.jpg)
ក្រុមមន្ត្រីឧទ្យានុរក្សកំពុងត្រួតពិនិត្យការបោះបង្គោលវាតយកដីព្រៃរបស់រដ្ឋក្នុងស្រុកឱរ៉ាល់។ សហការី
កំពង់ស្ពឺៈ លោក ជា ហ៊ាន ប្រធានអង្គការប្រឆាំងអំពើពុករលួយ និងទប់ស្កាត់ការបំផ្លាញធនធានធម្មជាតិ គ្រោងនឹងស្នើទៅលោក ស ខេង រដ្ឋមន្រ្ដីក្រសួងមហាផ្ទៃ ជួយអន្តរាគមន៍ទប់ស្កាត់ករណីជនខិលខូចឃុបឃិតគ្នាទន្រ្ទានដីតំបន់អភិរក្សដែនជម្រកសត្វព្រៃភ្នំឱរ៉ាល់ ស្ថិតនៅភូមិស្រែកិន ឃុំត្រពាំជោរ ស្រុកឱរ៉ាល់។
លោក ជា ហ៊ាន បានថ្លែងប្រាប់ភ្នំពេញប៉ុស្ដិ៍កាលពីថ្ងៃចន្ទខណៈដែលលោកកំពុងតាមដានមើលកម្លាំងសមត្ថកិច្ចចុះទៅអនុវត្ដដីការបស់រដ្ឋបាលខេត្ដកំពង់ស្ពឺ ដើម្បីដកហូតដីតំបន់អភិរក្ស ដែលត្រូវបានគេឃុបឃិតគ្នាទន្រ្ទានយកទៅលក់ឲ្យឈ្មួញ ប៉ុន្ដែត្រូវបានសហគមន៍នៅតំបន់នោះ កែនពលរដ្ឋមកទាមទារដី ថា ប្រធានសហគមន៍ ឧត្ដមស្រែខ្ពស់ និងសមាជិក បានកែនពលរដ្ឋមកតវ៉ា ប្រឆាំងមន្រ្ដីឧទ្យានុរក្ស មិនឲ្យអនុវត្ដច្បាប់ចុះដកហូតដីឲ្យរដ្ឋវិញ ដើម្បីទាមទារយកដីនោះលក់ឲ្យឈ្មួញ ព្រោះសហគមន៍បានឃុបឃិតជាមួយប្រជាពលរដ្ឋយកដីនោះលក់យកលុយពីឈ្មួញរួចទៅហើយ។
លោកថ្លែងថា៖ «បើសិនជាពួកគាត់មិនធ្វើការតវ៉ាទេ បុគ្គលដែលទិញដីនោះ នឹងប្ដឹងពួកគាត់ ពីបទឆបោក។ អ៊ីចឹង ពួកគាត់ត្រូវតែតវ៉ា ទាមទារដីនោះឲ្យបាន។ ខ្ញុំនឹងដាក់សំណើទៅសម្ដេចក្រឡាហោម ស ខេង ក្រោយពេលខ្ញុំចុះស្រង់ទិន្នន័យបានសព្វគ្រប់ និងបញ្ចប់បេសកកម្មនៅតំបន់ដែនជម្រកសត្វព្រៃក្នុងពេលឆាប់ៗនេះ ដើម្បីស្នើសុំជួយអន្តរាគមន៍ទៅរដ្ឋមន្រ្ដីក្រសួងបរិស្ថានចាត់វិធានការក្ដៅចំពោះមេឈ្មួញដែលបានកែនពលរដ្ឋមកទន្ទ្រានដីព្រៃក្នុងតំបន់អភិរក្សនេះ»។
លោកអះអាងថា៖ «ការកាប់ទន្រ្ទាននេះ អាជ្ញាធរមូលដ្ឋាន នៅដែនជម្រកសត្វព្រៃភ្នំឱរ៉ាល់ បានសហការជាមួយសហគមន៍ ដោយឲ្យពលរដ្ឋផ្ដិតមេដៃថា ដីក្នុងតំបន់ដែនជម្រកសត្វព្រៃ ជាដីចម្ការរបស់ពលរដ្ឋ។ ប៉ុន្ដែជាក់ស្ដែងដីនៅតំបន់នោះជាដីអភិរក្ស ដែនជម្រកសត្វព្រៃរបស់រដ្ឋ»។
