.jpg)
តំណាងអង្គការដែលបានទទួលវិញ្ញាបនបត្រថែទាំកុមារពីក្រសួងសង្គមកិច្ច។ រូបថត ក្រសួងសង្គមកិច្ច
ភ្នំពេញៈ អង្គការចំនួន ៩ បានទទួលវិញ្ញាបនបត្រទទួលស្គាល់មណ្ឌលថែទាំកុមារពីក្រសួងសង្គមកិច្ច អតីតយុទ្ធជន និងយុវនីតិសម្បទាកាលពីថ្ងៃទី ១៣ ខែតុលា បន្ទាប់ពីក្រុមការងារបានចុះធ្វើការវាយតម្លៃទៅលើមណ្ឌលទាំងនោះថា ពិតជាមណ្ឌលល្អត្រឹមត្រូវ គោរពតាមបទដ្ឋាន និងគោលការណ៍ណែនាំរបស់ក្រសួង។
លោក តូច ចាន់នី អគ្គនាយកនៃអគ្គនាយកដ្ឋានបច្ចេកទេស ក្រសួងសង្គមកិច្ច អតីតយុទ្ធជន និងយុវនីតិសម្បទាបានប្រាប់កាសែតភ្នំពេញប៉ុស្តិ៍ពីម្សិលមិញថា ក្រសួងបានប្រគល់វិញ្ញាបនបត្រទទួលស្គាល់មណ្ឌលថែទាំកុមារចំនួន ១២ មណ្ឌលរបស់អង្គការដៃគូចំនួន ៩ ក្នុងវិស័យសង្គមកិច្ច អតីតយុទ្ធជន និងយុវនីតិសម្បទា។
លោកបន្តថា អង្គការដែលមានមណ្ឌលថែទាំ គឺត្រូវតែដាក់ពាក្យសុំមកក្រសួងសង្គមកិច្ច ដើម្បីចុះធ្វើការវាយតម្លៃថាតើមណ្ឌលទាំងនោះបានអនុវត្តតាមគោលនយោបាយតាមស្តង់ដាដែលក្រសួងបានដាក់ចេញនោះត្រឹមត្រូវល្អតាមអ្វីដែលក្រសួងដាក់ឱ្យអនុវត្តដែរឬអត់។
លោក ចាន់នី មានប្រសាសន៍ថា៖ «នៅពេលដែលមន្ត្រីយើងចុះទៅធ្វើការវាយតម្លៃ ឃើញថា ពួកគាត់គោរពតាមស្តង់ដាត្រឹមត្រូវ យើងនឹងចេញនូវវិញ្ញាបនបត្រទទួលស្គាល់មណ្ឌលថែទាំនោះ។ ការចុះវាយតម្លៃគឺមើលទៅតាមស្ថានភាពជាក់ស្តែងដូចជាមានទីតាំងច្បាស់លាស់មានកន្លែងស្នាក់នៅរបស់ក្មេង ទីធ្លាស្អាត អនាម័យ មានរបបអាហារត្រឹមត្រូវ និងការស្លៀកពាក់ជាដើម»។
ប៉ុន្តែបើមណ្ឌលណាដែលអនុវត្តមិនត្រឹមត្រូវតាមស្តង់ដា ក្រសួងនឹងទុកពេលពី ២ ទៅ ៣ ខែឱ្យពួកគាត់ធ្វើការកែតម្រូវបន្តទៀត។
លោកបញ្ជាក់ទៀតថា វិញ្ញាបនបត្រនេះមានតម្លៃណាស់ ដោយសារអង្គការទាំងនេះអាចយកវិញ្ញាបនបត្រនេះស្នើសុំជំនួយពីបណ្តាសប្បុរសជននានាទាំងក្នុង និងក្រៅប្រទេសសម្រាប់ជួយដល់មណ្ឌលរបស់ពួកគាត់បានដោយខាងម្ចាស់ជំនួយនឹងពិនិត្យមើលថា មណ្ឌលទាំងនេះបានទទួលស្គាល់ពីរាជរដ្ឋាភិបាលពីការអនុវត្តបានល្អរបស់មណ្ឌលទាំងនេះ។
បើតាមលោក តូច ចាន់នី ការចូលរួមសហការរបស់អង្គការដៃគូក្រៅរដ្ឋាភិបាលពិតជាមានសារៈសំខាន់ណាស់ក្នុងការលើកកម្ពស់វិស័យសង្គមកិច្ចនៅកម្ពុជា។
លោក ចាន់នី ក៏បានស្នើឱ្យក្រុមការងារក្រសួង និងអង្គការដែលសហការ នាពេលនេះរួមគ្នាដើម្បីធ្វើការងារ ដោយយកចិត្តទុកដាក់ឱ្យខ្លាំងបំផុតតាមដែលអាចធ្វើបាន។ ក្រសួងនៅតែស្វាគមន៍ជានិច្ចជាមួយដៃគូពាក់ព័ន្ធ និងអង្គការនានា ដើម្បីជួយដល់កុមាររងគ្រោះនៅកម្ពុជាឱ្យមានជីវភាព និងជីវិតរស់នៅល្អប្រសើរថែមមួយកម្រិតទៀត។
ក្រសួងសង្គមកិច្ចបានផ្តល់វិញ្ញាបនបត្រដល់មណ្ឌលថែទាំកុមារជាច្រើនរួចមកហើយ ប៉ុន្តែលោក តូច ចាន់នី មិនមានទិន្នន័យច្បាស់លាស់នៅក្នុងដៃទេ។ លោកថា សព្វថ្ងៃមានមណ្ឌលថែទាំកុមារទូទាំងប្រទេសចំនួន ២៣២ មណ្ឌល ប៉ុន្តែមិនមែនអង្គការទាំងអស់ទទួលបានវិញ្ញាបនបត្រទាំងអស់ទេ ហើយអង្គការដែលបានចុះអនុស្សរណៈនៃការយោគយល់គ្នា (MoU) មានចំនួន ១៤៧ អង្គការ។
លោក តូច ចាន់នី ក៏បានធ្វើការណែនាំទៅដល់អង្គការទាំងនោះដែរថា ត្រូវយកវិញ្ញាបនបត្រនេះទៅប្រើប្រាស់ឱ្យបានត្រឹមត្រូវដោយមិនត្រូវយកវិញ្ញាបនបត្រនេះទៅដើរសុំជំនួយពីគេខុសពីគោលការណ៍របស់ក្រសួងឡើយ។ ក្នុងស្ថានភាពនេះដែរលោកសុំឱ្យមណ្ឌលទាំងនោះធ្វើការថែទាំកុមារឱ្យបានល្អតាមការណែនាំរបស់ក្រសួង ពិសេសក្នុងអំឡុងពេលនៃការរីករាលដាលនៃជំងឺកូវីដ ១៩ ត្រូវថែរក្សាសុខភាពកុមារឱ្យបានខ្ពស់ ហើយ ១ វិញទៀតក៏ត្រូវប្រយ័ត្នចំពោះទឹកជំនន់ផងដែរ។ លោកបញ្ជាក់ថា បើមណ្ឌលរបស់ពួកគាត់ជួបនឹងបញ្ហាទឹកលិចត្រូវមានវិធានការជម្លៀសកុមារចេញឱ្យបានទាន់ពេលវេលា៕
