ភ្នំពេញៈ អង្គការចលនាដើម្បីសុខភាពកម្ពុជាប្រកាសគាំទ្រចំណាត់ការរបស់រដ្ឋបាលខេត្ដកំពង់ស្ពឺ ដែលហាមផ្សព្វផ្សាយពាណិជ្ជកម្មគ្រឿងស្រវឹងតាមស្លាកប៉ាណូនៅភូមិសាស្ត្រខេត្ដ ខណៈអ្នកនាំពាក្យក្រសួងពាណិជ្ជកម្ម បានអះអាងថា ការអនុញ្ញាត ឬមិនអនុញ្ញាតផ្សាយស្រាបៀរ គឺជាការសម្រេចរបស់អាជ្ញាធរមូលដ្ឋាន។
កាលពីថ្មីៗនេះលោក វ៉ី សំណាង អភិបាលខេត្តកំពង់ស្ពឺបានដាក់ចេញវិធានការជាបន្តបន្ទាប់ក្នុងនោះក៏បានទុកពេល ១ សប្តាហ៍ ឱ្យម្ចាស់អាជីវកម្មក្នុងខេត្តរុះរើចេញជាបន្ទាន់នូវស្លាកប៉ាណូដែលផ្សព្វផ្សាយផលិតផលស្រាបៀរនៅតាមទីសាធារណៈ ដើម្បីរក្សាសណ្តាប់ធ្នាប់ ជាពិសេសលើកកម្ពស់សេចក្តីថ្លៃថ្នូរ និងរក្សាបានសោភណភាពក្នុងខេត្តនេះ។
សេចក្តីប្រកាសព័ត៌មានគាំទ្រការហាមផ្សាយពាណិជ្ជកម្មគ្រឿងស្រវឹងរបស់អង្គការចលនា ដើម្បីសុខភាពកម្ពុជា ចុះថ្ងៃទី ២៤ ឧសភានេះ ចាត់ទុកចំណាត់ការរបស់ខេត្តកំពង់ស្ពឺនេះ ថាជាការចាប់ផ្ដើមដ៏ល្អមួយក្នុងការកាត់បន្ថយការជួបជុំ ដែលផ្ទុយនឹងវិធានការ ៣ កុំ ៣ ការពារ របស់រាជរដ្ឋាភិបាល ដើម្បីទប់ស្កាត់ជំងឺកូវីដ ១៩។
អង្គការនេះបានលើកឡើងទៀតថា ការផ្សាយពាណិជ្ជកម្មគ្រឿងស្រវឹងជំរុញ និងទាក់ទាញឱ្យមានអ្នកប្រើប្រាស់គ្រឿងស្រវឹងកាន់តែច្រើន។ ដូច្នេះដើម្បីឱ្យវិធានការនេះមាននិរន្តរភាព និងប្រសិទ្ធភាព កម្ពុជាគួរមានច្បាប់ ឬលិខិតគតិយុត្តិសម្រាប់គ្រប់គ្រងគ្រឿងស្រវឹង។
អង្គការនេះបានបញ្ជាក់ថា៖ «ការហាមឃាត់មិនឱ្យផ្សាយពាណិជ្ជកម្មតាមរយៈស្លាកសញ្ញាមិនគ្រប់គ្រាន់សម្រាប់បង្ការពលរដ្ឋពីការអូសទាញឱ្យប្រើប្រាស់គ្រឿងស្រវឹងទេ ព្រោះពលរដ្ឋនៅតែរងឥទ្ធិពលនៃការផ្សាយពាណិជ្ជកម្មគ្រឿងស្រវឹងតាមមធ្យោបាយផ្សេងទៀតដូចជា ទូរទស្សន៍ វិទ្យុសារព័ត៌មាន បណ្ដាញសង្គម»។
បើតាមអង្គការនេះការប្រើប្រាស់គ្រឿងស្រវឹងជាកត្តាចម្បងបង្កឱ្យមានគ្រោះថ្នាក់ចរាចរណ៍ អំពើហិង្សាគ្រប់ប្រភេទ ភាពក្រីក្រ និងបង្កឱ្យមានជំងឺជាង ២០០ មុខ។ ក្រៅពីនោះបានបង្កការគំរាមកំហែងដល់សុខភាពរបស់ប្រជាជន និងទាមទារឱ្យមានការឆ្លើយតបពីរាជរដ្ឋាភិបាល និងអ្នកពាក់ព័ន្ធផ្សេងទៀតដើម្បីកម្ពុជាសម្រេចគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ។
កាលពីថ្ងៃទី ២០ ខែឧសភា លោក វ៉ី សំណាង អភិបាលខេត្តកំពង់ស្ពឺបានដឹកនាំកិច្ចប្រជុំ ជាមួយគណៈកម្មការប្រយុទ្ធប្រឆាំងជំងឺកូវីដ ១៩ ខេត្ត ហើយបានដាក់ចេញវិធានការនេះ ដោយចាត់អភិបាលរងខេត្តម្នាក់ ដើម្បីដឹកនាំអនុវត្តបទបញ្ជាថ្មីក្នុងការហាមផ្សាយពាណិជ្ជកម្មស្រាបៀរតាមស្លាកប៉ាណូ។
ជាមួយគ្នានេះ លោក វ៉ី សំណាង បានព្រមានថា បើផុតកំណត់ ១ សប្តាហ៍ គ្រប់ម្ចាស់អាជីវកម្ម ឬក្រុមហ៊ុនចែកចាយស្រាបៀរពុំទាន់បានរុះរើ នោះរដ្ឋបាលខេត្តនឹងចាត់នីតិវិធីរដ្ឋបាលរុះរើដោយបន្ទុកចំណាយ និងរាល់ការខូចខាត គឺម្ចាស់អាជីវកម្មជាអ្នកទទួលខុសត្រូវ។
