.jpg)
ប៉ូលិសចរាចរណ៍ពិនិត្យការធ្វើដំណើរតាមផ្លូវជាតិលេខ ៣ ក្នុងឆ្នាំនេះ។ ហេង ជីវ័ន
ភ្នំពេញៈ អង្គការជាតិ និងអន្តរជាតិដែលកំពុងបំពេញការងាររួមចំណែកក្នុងការលើកកម្ពស់សុវត្ថិភាពចរាចរណ៍ផ្លូវគោកនៅប្រទេសកម្ពុជាបានស្នើទៅលោក ហង់ជួន ណារ៉ុន រដ្ឋមន្ដ្រីក្រសួងអប់រំ ពិនិត្យលទ្ធភាពជំរុញការផ្សព្វផ្សាយអំពីសុវត្ថិភាពចរាចរណ៍ផ្លូវគោកនៅតាមគ្រឹះស្ថានសិក្សានានានៅពេលបើកបវេសនកាលឆ្នាំសិក្សាថ្មីព្រមទាំងបញ្ចូលសំណួរអំពីសុវត្ថិភាពចរាចរណ៍ផ្លូវគោកនៅក្នុងវិញ្ញាសាប្រឡងថ្នាក់ជាតិផងដែរ។
អង្គការមូលនិធិបង្ការរបួសអាស៊ី និងអង្គការសម្ព័ន្ធដើម្បីសុវត្ថិភាពចរាចរណ៍ផ្លូវគោក តាមរយៈសំណើស្នើទៅលោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាកាលពីថ្ងៃទី ៣០ ខែតុលានេះ បានបង្ហាញថា ទោះបីស្ថានភាពចរាចរណ៍ផ្លូវគោកនៅកម្ពុជាមានការវិវឌ្ឍជាវិជ្ជមានគួរឲ្យកត់សម្គាល់ក៏ដោយ ប៉ុន្តែគ្រោះថ្នាក់ចរាចរណ៍ក្នុងពេលបច្ចុប្បន្ននៅតែមានតួលេខខ្ពស់ខ្លាំងនៅឡើយ។ គ្រោះថ្នាក់ទាំងនោះបានបន្តកើតឡើងក្នុងរូបភាពកាន់តែសាហាវ និងគួរឲ្យព្រួយបារម្ភយ៉ាងខ្លាំង។
អង្គការទាំង ២ បានស្នើថា៖ «យើងខ្ញុំសូមគោរពស្នើសុំ ឯកឧត្ដម បណ្ឌិតសភាចារ្យរដ្ឋមន្ដ្រី មេត្តាពិនិត្យលទ្ធភាព ជំរុញដល់ថ្នាក់ដឹកនាំ ក្រសួងមន្ទីរអប់រំ យុវជន និងកីឡារាជធានី-ខេត្ដទូទាំងប្រទេសកម្ពុជាឲ្យធ្វើការអប់រំផ្សព្វផ្សាយអំពីសុវត្ថិភាពចរាចរណ៍ផ្លូវគោកដល់សិស្ស-និស្សិត លោកគ្រូ-អ្នកគ្រូ និងមាតាបិតា អាណាព្យាបាលសិស្សពេលចុះបើកបវេសនកាល និងបង្កើនការអប់រំផ្សព្វផ្សាយនៅតាមគ្រឹះស្ថានសិក្សាក្នុងឆ្នាំសិក្សាថ្មីនេះសំដៅជំរុញការយកចិត្ដទុកដាក់ និងការចូលរួមរបស់ពួកគាត់ឲ្យកាន់តែសកម្មក្នុងការឆ្លើយតបចំពោះបញ្ហាគ្រោះថ្នាក់ចរាចរណ៍»។
