ភ្នំពេញៈ អង្គការ Good Neighbors Cambodia កាលពីម្សិលមិញបានបង្ហាញរបាយការណ៍នៃការស្ទង់មតិទៅលើកុមារមួយចំនួនក្រោមអាយុ ១៨ ឆ្នាំ បានឲ្យដឹងថា កុមារ ៤,៩% ត្រូវបានគេលួងលោម និងបង្ខំឱ្យប្រើប្រាស់គ្រឿងញៀនពីមិត្តភក្ដិ និងអ្នកជិតខាង និងកុមារ ៣,៤% ធ្លាប់ប្រើប្រាស់គ្រឿងញៀន។
ការស្ទង់មតិនេះបានធ្វើឡើងពីខែឧសភាដល់ខែ កក្កដា ឆ្នាំ ២០១៩ ដោយក្រុមយុវជនអង្គការ Good Neighbors Cambodia ដែលបានចុះសម្ភាសកុមារ ២៨៣ នាក់ដែលមានអាយុចាប់ពី ១៣ ឆ្នាំ ដល់ ១៨ ឆ្នាំ ស្ថិតក្នុងរាជធានីភ្នំពេញ ខេត្តបន្ទាយមានជ័យ បាត់ដំបង ក្រចេះ និងខេត្តមណ្ឌលគិរី ជាតំបន់ដែលអង្គការនេះកំពុងជួយឧបត្ថម្ភដើម្បីគាំពារកុមារចំនួន ១២ ពាន់នាក់។
របាយការណ៍ស្ទង់មតិនេះបានឲ្យដឹងថា ក្នុងចំណោមកុមារ ២៨៣ នាក់ ផ្ដល់បទសម្ភាសគឺ ១៥,៩% បានរាយការណ៍ថា ធ្លាប់ឃើញការជួញដូរគ្រឿងញៀននៅក្នុងសហគមន៍រស់នៅរបស់ពួកគេ ហើយពួកគេភាគច្រើនមិនហ៊ានរាយការណ៍ទៅសមត្ថកិច្ចឡើយដោយសារភ័យខ្លាចអំពីសុវត្ថិភាព ខណៈប្រមាណ ៨១,១% ទៀត ធ្លាប់បានឃើញផ្ទាល់អ្នកប្រើប្រាស់គ្រឿងញៀន ដែលមានអាយុចម្លោះពី ១៨ ឆ្នាំដល់ ៣០ ឆ្នាំ។
កញ្ញា ចែម នីតា រស់នៅក្នុងភូមិដីឡូត៍ ឃុំទឹកថ្លា ក្រុងសិរីសោភ័ណ ខេត្តបន្ទាយមានជ័យ និងជាសិស្សវិទ្យាល័យហ៊ុនសែន ខ្លាកូនដែលជាយុវជនម្នាក់ចូលរួមក្នុងក្រុមយុវជនសិក្សាស្ទង់មតិបានលើកឡើងថា អ្នកប្រើប្រាស់គ្រឿងញៀននៅក្នុងភូមិកញ្ញាគឺមានអាយុ ១៨ ឆ្នាំទៅ ២៥ ឆ្នាំ ហើយភាគច្រើនជាអ្នកបោះបង់ការសិក្សា។ សិស្សរូបនេះបន្តថាក្នុងចំណោមអ្នកប្រើប្រាស់គ្រឿងញៀនទាំងនោះ គឺភាគច្រើនជាកូនអ្នកក្រីក្រ ហើយកូនអ្នកមានជីវភាពធូរធារគឺមានតិចតួចប៉ុណ្ណោះ។
កញ្ញា នីតា បានថ្លែងថា៖ «ការប្រើប្រាស់គ្រឿងញៀនគឺភាគច្រើនតាមគ្នាហើយនៅពេលពួកគេដើរលេងជាមួយគ្នាគឺច្រើនតែជក់តាមគ្នា។ នៅពេលប៉ូលិសចាប់ ហើយដោះលែងមកវិញគឺភាគច្រើននៅដដែល ហើយមានអ្នកខ្លះកាន់តែខ្លាំងជាងមុន»។
ការថ្លែងរបស់កញ្ញា ចែម នីតា ធ្វើឡើងនៅក្នុងវេទិកាយុវជនថ្នាក់ជាតិស្ដីពីការទប់ស្កាត់គ្រឿងញៀន និងការអភិវឌ្ឍយុវជនរៀបចំឡើងដោយអង្គការ Good Neighbors Cambodia នៅភោជនីយដ្ឋានទន្លេបាសាក់ ២ កាលពីថ្ងៃម្សិលមិញដែលមានយុវសិស្សចំនួន ១២៥ នាក់ចូលរួម រួមទាំងមន្ត្រីអាជ្ញាធរជាតិគ្រឿងញៀន មន្ត្រីក្រសួងអប់រំ មន្ត្រីក្រសួងសង្គមកិច្ច គ្រូបង្រៀន និងអាជ្ញាធរភូមិឃុំ។
លោក ជេកយ៉ុន រ៉ូ នាយកប្រចាំប្រទេសអង្គការ Good Neighbors Cambodia បានថ្លែងថាកម្ពុជាគឺជាប្រទេសរងគ្រោះមួយក្នុងចំណោមប្រទេសរងគ្រោះនានា ហើយប្រជាជន ជាពិសេសកុមារ និងយុវជនបានទទួលផលប៉ះពាល់ពីថ្នាំញៀន»។