បើតាមលោក ជា ហ៊ាន ការទន្ទ្រានយកដីព្រៃនេះ ជនខិលខូចបានប្រើគ្រឿងចក្រមកឈូសឆាយ តាមកន្លែងផ្សេងៗ មានទំហំចាប់ពី ១០-២០-៣០ ហិកតាសរុបដីក្នុងតំបន់អភិរក្សដែលជនខិលខូចរំលោភយកមានប្រមាណ ៣០០ ហិកតាហើយ។
លោក ជា ហ៊ាន បានសរសេរបង្ហោះនៅលើហ្វេសប៊ុករបស់លោកកាលពីថ្ងៃចន្ទថា៖ «វាមិនមែនលំៗទេ ទាំងមេភូមិពោធិមាស និងអាជ្ញាធរឃុំ សហការគ្នា និងមេសហគមន៍ចេញមុខមករារាំងមន្រ្តីឧទ្យានុរក្សបរិស្ថាន និងអង្គការដែលបានចុះអនុវត្តច្បាប់ ខណៈដែលពួកគេបានប្រើប្រាស់ពលរដ្ឋចាប់រានដីព្រៃលក់ឲ្យ ឈ្មោះ បូរី ជាមន្រ្តីយោធា រឿងនេះបានបញ្ជាក់ឃើញថាគេសហការគ្នាបានល្អណាស់ក្នុងការប្រឆាំងទៅលើមន្រ្តីដែលចុះអនុវត្តច្បាប់»។
លោក ហ៊ុល ម៉ារ៉ា នាយករងដែនជម្រកសត្វព្រៃភ្នំឱរ៉ាល់ដែលបានចុះអនុវត្ដដីកាដកហូតដី ដែលត្រូវគេរំលោភបំពាន និងត្រូវបានប្រធានសហគមន៍ និងសមាជិក រារាំងនោះ បានថ្លែងប្រាប់ភ្នំពេញប៉ុស្ដិ៍ថា ការទន្ទ្រានយកដីព្រៃក្នុងដែនអភិរក្សនេះ មិនមែនប្រជាពលរដ្ឋសាមញ្ញអាចធ្វើបានទេ ព្រោះមានការរំលោភ ព័ទ្ធរបងយកដីរាប់រយហិកតា។
លោកថ្លែងថា៖ «បើពលរដ្ឋជាអ្នករំលោភយក វាមិនមានទំហំធំដល់ថ្នាក់នេះទេ វាមានទំហំតែ ៤ ទៅ ៥ ហិកតាអីទេ។ បើជាប្រជាពលរដ្ឋគាត់មិនហ៊ាននឹងមិនមានសិទ្ធិទៅកាន់កាប់នៅតំបន់ដីព្រៃអភិរក្សនេះទៅទៀត។ ប៉ុន្ដែការទន្ទ្រាននេះ បានមកធ្វើរបងព័ទ្ធយកដីមាន ៤ ទៅ ៥០០ បង្គោលទៅហើយ»។
លោកបន្ដថា៖ «គឺវាមានការឃុបឃិតគ្នាលក់ដីនេះទៅឲ្យឈ្មួញ ដល់ពេលយើងចុះអនុវត្ដច្បាប់ទៅ ប្រធានសហគមន៍គាត់យកប្រជាជនតវ៉ា ដើម្បីធ្វើជាសំអាង ដើម្បីដោះបន្ទុក។ ប្រជាជនគាត់គ្មានលទ្ធភាពទៅធ្វើបង្គោលព័ទ្ធលើដី ៥០ ទៅ ៦០ ហិកតាបែបនេះទេ»។