អង្គការទាំង ២ បង្ហាញថា អ្នកស្លាប់ដោយសារគ្រោះថ្នាក់ចរាចរណ៍ក្នុង ១ ឆ្នាំៗមានចំនួនយ៉ាងតិចណាស់ជាង ៣០ ដងច្រើនជាងអ្នកស្លាប់ដោយសារជំងឺគ្រុនឈាម ជំងឺគ្រុនចាញ់ និងគ្រាប់មីនបូកបញ្ចូលគ្នាទៅទៀត។ ជារៀងរាល់ឆ្នាំ អ្នកស្លាប់យ៉ាងតិចណាស់ ១០ ភាគរយ គឺជាសិស្ស-និស្សិត ហើយដែលមួយភាគធំកើតឡើងនៅពេលដែលសិស្សនិស្សិតទាំងនោះធ្វើដំណើរទៅមកសាលារៀនរបស់ពួកគេ។
អង្គការទាំង ២ នេះសង្កេតឃើញថា គ្រោះថ្នាក់ចរាចរណ៍ក្នុងអំឡុងពេល ៩ ខែ ឆ្នាំ ២០១៩ មានការកើនឡើងយ៉ាងខ្លាំងបើប្រៀបធៀបនឹងរយៈពេលដូចគ្នាកាលពីឆ្នាំ ២០១៨។ ជាមួយគ្នានេះនៅអំឡុងពេលពិធីបុណ្យអុំទូក បណ្ដែតប្រទីប អកអំបុក សំពះព្រះខែ តែងតែកើតមានគ្រោះថ្នាក់ចរាចរណ៍ក្នុងតួលេខខ្ពស់ខ្លាំងស្របពេលពិធីនេះនឹងប្រារព្ធឡើងនៅពេលដ៏ខ្លីខាងមុខដែលកៀកនឹងថ្ងៃបើកបវេសនកាលឆ្នាំសិក្សាថ្មីនេះផងដែរ។
លោក គឹម បញ្ញា នាយកអង្គការ មូលនិធិបង្ការរបួសអាស៊ីប្រចាំប្រទេស កម្ពុជា ថ្លែងថា បន្ថែមពីលើការលើកទឹកចិត្តឱ្យមានការអនុវត្តច្បាប់ស្តីពីចរាចរណ៍ផ្លូវគោកដោយផ្តោតលើកត្តាហានិភ័យនានា ដូចជាល្បឿន មួកសុវត្ថិភាព ការបើកបរក្រោមឥទ្ធិពលគ្រឿងស្រវឹងឱ្យបានម៉ឺងម៉ាត់ ជាប់លាប់ មានតម្លាភាព និងស្មើភាពនោះ បណ្តាញសុវត្ថិភាពចរាចរណ៍ផ្លូវគោកនៅកម្ពុជាបានបន្តជំរុញឱ្យមានការអប់រំផ្សព្វផ្សាយកាន់តែទូលំទូលាយពិសេសនៅតាមគ្រឹះស្ថានសិក្សានានា។
លោកថ្លែងថា៖ «យើងមានជំនឿយ៉ាងមុតមាំថា ជាមួយនឹងវិធានការដែលអាចនឹងអនុវត្តដោយក្រសួងអប់រំ សិស្ស-និស្សិត លោកគ្រូ-អ្នកគ្រូ និងមាតាបិតាអាណាព្យាបាលសិស្សនឹងទទួលបានការអប់រំផ្សព្វផ្សាយកាន់តែទូលំទូលាយបន្ថែមទៀត។ ជាពិសេសចាប់ពីឆ្នាំសិក្សាថ្មីនេះតទៅ ហើយសិស្ស-និស្សិតនឹងកាន់តែមានសុវត្ថិភាពក្នុងការធ្វើដំណើរទៅមកសម្រាប់ការសិក្សាក៏ដូចជាក្នុងគោលបំណងផ្សេងៗទៀត»។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាថ្លែងពីម្សិលមិញថា ទាក់ទិននឹងការអប់រំសុវត្ថិភាពចរាចរណ៍ផ្លូវគោក ក្រសួងអប់រំបានសហការជាមួយក្រសួងមហាផ្ទៃ និងអង្គការ HANDICAP INTERNATIONAL រៀបចំការអប់រំសុវត្ថិភាពចរាចរណ៍ផ្លូវគោកក្នុងកម្មវិធីសិក្សាតាំងពីឆ្នាំ ២០០៤ មកម្ល៉េះ។