លោកបន្ថែមថា៖ «សេចក្ដីរីករាយមិនមែនកើតចេញពីថ្នាំញៀននោះទេ។ គ្រឿងញៀនមិនដែលនាំមកនូវភាពមានបានកេរ្តិ៍ឈ្មោះ និងសុភមង្គលនោះទេ ផ្ទុយទៅវិញវាធ្វើឱ្យអ្នកអាប់ឱនកិត្ដិយសនៅក្នុងសង្គមតែប៉ុណ្ណោះ»។
អង្គការ Good Neighbors Cambodia បានជួយបណ្ដុះបណ្ដាលយុវជនស្ម័គ្រចិត្តចំនួន ៤០ នាក់ អំពីរបៀបរៀបចំកម្រងសំណួរ ការសម្ភាស និងការប្រមូលទិន្នន័យនៅក្នុងការចុះសិក្សាស្ទង់មតិដែលបានធ្វើឡើងក្នុងរាជធានីភ្នំពេញ បន្ទាយមានជ័យ បាត់ដំបង ក្រចេះ និងខេត្តមណ្ឌលគិរីជារាជធានីខេត្តដែលអង្គការនេះកំពុងជួយឧបត្ថម្ភដើម្បីគាំពារកុមារជាង ១ ម៉ឺន ២ ពាន់នាក់។
នៅក្នុងការស្ទង់មតិដដែលនេះ ក្រុមយុវជនក៏បានរកឃើញថា គ្រឿងញៀនបានបង្កឱ្យមានអំពើលួចប្លន់ អំពើហិង្សាក្នុងគ្រួសារ និងលើអ្នកដទៃ ក្មេងទំនើង ការបែកបាក់គ្រួសារ ការធ្វើអត្តឃាត និងការប្រព្រឹត្តអំពើពេស្សាចារជាដើម។
លោក ថោង សុគន្ធា អគ្គលេខាធិការរងនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនបានគាំទ្រចំពោះការសិក្សាស្ទង់មតិដោយយុវជននេះ ព្រោះលោកថាវាជាការសិក្សាដ៏សំខាន់មួយជួយទៅដល់អាជ្ញាធរជំនាញប្រើប្រាស់ក្នុងការចុះទៅអប់រំទប់ស្កាត់អំពីបញ្ហាគ្រឿងញៀនឱ្យចំគោលដៅ។
ប៉ុន្តែលោកយល់ថា ការស្ទង់មតិនេះគួរធ្វើឡើងដោយមានកិច្ចសហការជាមួយអាជ្ញាធរមូលដ្ឋាន ដើម្បីជួយកាត់បន្ថយភាពលម្អៀងបានច្រើននៅក្នុងការប្រមូលព័ត៌មាន ហើយលោកស្នើឱ្យមានការស្ទង់មតិលើកក្រោយ គួរធ្វើឡើងដោយគ្របដណ្ដប់ចំនួនខេត្តឱ្យបានច្រើនជាងនេះ។
លោក សុគន្ធា បានថ្លែងថា៖ «ប៉ុន្តែការសិក្សាហ្នឹងល្អមែនទែន ហើយក្នុងនាមអគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀននេះ គឺគាំទ្រមែនទែន ហើយសុំឱ្យពិនិត្យដើម្បីពង្រីកវិសាលភាពបានអត់? ព្រោះការស្ទាបស្ទង់នេះ គឺយើងបានធ្វើត្រឹមតែទីកន្លែងគោលដៅក៏វានៅតិចដែរហើយអត់ទាន់អាចតំណាងឱ្យព័ត៌មានទូលំទូលាយកើតទេ»។
លោក ថោង សុគន្ធា បន្ថែមថារយៈពេល ៨ ខែ ឆ្នាំ ២០១៩ នេះមានអ្នកប្រើប្រាស់ និងជួញដូរគ្រឿងញៀនត្រូវបានចាប់ខ្លួនមានជាង ៩ ពាន់នាក់ ខណៈលោកថាបច្ចុប្បន្នតួលេខអ្នកប្រើប្រាស់គ្រឿងញៀន និងជួញដូរមិនទាន់ថយចុះនៅឡើយ និងកំពុងក្លាយជាបញ្ហាក្ដៅដែលរដ្ឋាភិបាលត្រូវខិតខំដោះស្រាយ។
នៅក្នុងការស្ទង់មតិ ក្រុមយុវជនបានស្នើឱ្យរដ្ឋាភិបាលពង្រឹងប្រសិទ្ធភាពការអនុវត្តគោលនយោបាយភូមិ-ឃុំមានសុវត្ថិភាព ការពង្រឹងការចុះអប់រំផ្សព្វផ្សាយតាមសហគមន៍ ការពង្រឹងអនុវត្តច្បាប់លើអ្នកផលិត និងជួញដូរ ការពង្រឹងត្រួតពិនិត្យសារធាតុញៀនក្នុងចំណោមសិស្ស និងអាជ្ញាធរខ្លួនឯង និងការលើកទឹកចិត្តឱ្យយុវជន និងសហគមន៍រាយការណ៍អំពីបញ្ហាគ្រឿងញៀនជាដើម៕