លោកអភិបាលខេត្តបានប្រាប់ភ្នំពេញប៉ុស្តិ៍ថា សម្តេចព្រះសង្ឃរាជ ជួន ណាត ជាអ្នកដើមកំណើតនៅខេត្តកំពង់ស្ពឺ ហើយត្រូវបានចាត់ជាអ្នកប្រាជ្ញដែលបានចងក្រងស្នាដៃនិពន្ធជាច្រើនរួមទាំងវចនានុក្រមខ្មែរសម្រាប់កូនចៅគ្រប់ជំនាន់ក្រោយៗប្រើប្រាស់ ហើយព្រះអង្គជាកូនកសិកររស់នៅខេត្តកំពង់ស្ពឺរហូតរៀងមក។
លោកថា៖ «អ្នកខេត្តកំពង់ស្ពឺ គឺមិនមែនជាអ្នកដែលខ្ជិលច្រអូស ដូចពាក្យគេតែងនិយាយបង្អាប់ថា (អ្នកកំប៊ុងប៊ឺ រលាក់កងជើង) ដូចមុនទៀតទេ មួយវិញទៀត ក៏មិនមែនជាអ្នកផឹកស៊ីអួទីនួនោះដែរ។ ការទទួលទានស្រាគ្រឿងស្រវឹង ឬទឹកប្តូរនិស្ស័យ គឺធ្វើឱ្យមនុស្សប្រែអត្តចរិត ប្រែនិស្ស័យ នាំឱ្យមានហិង្សាក្នុងគ្រួសារ និងនាំឱ្យមានការជួបជុំដែលប៉ះពាល់ដល់វិធានការទប់ស្កាត់ជំងឺកូវីដ ១៩»។
យ៉ាងណា លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានប្រាប់ ភ្នំពេញ ប៉ុស្តិ៍ ពីម្សិលមិញថា ទំនិញស្រាបៀរ ភេសជ្ជៈគ្រឿងស្រវឹងគឺនៅមិនទាន់ចាត់ចូលជាទំនិញហាមឃាត់ទេ គឺផ្ទុយពីបារីដែលត្រូវបានអង្គការសុខភាពពិភពលោក និងរាជរដ្ឋាភិបាលកម្ពុជាសម្រេចបិទមិនឱ្យផ្សាយពាណិជ្ជកម្ម។
ក៏ប៉ុន្តែលោកបានអះអាងថា ចំពោះការអនុញ្ញាត ឬមិនអនុញ្ញាតឱ្យផ្សព្វផ្សាយស្លាកប៉ាណូស្រាបៀរ គ្រឿងស្រវឹងគឺជាការសម្រេចរបស់អាជ្ញាធរមូលដ្ឋាន ដោយសំអាងលើមូលហេតុសមស្រប ព្រោះថាកម្ពុជាក៏មិនទាន់មានច្បាប់ផ្លូវការក្នុងការហាមឃាត់ ឬគ្រប់គ្រងគ្រឿងស្រវឹងនោះដែរ។
លោកបញ្ជាក់ថា៖ «យើងមិនទាន់បានដឹងបំណងរបស់អាជ្ញាធរដែនដីលោកធ្វើក្នុងការរុះរើបដាស្អីៗនេះ ដើម្បីការរៀបចំសោភណភាពទីក្រុង ឬក៏បំណងរបស់លោកមិនចង់ឱ្យមានការផ្សាយពាណិជ្ជកម្មគ្រឿងស្រវឹង? ដូច្នេះយើងមិនទាន់អាចសន្និដ្ឋានបានទេ។ ចំពោះការរៀបចំសោភណភាពទីក្រុងចំពោះការផ្សព្វផ្សាយតាមប៉ាណូនេះ គឺអាជ្ញាធរដែនដី លោកមានសិទ្ធិពេញលេញក្នុងការរៀបចំនេះ»។
លោក យាន សៅលិញ ពលរដ្ឋម្នាក់រស់នៅក្នុងស្រុកគងពិសីដែលបានស្ម័គ្រចិត្តចូលរួមការរុះរើស្លាកប៉ាណូផ្សាយគ្រឿងស្រវឹងចេញពីមុខផ្ទះ បានប្រាប់ ភ្នំពេញ ប៉ុស្តិ៍ ពីម្សិលមិញថា ក្នុងនាមជាពលរដ្ឋខេត្តកំពង់ស្ពឺម្នាក់ លោកពិតជាសប្បាយចិត្តដែលថ្នាក់ដឹកនាំដាក់ចេញវិធានការនេះ។
លោកថា៖ «មួយរយៈនេះ ប្រទេសយើង ដូចជាយករូបភាពស្រាបៀរយកមកធ្វើជាបង្គោលអ៊ីចឹង។ សម្រាប់មនុស្សម្នាក់ៗ អ្នកណាក៏ចេះហូបស្រាដែរ ប៉ុន្តែបើយើងយកវាមកតាំងជាធំអ៊ីចឹងមើលទៅ មិនល្អមើលទេ»។
បើតាមលោក យាន សៅលិញ បន្ទាប់ពីរដ្ឋបាលខេត្តប្រកាសជាបន្តបន្ទាប់មក មានពលរដ្ឋជាច្រើនបានចូលរួមរុះរើស្លាកប៉ាណូស្រាបៀរទាំងនេះ។ លោករំពឹងថា ខេត្តនានានឹងអនុវត្តតាមដោយដាក់ជំនួសមកវិញនូវរូបសញ្ញាតំណាងខេត្ត តំណាងវប្បធម៌ ឬបង្ហាញពីគុណតម្លៃផ្សេងៗរបស់ប្រទេស៕