័យសកម្មភាពកម្ចាត់មីននៅកម្ពុជាឱ្យកាន់តែមានប្រសិទ្ធភាព និងប្រសិទ្ធផល GMAP2 អាចធ្វើឱ្យមានការបង្កើតគំនិតច្នៃប្រឌិតក្នុងការវិភាគអំពីការអប់រំហានិភ័យ និងការដាក់បញ្ចូលជនពិការបានច្រើន»៕