លោកនិយាយថា បន្ថែមលើខ្លឹមសារដែលបានបញ្ជ្រាបពីមុនមកក្រសួងបានរៀបចំជាសៀវភៅដែលមានឈ្មោះ «ការអប់រំសុវត្ថិភាពចរាចរណ៍ផ្លូវគោក» តាំងពីថ្នាក់ទី ១ ដល់ទី ៩ ដែលបានបោះពុម្ពផ្សាយតាំងពីឆ្នាំ ២០០៦ មកម៉្លេះ ហើយផ្សព្វផ្សាយជាបន្តបន្ទាប់។ ចំណែកកម្រិតមធ្យមសិក្សាពីថ្នាក់ទី ៧ ដល់ទី ៩ ក៏នៅប្រើសៀវភៅដូចគ្នានេះដែរ ដែលសៀវភៅនេះមានទាំងសៀវភៅសម្រាប់សិស្ស និងសៀវភៅសម្រាប់គ្រូ។ ឯការអប់រំសុវត្ថិភាពចរាចរណ៍ផ្លូវគោកសម្រាប់ថ្នាក់ទី ១០ ដល់ ១២ ធ្វើឡើងជា «វេទិកាផ្សព្វផ្សាយ» ដោយសហការទាំង ៣ ភាគីខាងលើដដែល។
លោកថ្លែងថា៖ «ថ្មីៗនេះក្រសួងក៏បានចេញសេចក្តីណែនាំបន្ថែម ១ ទៀតទៅលើការពង្រឹងការអនុវត្តការអប់រំសុវត្ថិភាពចរាចរណ៍ផ្លូវគោកនេះនៅតាមសាលារៀនទូទាំងប្រទេស ហើយបានផ្សព្វផ្សាយហើយដែរ។ ក្រសួងសហការជាមួយគ្រប់ភាគីពាក់ព័ន្ធ ជាពិសេសតាមរយ:គណៈកម្មការអន្តរក្រសួង។ ការបណ្តុះបណ្តាលគ្រូក៏បានចប់សព្វគ្រប់តាំងពីឆ្នាំ ២០០៩»។
របាយការណ៍បូកសរុបគ្រោះថ្នាក់ចរាចរណ៍ផ្លូវគោករបស់អគ្គស្នងការដ្ឋាននគរបាលជាតិ សម្រាប់ត្រីមាសទី ៣ ឆ្នាំ ២០១៩ បង្ហាញ គ្រោះថ្នាក់ចរាចរណ៍ក្នុងត្រីមាសទី ៣ ឆ្នាំ ២០១៩ នេះបានកើតឡើង ៩៨៨ លើកបណ្តាលឲ្យមនុស្សស្លាប់ ៤៨៨ នាក់ និងរបួស ១ ៤៩៤ នាក់។ ចំនួននេះបើប្រៀបនឹងរយៈពេលដូចគ្នាកាលពីឆ្នាំ ២០១៨ មានការកើនឡើង ២៣៨ លើកអ្នកស្លាប់កើនឡើងចំនួន ១០៥ នាក់ និងរបួសកើនឡើងចំនួន ៤៤៦ នាក់។
របាយការណ៍នេះបញ្ជាក់ថា គ្រោះថ្នាក់ចរាចរណ៍កើតឡើងភាគច្រើននៅភ្នំពេញបណ្ដាលឲ្យស្លាប់ ៨៣ នាក់ ខេត្តកណ្តាលស្លាប់ ៤៥ នាក់ ខេត្តកំពង់ស្ពឺ ៤១ នាក់ និងខេត្តព្រះសីហនុស្លាប់ ៣៧ នាក់។ គ្រោះថ្នាក់នេះដោយសារការបើកបរលើសល្បឿនកំណត់ ៣៣ ភាគរយ មិនគោរពសិទ្ធិ ២៧ ភាគរយ មិនប្រកាន់ស្តាំ ១៣ ភាគរយ វ៉ាជែង ១០ ភាគរយ បត់ ៩ ភាគរយ ស្រវឹង ៤ ភាគរយ កត្តាយានយន្ត ៣ ភាគរយ ងងុយដេក ១ ភាគរយ៕