លោក ម៉ារ៉ា បានលើកឡើងថា នឹងប្ដេជ្ញាដោះស្រាយបញ្ហាទន្ទ្រានយកដីរដ្ឋនេះនិងធ្វើរបាយការណ៍ដាក់ទៅមន្ទីរបរិស្ថានខេត្ដកំពង់ស្ពឺ ដើម្បីដាក់ឡើងទៅក្រសួងបរិស្ថាន។
លោក វ៉ី សំណាង អភិបាលខេត្ដកំពង់ស្ពឺ ថ្លែងប្រាប់ភ្នំពេញប៉ុស្ដិ៍កាលពីថ្ងៃចន្ទថា៖ «យើងទទួលបានព័ត៌មានជុំវិញបញ្ហានេះហើយ ប៉ុន្ដែជាវិធានការ គឺយើងឲ្យមន្រ្ដីយើង ព្យាយាមធ្វើការដុតបំផ្លាញនូវបង្គោលហ៊ុមព័ទ្ធដីព្រៃទាំងនោះហើយ»។
លោក មួង ធី អភិបាលស្រុកឱរ៉ាល់ថ្លែងថា រដ្ឋបាលស្រុកបានអនុវត្ដវិធានការជាបន្ដបន្ទាប់ចំពោះជនខិលខូចដែលទៅទន្ទ្រានដីព្រៃអភិរក្សរបស់រដ្ឋដោយមានការដកហូតដីមកវិញក៏មាន ហើយបច្ចុប្បន្នក៏កំពុងបន្ដថា ដែរ។
ទាក់ទងនឹងសហគមន៍ និងពលរដ្ឋទៅតវ៉ាមិនឲ្យមន្រ្ដីឧទ្យានុរក្សអនុវត្ដដីការបស់រដ្ឋបាលខេត្ដដើម្បីដកហូតដីរដ្ឋវិញនេះ លោកបន្ដថា៖ «នេះគាត់ទើបតែចូលទន្រ្ទានកាន់កាប់ក្រោយទេ ដីដែលស្របច្បាប់ គឺពលរដ្ឋមានបណ្ណកម្មសិទ្ធិរួចរាល់អស់ហើយ»។
លោក នៅ ណាក់ អនុប្រធានមន្ទីរបរិស្ថានខេត្តកំពង់ស្ពឺ ថ្លែងថា ដីដែលតំណាងសហគមន៍ និងពលរដ្ឋទៅទន្ទ្រាននោះ គឺជាតំបន់អភិរក្ស មិនមានការចេញប្លង់កម្មសិទ្ធិណាមួយទទួលស្គាល់ជាដីឯកជនទេ។
លោកបន្ដថា៖ «ការតវ៉ា ការទាមទារ គឺជាសិទ្ធិរបស់ពួកគាត់ ប៉ុន្ដែក្នុងនាមភ្នាក់ងារអភិរក្ស យើងត្រូវតែអនុវត្ដទៅតាមច្បាប់នៃតំបន់ការពារធនធានធម្មជាតិ»។
ភ្នំពេញប៉ុស្ដិ៍មិនទាន់អាចទំនាក់ទំនងសុំការបកស្រាយពីប្រធានសហគមន៍ឧត្ដមស្រែខ្ពស់ និងសមាជិកបានទេកាលពីថ្ងៃចន្ទ។
ក្រសួងបរិស្ថានធ្លាប់ប្រកាស បដិសេធមិនទទួលស្គាល់បណ្ណសម្គាល់កម្មសិទ្ធិឬលិខិតលក់ដូរដី ដែលបានមកពីការកាប់រុករានទន្ទ្រានកាន់កាប់ដីព្រៃរបស់រដ្ឋ ដោយខុសច្បាប់ឡើយ បើទោះបីជាមានការទទួលស្គាល់ពីភូមិ ឃុំ ឬស្រុកក្តី៕
