.jpg)
ពលរដ្ឋស្តារត្រពាំងក្នុងដែនជម្រកសត្វព្រៃសៀមប៉ាង។ រូប BirdLife International Cambodia
ស្ទឹងត្រែងៈ អង្គការជីវិតសត្វស្លាបអន្តរជាតិ កម្មវិធីប្រចាំកម្ពុជាបានបញ្ចប់ការជីកស្តារត្រពាំងទឹកចំនួន ២០ បន្ថែមទៀតនៅក្នុងដែនជម្រកសត្វព្រៃសៀមប៉ាងនៅក្នុងខេត្តស្ទឹងត្រែង ក្នុងគោលបំណងធ្វើឱ្យប្រសើរឡើងនូវប្រភពទឹក និងទីជម្រកសម្រាប់សត្វព្រៃ និងសត្វចិញ្ចឹមក្នុងស្រុក និងក៏ដើម្បីបង្កើនជាប្រភពចំណីអាហារសម្រាប់សត្វ និងមនុស្សផងដែរ។
លោក ម៉ាក សុភាព ប្រធានគ្រប់គ្រងគម្រោងនៃអង្គការជីវិតសត្វស្លាបអន្តរជាតិកម្មវិធីប្រចាំកម្ពុជា ប្រាប់ ភ្នំពេញ ប៉ុស្តិ៍ នៅថ្ងៃទី ២៥ ខែឧសភាថា គម្រោងជីកស្តារត្រពាំងទឹកទាំង ២០ នេះត្រូវបានចាប់ផ្តើមពីខែមករា និងខែ កុម្ភៈ ឆ្នាំ ២០២១ ក្នុងនោះមានត្រពាំងចំនួន ៥ ត្រូវបានជីកស្តារដោយគ្រឿងចក្រ និង ១៥ ទៀតត្រូវបានជីកស្តារដោយប្រជាពលរដ្ឋចំនួន ២៧៨ នាក់ មកពី ៦ ភូមិ ដែលនៅជុំវិញដែនជម្រកសត្វព្រៃ។
លោកបន្តថា មូលហេតុដែលជ្រើសរើសយកការជីកស្តារនៅក្នុងរយៈពេល ២ ឬ ៣ ខែនេះ ដោយសារអំឡុងពេលនេះ ត្រពាំងមួយៗមានការរីងស្ងួត និងដីក៏មិនទាន់រឹងខ្លាំង។ ប្រសិនបើពន្យារពេលរហូតដល់ខែមេសា ដីនឹងមានសភាពរឹងដែលធ្វើឱ្យមានការលំបាកក្នុងការជីកស្តារ។
លោក ម៉ាក សុភាព ថ្លែងថា៖ «នៅក្នុងដែនជម្រកសត្វព្រៃសៀមប៉ាងនេះគឺជាតំបន់ខ្ពង់រាបហើយមិនមានទន្លេហូរកាត់ខ្វាត់ខ្វែងទេ និងមានទន្លេតែ ១ គឺទន្លេសេកុង ហើយខែប្រាំង ទឹកហូរចាក់ចូលទន្លេអស់ហើយ ស្ងួតព្រៃ ហើយទឹកនៅតាមត្រពាំង ដែលមិនអាចផ្តល់ឱ្យសត្វព្រៃធ្វើជាទីជម្រក និងផឹកទឹកនេះបាន ប៉ុន្តែត្រពាំងទឹកខ្លះ ក៏រាក់ និងមិនមានទឹកដក់ យើងក៏ជីកស្តារឱ្យមានផ្ទៃធំជាងមុន»។
បើតាមលោក សុភាព ការជីកស្តារត្រពាំងនេះ គឺជាការជីកដោយដៃ ទៅតាមប្រភេទនៃត្រពាំង ធម្មជាតិទាំងនោះ និងជម្រៅរបស់វា ក៏មិនជ្រៅដែរ ពោលគឺធ្វើទៅតាមទំហំ និងបច្ចេកទេសដែលគិតជាមធ្យមមានជម្រៅមាត់ត្រពាំង ៣ តឹក និងបាតត្រពាំង ៧ តឹក ប៉ុន្តែចំពោះការជីកស្តារដោយប្រើគ្រឿងចក្រអេស្កាវ៉ាទ័រវិញ គឺមានទំហំធំ និងជ្រៅជាងនេះ ដើម្បីរក្សាទឹកឱ្យបានយូរ និងឆ្លងផុតខែវស្សា។
