.jpg)
បុរសនៅទីក្រុងភ្នំពេញម្នាក់ក្នុងពេលកំពុងជក់បារី នាពេលកន្លងមក។ ហុង មិនា
ភ្នំពេញៈ អង្គការចលនាដើម្បីសុខភាពកម្ពុជាបានស្នើឱ្យដំឡើងពន្ធថ្នាំជក់ដែលកំពុងចរាចរនៅទូទាំងប្រទេស ដើម្បីជួយគាំទ្រឱ្យពលរដ្ឋផ្ដាច់បារីបានជោគជ័យ ដែលនាំដល់ការកាត់បន្ថយចំនួនអ្នកស្លាប់ ពិការ និងឈឺក្នុងអំឡុងមានវិបត្តិកូវីដ ១៩។
ការស្នើនេះបានធ្វើឡើងនៅក្នុងសេចក្ដីប្រកាសព័ត៌មានរបស់អង្គការនេះកាលពីម្សិលមិញ ដើម្បីឆ្លើយតបនឹងការយាយីជាសកលនៃការផ្ទុះឡើងជំងឺកូវីដ ១៩ និងក្រោមហេតុផលថា អ្នកជក់បារីរងផលប៉ះពាល់ធ្ងន់ធ្ងរជាងអ្នកមិនជក់ ប្រសិនបើឆ្លងជំងឺកូវីដ ១៩ ដែលអង្គការសុខភាពពិភពលោកបានកំណត់យក “ការផ្ដាច់បារី” ជាប្រធានបទសម្រាប់ទិវាពិភពលោកគ្មានថ្នាំជក់នៅឆ្នាំនេះ។
អង្គការចលនាដើម្បីសុខភាពកម្ពុជាបានឲ្យដឹងថា វិធានការដែលមានប្រសិទ្ធភាពខ្ពស់ក្នុងការជួយគាំទ្រឱ្យពលរដ្ឋអាចផ្ដាច់បារីបានជោគជ័យគឺការដំឡើងពន្ធថ្នាំជក់ ព្រោះនៅពេលពន្ធថ្នាំជក់កើនឡើង គឺអ្នកជក់បារីនឹងជក់តិចជាងមុន ឬផ្ដាច់បារីទាំងស្រុង។
អង្គការនេះបានបញ្ជាក់ដែរថា «អ្នកជក់បារី ជក់តិចជាងមុន ឬផ្ដាច់បារីទាំងស្រុងដែលនាំទៅរកការថយចុះចំនួនអ្នកស្លាប់ អ្នកពិការ និងអ្នកឈឺដោយការប្រើប្រាស់ថ្នាំជក់។ លើសពីនេះទៀត ការដំឡើងពន្ធថ្នាំជក់ធ្វើឲ្យរាជរដ្ឋាភិបាលទទួលបានចំណូលពន្ធបន្ថែមសម្រាប់ប្រើប្រាស់លើការទប់ស្កាត់ជំងឺ ជាពិសេស ការទប់ស្កាត់ និងការព្យាបាលជំងឺកូវីដ ១៩»។
លោក មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជាបានថ្លែងថា មានមតិបំភាន់មួយចំនួនបានលើកឡើងថា ការដំឡើងពន្ធថ្នាំជក់នឹងធ្វើឱ្យបាត់បង់ចំណូលពន្ធរដ្ឋ ប៉ះពាល់ដល់ឱកាសការងារ ឬប៉ះពាល់ដល់ពលរដ្ឋក្រីក្រ និងធ្វើឱ្យមានការគេចមិនបង់ពន្ធ។
ប៉ុន្តែលោកលើកសំអាងថា មានប្រទេសជាច្រើនដែលបានដំឡើងពន្ធថ្នាំជក់រួចហើយ ក្នុងនោះនៅអាស៊ាន មាន ហ្វីលីពីន និងថៃ បានបង្ហាញថា បន្ទាប់ពីដំឡើងពន្ធ គឺមានពលរដ្ឋជាច្រើនបានផ្ដាច់បារី ហើយរដ្ឋាភិបាលក៏ទទួលបានពន្ធបន្ថែមពីថ្នាំជក់ដែលនាំឱ្យរដ្ឋាភិបាលអាចប្រើប្រាស់ថវិកានោះ ដើម្បីលើកកម្ពស់សុខភាពសាធារណៈបានយ៉ាងច្រើន។
លោកបញ្ជាក់ថា៖ «នៅកម្ពុជាករណីសិក្សាមួយរបស់អង្គការសហប្រជាជាតិ ស្ដីពីការវិនិយោគលើការត្រួតពិនិត្យផលិតផលថ្នាំជក់ឆ្នាំ ២០១៩ បង្ហាញថា កម្ពុជានឹងទទួលចំណូលពន្ធបន្ថែម ២៣៥ លានដុល្លារអាមេរិកក្នុងរយៈពេល ៥ ឆ្នាំខាងមុខ និង ៩៣៣ លានដុល្លារអាមេរិកក្នុងរយៈពេល ១៥ ឆ្នាំខាងមុខ បើកម្ពុជាដំឡើងពន្ធលើផលិតផលថ្នាំជក់រហូតដល់ ៧៥ ភាគរយនៃតម្លៃបារីលក់រាយ»។
នៅទូទាំងពិភពលោក ថ្នាំជក់ធ្វើឱ្យមនុស្សស្លាប់ប្រមាណ ៨ លាននាក់រៀងរាល់ឆ្នាំ ដោយសារជំងឺសរសៃឈាមបេះដូង សួត មហារីក ទឹកនោមផ្អែម លើសសម្ពាធឈាម និងជំងឺជាច្រើនមុខទៀត ដែលក្នុងនោះពលរដ្ឋកម្ពុជាមានប្រមាណ ១៥ ០០០ នាក់។ រីឯថវិកាប្រមាណ ១,៤ ទ្រីលានដុល្លារអាមេរិកត្រូវបានខាតបង់។ នេះបើតាមសេចក្តីប្រកាសរបស់អង្គការនេះ។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានប្រាប់ ភ្នំពេញ ប៉ុស្តិ៍ ពីម្សិលមិញថា ក្រសួងសេដ្ឋកិច្ចធ្លាប់បានពិភាក្សាជុំវិញបញ្ហានេះជាច្រើនដងរួចមកហើយ ជាមួយនឹងស្ថាប័នពាក់ព័ន្ធនានា។ ប៉ុន្តែលោកថា ការសម្រេចដំឡើងពន្ធនេះ គឺអាស្រ័យលើការសិក្សាលម្អិតបន្ថែមទៀត ខណៈការយកពន្ធលើផលិតផលថ្នាំជក់ទាំងនេះគឺរដ្ឋាភិបាល បានសិក្សាហ្មត់ចត់រួចមកហើយ។
លោកថា៖ «កិច្ចការនេះយើងបានប្រជុំច្រើនដងហើយដើម្បីធ្វើការវាយតម្លៃឱ្យបានគ្រប់ជ្រុងជ្រោយ ព្រោះគោលនយោបាយពន្ធមួយៗ គឺមិនស្រួលនោះទេ គឺវាមានចំណុចល្អ និងចំណុចអាក្រក់។ គ្រាន់តែបញ្ហានេះ រដ្ឋាភិបាលគាត់ត្រូវថ្លឹងថ្លែងហើយក្នុងកិច្ចការឱ្យឡើងពន្ធនេះ»៕
វីដេអូ៖