យោងតាមរបាយការណ៍របស់អង្គការជីវិតសត្វស្លាបអន្តរជាតិ កម្មវិធីប្រចាំកម្ពុជា គម្រោងនេះបានទទួលជំនួយឧត្តម្ភពី Critical Ecosystem Partnership Fund (CEPF) និង Mohamed Bin Zayed Species Conservation Fund (MBZ) ដែលមានទឹកប្រាក់សរុបប្រមាណ ៥ ម៉ឺនដុល្លារ។ ចាប់តាំងពីឆ្នាំ ២០១៦ មកដល់បច្ចុប្បន្ន អង្គការបានជីកស្តារត្រពាំងសរុបបានចំនួន ៤៦ ត្រពាំង។
បើតាមលោក សុភាព អង្គការជីវិតសត្វស្លាបអន្តរជាតិកម្មវិធីប្រចាំកម្ពុជា គ្រោងនឹងស្វែងរកជំនួយបន្ថែមទៀត ដើម្បីជីកស្តារត្រពាំងបន្ថែមទៀត ខណៈនៅក្នុងដែនជម្រកសត្វព្រៃសៀមប៉ាងនេះមានត្រពាំងជាង ២០០ ដោយត្រពាំងដែលមានទឹកក្នុងរដូវប្រាំងមានចំនួន ៧ ភាគរយប៉ុណ្ណោះ ។
លោក ម៉ាក សុភាព ឱ្យដឹងថា ប្រភេទសត្វដែលសំខាន់ៗដែលនៅក្នុងជម្រកសត្វព្រៃសៀមប៉ាងនេះ គឺមានសត្វជិតផុតពូជដូចជាសត្វត្រយងយក្ស សត្វត្រយងចង្កំកសសត្វត្មាតភ្លើង សត្វត្មាតផេះ និងសត្វត្មាតត្នោត និងមានបក្សីផ្សេងទៀតជាច្រើនប្រភេទទៀតដូចជា សត្វត្រដក់ សត្វក្រៀល និងសត្វក្ងោកជាដើម។
ក្រៅពីនេះក៏នៅមានសត្វរមាំង សត្វទន្សោង សត្វប្រើស និងសត្វពពួកខ្លាឃ្មុំ និងសត្វផ្សេងៗទៀតជាច្រើនផងដែរ ដែលអាចអាស្រ័យទឹកនៅក្នុងត្រពាំងទាំងនេះ។
លោក ម៉ូក វ៉ាន់ ប្រជាពលរដ្ឋរស់នៅភូមិខិះក្រោម ឃុំព្រែកមាស នៃស្រុកសៀមប៉ាងថ្លែងថា ការជីកស្តារត្រពាំងទឹកនៅក្នុងតំបន់ដែនជម្រកសត្វព្រៃសៀមប៉ាងនេះបានផ្តល់ផលប្រយោជន៍យ៉ាងច្រើនដល់ប្រជាពលរដ្ឋ និងធនធានធម្មជាតិ និងជាពិសេសសត្វដែលរស់នៅក្នុងព្រៃនេះ។
លោកបានបន្តថា៖ «នៅពេលដែលមានត្រពាំងទឹកនេះនឹងធ្វើឱ្យធនធានធម្មជាតិរក្សាបានគង់វង្ស និងមួយទៀតសម្រាប់ផលប្រយោជន៍គោក្របីរបស់ប្រជាពលរដ្ឋមកពី ៣ ភូមិ មានពលរដ្ឋប្រហែល ជាង ១ ០០០ គ្រួសារក៏បានអាស្រ័យផលពីទឹកក្នុងត្រពាំងនេះផងដែរ។ ក្រៅពីនេះ ប្រជាពលរដ្ឋក៏អាចបង់សំណាញ់ចាប់ត្រី រកខ្យងក្តាមសម្រាប់ចិញ្ចឹមជីវិតបានថែមទៀត»។
បើតាម លោក ម៉ូក វ៉ាន់ កាលពី ២ ឬ ៣ ឆ្នាំមុន ប្រជាពលរដ្ឋនៅក្នុងតំបន់នេះ មិនមានការយល់ដឹងពីសារប្រយោជន៍នៃការអភិរក្សធនធានធម្មជាតិទេ ប៉ុន្តែនៅក្នុងឆ្នាំនេះ ប្រជាពលរដ្ឋមានការយល់ដឹងច្រើនជាងមុន ដោយសារមានការអប់រំ និងផ្សព្វផ្សាយពីអង្គការ និងអាជ្ញាធរពាក់ព័ន្ធនានា។
ដែនជម្រកសត្វព្រៃសៀមប៉ាងដែលស្ថិតនៅក្នុងស្រុកសៀមប៉ាង ខេត្តស្ទឹងត្រែង មានផ្ទៃដីទំហំជាង ៦ ម៉ឺនហិកតា ត្រូវបានបង្កើតឡើងដោយអនុក្រឹត្យកាលពី ២០១៦៕
